Tovuz Rayon İcra Hakimiyyətinin təşkilatçılığı ilə Ümummilli lider Heydər Əliyevin anadan olmasının 100 illik yubileyinə həsr olunmuş “Əsrin müqaviləsi” tarixi zəfərimizə gedən yolun başlanğıcıdır” mövzusunda tədbir keçirilmişdir.
Nizami adına Mədəniyyət evində təşkil olunan tədbirdən əvvəl Ümummilli lider Heydər Əliyevin abidəsi ziyarət olunmuş, önünə gül dəstələri düzülmüşdür.
Dövlət himni səsləndirildikdən sonra “Əsrin müqaviləsi”nə və Azərbaycanın neft sənayəsinin inkişafına həsr edilmiş sənədli film nümayiş etdirilmişdir.
Tədbiri giriş sözü ilə açan Tovuz RİH başçısı Məmməd Məmmədov demişdir ki, 29 il bundan qabaq, 1994-cü il sentyabr ayının 20-də Heydər Əliyevin böyük uzaqgörənliyi nəticəsində Bakıda Azərbaycan və dünyanın 8 müxtəlif ölkəsini təmsil edən 13 məşhur neft şirkəti arasında “Xəzər dənizinin Azərbaycan sektorunda “Azəri”, “Çıraq” və “Günəşli” yataqlarının dərinliklərində yerləşən hissəsinin birgə işlənməsi və hasil olunan neftin pay şəkilində bölüşdürülməsi” haqqında saziş – “Əsrin müqaviləsi” imzalandı. Bu il 100 illik yubileyini qeyd etdiyimiz Ümummilli lider Heydər Əliyevin “Əsrin müqaviləsi”nin bağlanmasında misilsiz xidmətləri vardır.
Xalqın iradəsi, çağırışı və təkidi ilə 1993-cü ildə Heydər Əliyevin hakimiyyətə qaydışı Azərbaycanın siyasi və iqtisadi həyatında taleyüklü dəyişikliklərin başlanğıcını qoydu. Dövlətimizi labüd fəlakətdən xilas edən dahi rəhbər Azərbaycanı siyasi və iqtisadi böhrandan çıxarmaq üçün öz ideyalarını həyata keçirməyə başladı. Ulu öndərin böyük uzaqgörənliklə dediyi bu sözlər gerçəkliyə çevrilir: “Əsrin müqaviləsi” ilə qoyduğumuz təməl XXI əsrdə Azərbaycan xalqının inkişafı, firavan həyatı, müstəqil Azərbaycan dövlətinin suverenliyinin daha da möhkəmlənməsi üçün gözəl imkanlar yaradır. İnanıram ki, XXI əsr müstəqil Azərbaycan dövləti üçün ən xoşbəxt dövr olacaqdır”. Hazırda ölkəmiz Ulu öndərin qeyd etdiyi bu xoşbəxt dövrü yaşamaqdadır.
Daha sonra tədbirdə çıxış edən Milli Məclisin deputatı Arzu Nağıyev, 2 saylı Regional Ekologiya və Təbii Sərvətlər İdarəsinin sektor müdiri Xəqani Qasımov, Azaflı kənd tam orta məktəbin direktoru Adil Əsgərov, İ. Mürşüdov adına Aşağı Quşçu kənd tam orta məktəbin müəllimi Ulduzə Alıyeva milli sərvətlərimizdən müstəqil dövlətimizin və xalqımızın rifahı naminə istifadə olunması, bu məqsədlə xarici investisiyaların cəlb olunması üçün cəsarətli siyasi addımlar atıldığını bildirdilər. Qeyd olundu ki, Azərbaycan ilk dəfə idi ki, altı ölkəni təmsil edən dünyanın məşhur 10 xarici neft şirkəti ilə belə böyük miqyasda saziş imzalayırdı. Bu saziş Xəzər dənizində beynəlxalq əməkdaşlığın əsasını qoydu, xarici sərmayədarların Azərbaycana axınını sürətləndirdi. "Əsrin müqaviləsi" həm də Azərbaycanda yeni neft-qaz kontraktlarının bağlanmasına güclü təkan verdi.
Hamlet QASIMOV,
XQ-nin bölgə müxbiri,
Tovuz rayonu