Mingəçevir Dövlət Universitetində Şəhər İcra Hakimiyyətinin təşkilatçılığı ilə “Əsrin müqaviləsi tarixi zəfərimizə gedən yolun başlanğıcıdır” mövzusunda konfrans keçirilib.
İştirakçılar əvvəlcə “Əsrin müqaviləsi tarixi zəfərimizə gedən yolun başlanğıcıdır” filminə baxıblar.
Konfransda Mingəçevir Şəhər İcra Hakimiyyətinin başçısı İlham İsmayılov bildirib ki, Ümummilli lider Heydər Əliyev 1969-cu ildə Azərbaycana rəhbər seçildikdən sonra sosial-iqtisadi həyatın bütün sahələrində olduğu kimi, neft sənayesində də əsaslı dəyişikliklər baş verib.
Bildirilib ki, Xəzərin dərinliyində işləməyə imkan verən qazma qurğularının alınması nəticəsində yeni 8 neft və qaz yatağı kəşf edilib. Neft ehtiyatları 2, qaz potensialı isə 3 dəfə artıb. Üzən qazma qurğularından istifadə nəticəsində, indi Azərbaycan neftinin əsas hissəsini verən Günəşli, Çıraq, Azəri yataqları kəşf olunub.
Bu dövrdə dünyada analoqu olmayan Dərin Dəniz Özülləri Zavodu tikilib. Bütün bunlar Azərbaycanın Ümummilli lideri Heydər Əliyevin uzaqgörən və müdrik siyasətinin nəticəsi olaraq gələcək müstəqilliyimiz üçün iqtisadi baza yaratdı.
Məclisdə qeyd edilib ki, Azərbaycan müstəqillik əldə etdikdən sonra 90-cı illərin əvvəllərində bir çox çətinliklərlə üzləşib. Xalqın tələbi ilə ulu öndər Heydər Əliyev hakimiyyətə qayıdandan sonra yeni neft strategiyasına start verdi.
1994-cü ilin sentyabrın 20-də Azəri-Çıraq-Günəşli yataqlarının işlənməsi üzrə dünyanın 7 ölkəsinin 11 məşhur neft şirkəti ilə "Əsrin müqaviləsi" imzalanıb.
"Əsrin müqaviləsi"nin imzalanmasından keçən 30 ilə yaxın müddətdə Ümummilli liderin "Yeni neft strategiyası" Prezident İlham Əliyevin rəhbərliyi ilə böyük uğurla həyata keçirilib. Hazırda hasil edilən neft və qaz ehtiyatları dünya bazarlarına Bakı-Novorossiysk, Bakı-Supsa, Bakı-Tbilisi-Ceyhan, Bakı-Tbilisi-Ərzurum kəmərləri ilə çıxarılır. Bundan əlavə, “Cənub Qaz Dəhlizi” layihəsi çərçivəsində TANAP və TAP qaz kəmərləri də istifadəyə verilib.
Azərbaycanın milli sərvəti olan neftdən gələn gəlirlərin gələcək nəsillər üçün toplanaraq artırılması, bugünkü nəsillərin istifadə etməsi üçün Neft Fondu yaradılıb.
Prezident İlham Əliyev Ulu öndərin neft strategiyasını inkişaf etdirərək 2017-ci il sentyabrın 14-də “Azəri-Çıraq-Günəşli” neft-qaz yatağının 2050-ci ilə qədər işlənməsi haqqında yeni saziş imzalayıb. Dövlət başçısının uğurlu neft siyasətinin nəticəsidir ki, Azərbaycan nefti dövlətimizin qüdrətlənməsinə, xalqımızın rifahının yüksəlməsinə xidmət edir.
Konfransda Mingəçevir Dövlət Universitetinin rektoru Şahin Bayramov “Ümummilli lider Heydər Əliyev neft strategiyasının banisidir”, Milli Məclisin deputatı Aydın Mirzəzadə “Əsrin müqaviləsi”nə aparan yol. Neft strategiyasının uğurları”, MDU-nun elmi işlər üzrə prorektoru Veysəl Əyyubov “Heydər Əliyevin neft strategiyası Azərbaycanın müstəqilliyinə verilən ən böyük töhfədir”, MDU-nun kafedra müdiri Emiliya Hüseynova “Yeni neft strategiyasının ölkə Prezidenti cənab İlham Əliyev tərəfindən uğurla davam etdirilən müasir mərhələsi dövlətimizin qüdrətlənməsinə və vətəndaşlarımızın rifahının yüksəlişinə xidmət edir” məruzələri ilə çıxış ediblər.
İlqar HƏSƏNOV
XQ-nin bölgə müxbiri
.jpg)
