Nə xoşdur ki, həmin istiqamətdə ilk addımlar Yevlaxda atıldı
Qarabağın erməni əhalisi bizim vətəndaşlarımızdır. Sadəcə olaraq, erməni millətçiləri, müharibə cinayətkarları, Ermənistanın və Qarabağın “rəhbərləri” o insanları girov götürmüşdülər, onların beyinlərini zəhərləmişdilər... Mən əminəm ki, Qarabağda yaşayan erməni əhalisi tezliklə yaxşılığa doğru dönüşü görəcək. Çünki bizim niyyətimiz sülh, qarşılıqlı anlaşma, qarşılıqlı hörmət əsasında birgə həyat qurmaqdır.
Azərbaycan Respublikasının Prezidenti İlham Əliyevin xalqa müraciətindən
20 sentyabr 2023-cü il
Əvvəla, dövlət başçımızın həmin müraciətinə qulaq asarkən gözümün önündən böyük bir tarix keçdi. Allaha şükür ki, əksər yaşıdlarım kimi, mən də milli tariximiz, adət-ənənələrimiz, mənəvi dəyərlərimiz haqqında az-çox məlumatlıyam. Bilirəm ki, xalqımızın müdrik liderləri, uzaqgörən ağsaqqalları həmişə insanları sülhə, dinc birgəyaşayışa, mehriban qonşuluğa çağırıblar.
Amma, olub keçənləri unutmamaq şərti ilə. Yəni biz ermənilərlə münasibətlərdə Xocalı soyqırımı başda olmaqla, üzləşdiyimiz bütün vəhşiliklərin heç birini unutmasaq da, birgəyaşayış prinsiplərinə yüksək səviyyədə əməl edəcəyik. Çünki, cənab Prezidentin dediyi kimi, bizim erməni xalqı ilə heç bir problemimiz yoxdur, ədavətimiz də yoxdur.
İkinci, Azərbaycan Respublikası Prezidentinin Administrasiyasının dəvəti əsasında 2023-cü il sentyabrın 21-də Yevlax şəhərində keşirilmiş məlum görüşdə Qarabağın erməni sakinləri adından iştirak edən Sergey Martirosyan və David Melkumyan, sözün həqiqi mənasında, erməni xalqının milli tarixinə düşdülər. Çünki yaxın vaxtlarda əldə olunacaq sülh və əməkdaşlıq münasibətlərinə çatmaq üçün (bu prosesi artıq heç kəs əngəlləyə bilməyəcək– İ.M.) ilk addımları məhz onlar atdılar. İndiyədək ermənilərin nəinki siyasətçi, diplomat və ya deputatları, hətta, idmançı, musiqiçi və tələbələri də türk dünyasına düşmən kimi baxırdılar. Sergey Martirosyan və David Melkumyan isə məhz erməni xalqının sabahı naminə öz qüdrətli qonşuları ilə əməkdaşlığa doğru addım atdılar.
Üçüncü, 28 May Müstəqillik Günü münasibətilə hazırladığım yazılardan birində Vaqif Səmədoğlunun “Günün baxtı” şeirinin bu misralarını yada salmışdım: “Günün baxtına bir bax, düz iyirmi əsr ilin, ayın adi günlərindən biri olasan, sonra gəlib tarixdə 9 May kimi qalasan”. Sən demə, şəhərin də bəxti olurmuş. İndi sən şəhərin bəxtinə bax, yüz illər boyu Kür qırağında adi bir Yevlax olasan, sonra Cənubi Qafqaza sülh gətirəcək ilk addımların atıldığı şəhər kimi dünyanın diqqət mərkəzində qalasan. Qərəz...
Prezident İlham Əliyevin sentyabrın 20-də xalqa ünvanladığı müraciətin bəzi detallarının əlamətlərini Yevlax görüşünün nəticələrində də gördük. Məsələn, dövlət başçımız müraciətdə deyirdi ki, bütün haqsızlıqlara baxmayaraq, kriminal Ermənistan rejimi tərəfindən törədilmiş cinayətlərə baxmayaraq, biz erməni xalqını bu cinayətlərdə heç vaxt günahlandırmamışıq. Xocalı soyqırımında, şəhərlərimizin, kəndlərimizin dağıdılmasında, qəbirlərin qazılmasında biz erməni xalqını günahlandırmamışıq. Biz kriminal rejimin ünsürlərini, başda duranlarını ittiham etmişik və biz onları məsuliyyətə cəlb edirik və edəcəyik.
İndi isə Yevlax görüşünün nəticələri barədə verilən rəsmi məlumata diqqət yetirək: “Azərbaycanın Qarabağ bölgəsinin erməni sakinlərinin nümayəndələri sosial və humanitar xarakterli məsələlərin müzakirəsi kontekstində xüsusilə yanacağa ehtiyac duyulduğunu bildiriblər. Eyni zamanda, qida məhsulları olmaqla humanitar yardımın göstərilməsini xahiş ediblər. Görüşün nəticəsi olaraq onların xahişi müsbət qarşılanıb. Xüsusilə bağça və məktəblərin istilik sistemləri, təcili tibbi yardım və yanğınsöndürmə xidmətlərinin ehtiyacları təmin olunmaqla yanacağın tezliklə təchiz edilməsi və humanitar dəstəyin həyata keçirilməsi planlaşdırılır”. Bu isə o deməkdir ki, sülh uzaqda deyil.
Görüşün ertəsi günü isə rəsmi mənbələr xəbər yaydılar ki, sentyabrın 22-də Azərbaycan Respublikasının Fövqəladə Hallar Nazirliyi tərəfindən ölkəmizin Qarabağ bölgəsində yaşayan erməni sakinlərin ehtiyaclarının təmin olunması üçün içərisində müxtəlif ərzaq məhsulları və gigiyenik vasitələr olan 20 tonluq 2 yük avtomobili və 2 çörək dolu avtomobil Xankəndiyə yola salınıb. Həm də bu nəqliyyat vasitələri artıq fəaliyyətdə olan Ağdam –Xankəndi yolu ilə ünvana çatdırılacaq və əhaliyə paylanılacaq. Yəni dünyanın müxtəlif ölkələrindəki anti-Azərbaycan qüvvələrin yaydığı cəfəngiiyyatlara baxmayaraq, rəsmi Bakı öz sülhpərvərliyini növbəti dəfə sübut edir.
Yeri gəlmişkən, Azərbaycan Prezidenti İlham Əliyev ötən ilin oktyabrında Gürcüstanda olarkən, “Qafqaz evi” yaradılması təşəbbüsünü irəli sürmüşdü. Bu təklif Qafqaz xalqları arasında əməkdaşlığın inkişafı və keyfiyyətcə yeni mərhələyə yüksəlməsi, bərəbər yaşayışın yeni modelinin tətbiqini nəzərdə tutur. Ekspertlər yazırlar ki, 44 günlük Vətən müharibəsindən qabaq Prezident Əliyevin Ermənistana çağırışı, işğaldakı torpaqların azad olunmasını tələb etməsi, tarixi Zəfərdən sonra sülhyaratma missiyasına sadiqliyi, erməni mənşəli vətəndaşlarımızın reinteqrasiya istiqamətində fəal addımları fonunda ortaya çıxan mənzərə budur ki, regionda real barışığı təmin edəcək lider yetişib. O lider məhz İlham Əliyevdir.
Oktyabrın 24-də Mçxeta rayonundakı Muxrani sarayında “Qarabağ xanlığının irsi” sərgisi ilə tanışlıqdan sonra Gürcüstanın Baş naziri İrakli Qaribaşvili ilə birlikdə mətbuata bəyanatla çıxış edən Azərbaycan Prezidenti demişdir: “Qarabağ münaqişəsi başa çatandan sonra vaxt gəlib çatıb ki, Azərbaycan və Ermənistan sülh müqaviləsi imzalasınlar. Hər halda, bizim niyyətimiz bundan ibarətdir... Əgər belə olarsa, Cənubi Qafqaza sülh gələcək və eyni zamanda, əməkdaşlıq üçün imkanlar yaranacaqdır. Bu gün, eyni zamanda, söhbət əsnasında Gürcüstan–Azərbaycan–Ermənistan məsləhətləşmələrə başlaması haqqında fikir mübadiləsi apardıq. Əgər Ermənistan tərəfi buna hazırdırsa, biz buna hazırıq”.
Fikrimizcə, dövlət başçımızın “Ermənistan tərəfi buna hazırdırsa?” sualının cavabı Yevlaxda verildi: Ermənistan danışıqlara gələcək. Baş nazir Nikol Paşinyanın son bəyanatları da bunun göstəricisidir. Yəni Cənubi Qafqaz sülhün astanasındadır.
İttifaq MİRZƏBƏYLİ
XQ