Azərbaycanın əhalisi 2023-cü ilin əvvəlinə 10 milyon 127 min nəfərdir. Dövlət Statistika Komitəsi bildirir ki, bu rəqəmə Qarabağ erməniləri daxil deyil. Ölkəmizin ərazisi rəsmi məlumatlara görə 86,6 min kvadratkilometrdir və bura Qarabağ ərazisi də daxildir.
Ötən il Azərbaycanda 133,8 milyard manatlıq və ya əvvəlki illə müqayisədə 4,6 faiz çox ümumi daxili məhsul (ÜDM) istehsal olunub. İqtisadiyyatın neft-qaz sektorunda əlavə dəyər 2,7 faiz azalıb, qeyri neft-qaz sektorunda isə 9,1 faiz artıb. Əhalinin hər nəfərinə düşən ÜDM 13 min 292,2 manata bərabər olub.
Cari ilin yanvar-iyul aylarında isə ölkədə 70 milyon 372 min manatlıq və ya əvvəlki ilin eyni dövrü ilə müqayisədə 0,7 faiz çox ÜDM istehsal olunub. İqtisadiyyatın neft-qaz sektorunda əlavə dəyər 2,2 faiz azalıb, qeyri neft-qaz sektorunda isə 3,4 faiz artıb. Bəs Qarabağın iqtisadi göstəriciləri nə ilə fərqlənib?
Qarabağda 120 min erməninin yaşadığı bildirilsə də, onların sayı 40 min nəfəri keçmir və bu barədə dəqiq siyahı da var. Qeyri-rəsmi statistik məlumata görə, 2022-ci ildə orda ÜDM 288,8 milyard erməni dramı (Ermənistan valyutası) təşkil edib ki, bu da ABŞ dolları ilə (orta illik dramın dollara məzənnəsi ilə) 663 milyon dollara bərabərdir. 2022-ci ildə Qarabağın ÜDM-i 2 il əvvəllə müqayisədə 22,4 faiz, bir il əvvəllə müqayisədə isə 12,7 faiz azaldıqdan sonra real ifadədə 12,2 faiz artıb. Rəqəmlərdən göründüyü kimi, İkinci Qarabağ müharibəsindən sonrakı iqtisadi göstəricilər, müharibədən əvvəlki, 2019-cu ildəki göstəricidən çox uzaqdır.
Həmin dövrün iqtisadi göstəriciləri yüksək olmasa da, son illərdəki göstəricilərdən yaxşı idi. Statistikaya görə, 2019-cu ildə ÜDM 713 milyon dollar olub ki, bu göstəricilər belə, hətta Karib və digər Sakit okean adalarının ÜDM göstəricilərindən də aşağıdır.
Dövlət Statistika Komitəsinin məlumatına görə, 2022-ci ildə Azərbaycanın dollar ekvivalentində ÜDM-i 78,7 milyard, 2023-cü ilin birinci yarısında isə 42,37 milyon dollar təşkil edib. Beləliklə, Qarabağ iqtisadiyyatının tam inteqrasiyası şəraitində Azərbaycanın nominal ÜDM-i cəmi 0,8 faiz artacaq. Burada reallığı tam aydın görmək üçün bir müqayisə aparmaq lazım gələcək. Məsələn, 1965-1987-ci illərdə Azərbaycan SSRİ-nin regionlarında iqtisadi və sosial inkişaf göstəriciləri müqayisə edildiyi zaman aydın olur ki, bu region Azərbaycan SSR sənaye istehsalının 2,3 faizini təmin edirdi. Həmin illərdə DQMV-də sənaye istehsalı ilə məşğul olan 15 yeni təsis istifadəyə verilmişdi. Bundan əlavə adambaşına düşən kənd təsərrüfatı məhsullarına görə də öndə idi. Region Azərbaycan SSR-in 5,1 faiz ərazisini əhatə etsə də, ölkədə istehsal olunan ümumi kənd təsərrüfatı məhsullarının 6 faizini təmin edirdi. Burada xüsusilə üzümçülük və şərabçılıq inkişaf etmişdi. Təbii ki, bu iqtisadi göstəricilərin əldə olunmasında Azərbaycan SSR-in digər rayonları ilə qarşılıqlı əlaqələrinin böyük rolu olmuşdur.
Ümumiyyətlə, bölgə aqrar-sənaye mərkəzinə çevrilmişdi və həyat şəraiti digər regionlarla müqayisədə yüksək idi. Ermənilərə qarşı ölkədə hər hansı ayrı-seçkilikdən və ya diskriminasiyadan söz gedə bilməzdi. Sovet dövründə DQMV-də yaşayış səviyyəsi bütün Azərbaycanın orta yaşayış səviyyəsi ilə müqayisədə daha üstün idi. Bununla belə onlar dəfələrdə imkan yaranan kimi (1945, 1965, 1977 və 1988-ci illərdə) Ermənistana birləşdirilməsi məsələsini ortaya atırdılar.
Beləliklə, ermənilərin yad ölkə torpaqlarını mənimsəmə və orada “dövlət” qurma adəti Azərbaycan torpaqları üzərində davam etsə də, onlar istəklərini doğru-düzgün şəkildə həyata keçirə bilmədilər. Qurduqları “respublika”, əsasən, ianələr hesabına yaşayıb. Müxtəlif illərdə Ermənistan Qarabağın büdcə xərclərinin 50-60 faizini maliyyələşdirib. 2022-ci ildə Ermənistandan verilən “büdcə krediti” 176 milyard dram (404 milyon dollar ekvivalenti) təşkil edib ki, bu da Qarabağ büdcəsi xərclərinin demək olar ki 88 faizini təmin edib.
Xarici yardımlar da az olmayıb. ABŞ “DQR”in əsas sponsorlarından və maddi dəstəkçilərindən biri olub. 1998-ci ildən bəri hər il ABŞ-dan bura önəmli miqdarda xarici yardım ayrılır. Bu yardım humanitar məqsədlər üçün, xüsusilə infrastruktur, kənd təsərrüfatı və tibbi layihələrə xərclənib. Xarici investorlar isə sadəcə bölgənin təbii zənginliklərinin istismarı ilə məşğul olub, insanların həyat şəraitinin yüksəlməsinə hər hansı töhfə verməyib. Ermənilərin sosial vəziyyəti isə hər il pisləşib. Müsbətə doğru heç bir dəyişiklik olmayıb. “Müstəqillik” dövründə əvvəlki illərdə qazanılmış bütün uğurlar itirilib. Bəlkə də sovet dövründəki günlərini çox xatırlayıblar.
Qarabağda iqtisadi aktivlik indeksi də azalıb. 2022-ci ilin dekabrında iqtisadi aktivlik indeksi 21 faiz, 2023-cü ilin ilk aylarında isə orta hesabla 25 faiz (2022-ci ildə 18 faiz artımdan sonra) azalıb. İnflyasiya 8,6 faizə qalxıb. Ötən il ticarət dövriyyəsi 832 milon dollar olub. Bunun 496, 5 milyon dolları idxalın, 335 milyon dolları isə ixracın payına düşüb. Əsas ticarət tərəfdaşı isə Ermənistan idi. Burda yenidən bir nüansa da diqqət yetirmək lazımdır. Əslində isə heç bir dünya dövləti (hətta Ermənistan) tərəfindən rəsmi olaraq tanınmadığı üçün “DQR” xarici dövlətlərlə iqtisadi əlaqələr də qura bilmədi. Burda istehsal olunan məhsullar “Made in Armenia” ştampı ilə ixrac olunurdu.
Regiona xarici yatırımlar olsa da, bunlar qeyri-leqal idi və yatırımların gələcəyini qeyri-müəyyən edirdi. Qarşıdakı illərdə “DQR”də fəaliyyət göstərən xarici şirkətlərin nəinki yatırımları batacaq, həmçinin onlar külli miqdarda ziyan çəkəcəklər.
“DQR”dəki ümumi xarici yatırımların 58,6 faizi Rusiyaya aid olmuş və beləliklə Rusiya burdakı ən böyük investora çevrilmişdir. Bu, xüsusilə Rusiya erməniləri ilə bağlı idi. Qalanları Fransa, ABŞ, Almaniya, Niderland və s. ölkələrə məxsus idi.
Azərbaycan Prezidenti İlham Əliyev2020-ci ilin yekunlarına dair videoformatda keçirilən müşavirədə qeyd etmişdir ki, Azərbaycanın işğal olunmuş torpaqlarında qeyri-qanuni fəaliyyət ilə məşğul olmuş şirkətlər hüquqi məsuliyyətə cəlb olunacaqlar. Prezident, həmçinin bildirmişdir ki, həmin şirkətlər Azərbaycana vurduqları ziyanı ödəsələr, beynəlxalq məhkəməyə verilməyə də bilərlər. Beləliklə, ehtimal edə bilərik ki, qarşıdakı illərdə “DQR”də fəaliyyət göstərən xarici şirkətlərin nəinki yatırımları batacaq, həmçinin onlar külli miqdarda ziyan çəkəcəklər.
Bu gün Qarabağ tamamilə yeni reallıqla qarşı-qarşıyadır. Bu yeni reallıq bölgənin müasir sənaye müəssisələrinin və digər sosial-iqtisadi əhəmiyyətli təsislərin qurulması, Azərbaycanın ən inkişaf etmiş regionlarından birinə çevrilməsini nəzərdə tutur. Ermənilər Azərbaycan hakimiyyətini qəbul edərək burada yaradılacaq şəraitdən faydalana biləcəklər. Ermənilər Azərbaycanla müharibəni deyil, iqtisadi əməkdaşlıq etməyin onlara daha faydalı olduğunu anlamalıdırlar. Bunu anlayacaqları gün, həm Qarabağ ermənilərinin, həm də Ermənistanın iqtisadi vəziyyəti və insanlarının həyat şəraiti də yaxşılaşacaqdır.
Ə.PÜNHAN
XQ
Füzuli