Azərbaycan Hərb Tarixi Muzeyində Vətən müharibəsinin şəhidi əsgər Bilal Xanlar oğlu Qənbərovun anadan olmasının 30-cu ildönümü ilə bağlı “Şərəfli ömrün sonu!” adlı anım mərasimi keçirilib.
Toplantıda şəhidin ailə üzvləri, döyüş yoldaşları, Vətən müharibəsi qaziləri, həmçinin Müdafiə Nazirliyinin idarə və müəssisələrinin nümayəndələri, orta təhsil müəssisələrinin tələbə və müəllim heyəti iştirak ediblər.
Muzeyin rəisi Əzizağa Qənizadə bildirib ki, torpaqlarımızın azadlığı uğrunda canından, qanından keçən şəhidlərimiz and yerimiz, qürurumuz, fəxrimizdir. Minlərlə azərbaycanlı gənc torpaqlarımızın işğaldan azad olunması uğrunda qəhrəmanlıqla vuruşub, adlarını tarixə yazdırıblar: “Onlardan biri də Bilal Xanlar oğlu Qənbərovdur. O, müstəqillik illərində qurulmuş Azərbaycan Ordusunun ən vətənpərvər döyüşçülərindən idi. Sentyabrın 27-də düşmənin təxribatları nəticəsində başlanan İkinci Qarabağ müharibəsi zamanı Ermənistan işğalı altında olan ərazilərin azad edilməsi üçün Azərbaycan Silahlı Qüvvələri tərəfindən Cəbrayılın, Hadrutun, Füzulinin və Şuşanın azadlığı uğrunda gedən döyüşlərdə ön sıralarda vuruşub. Noyabrın 4-də Bilal Qənbərov da Şuşa döyüşləri zamanı 27 yaşında şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq vəzifə borcunu ləyaqətlə və vicdanla yerinə yetirdiyinə görə Azərbaycan Prezidenti İlham Əliyevin müvafiq sərəncamlarına əsasən, Bilal Qənbərov ölümündən sonra “Vətən uğrunda” , “Şuşanın azad olunmasına görə”, “Cəsur döyüşçü” və “Füzulinin azad olunmasına görə” medalları ilə təltif edilib.
Şəhidin ailə üzvləri, döyüş yoldaşları çıxış edərək ürək sözlərini deyib, xatirələrini bölüşüblər.
Mərasimdə Bilal Qənbərova həsr olunmuş “Vətən haqqı” adlı sənədli film nümayiş olunub. Tədbir bədii hissə ilə davam edib.
Yaşasaydı, sentyabrın 29-da Bilal Qənbərov 30 yaşını qeyd edəcəkdi. Şəhidlik zirvəsinə ucalan, əbədi ömür qazanan igid Vətən oğul və qızlarının xatirəsini əziz tutmaq hər birimizin müqəddəs borcudur.
L.QURBANOVA
XQ