Rayonda 10 kiçik su elektrik stansiyası qurulur
İşğaldan azad edilmiş bütün ərazilər kimi, əsrarəngiz təbiəti ilə zəngin olan Kəlbəcər rayonunda da genişmiqyaslı abadlıq-quruculuq işlərinə başlanılıb. Bu müddət ərzində rayonun enerji təminatı ilə bağlı bir sıra işlər görülüb. Artıq bir neçə kiçik su elektrik stansiyaları istifadəyə verilib. Onların arasında “Soyuqbulaq”, “Çıraq-1”, “Çıraq-2” stansiyalarından əlavə, 4,4 meqavatlıq “Kəlbəcər-1”, 6,3 meqavatlıq “Qamışlı” və 3,4 meqavatlıq “Meydan” elektrik stansiyaları da var. Bu onu göstərir ki, Kəlbəcərin zəngin enerji ehtiyatları var. Ölkəmizdə bərpa olunan enerji mənbəyi kimi, ilk növbədə, kiçik su elektrik stansiyalarının tikilməsi və yenidən qurulması prioritet təşkil edir.
Rayonda istismara verilən ilk enerji istehsalı obyekti olan “Kəlbəcər-1” stansiyası müasir standartlar əsasında qurulub. Lev çayı üzərində inşa olunan stansiya “Yaşıl enerji” zonası konsepsiyasına uyğun olaraq, ekoloji cəhətdən təmiz enerji istehsal edir və Azərbaycanın ümumi enerji sisteminə qoşulub. Rəqəmsal qaydada açılıb-qoşulma, intellektual idarəetmə, operativ monitorinq və təhlil aparılması mümkün olan yeni stansiyanın işinə yalnız Kəlbəcərdən deyil, Bakıdakı Baş İdarəetmə Mərkəzindən də nəzarət və idarə etmək əlçatandır. Stansiyaların idarəetmə sistemi tam avtomatlaşdırılıb, xüsusi proqram təminatı ilə rəqəmsallaşdırılıb ki, bu da istehsal olunan elektrik enerjisinin maya dəyərinin daha da aşağı düşməsinə gətirib çıxarır.
Kəlbəcər rayonunun ərazisindən keçən bol sulu Tərtərçay üzərində isə “Soyuqbulaq” kiçik su elektrik stansiyası yenidən qurulub. Ərazini tərk edən düşmən bu stansiyada bütün avadanlıq və yararlı hissələri aparıb, daşınması mümkün olmayan nə varsa məhv edib. İşğaldan azad edilən ərazilərin “Yaşıl enerji” zonasına çevrilməsi ilə bağlı dövlətimizin başçısının tapşırığına uyğun olaraq, stansiyada Avropa istehsalı olan yaşıl sertifikatlı, 2 müasir ekoturbin, generatorlar, idarəetmə və avtomat panellər quraşdırılıb. Stansiyanın enerjisisteminə inteqrasiyası üçün uzunluğu 6 kilometr olan 6 kV-luq kabel xətti çəkilib və eyni zamanda, optik kabel xətti ilə də əlaqələndirilib. Ərazidə fors-major hallar üçün ehtiyat dizel generatoru da quraşdırılıb.
Daha bir stansiya Tərtərçayın sol qolu olan Meydan çayının üzərində qurulub. 3,4 MVt-lıq kiçik su elektrik stansiyası enerjisistemə inteqrasiya olunmaqla məsafədən idarəetməyə imkan verən mərkəzləşmiş SCADA sisteminə qoşulub. Bununla da stansiyanın idarəetmə sistemi avtomatlaşdırılıb, xüsusi proqram təminatı ilə rəqəmsallaşdırılaraq müasir formaya keçirilib. Eləcə də ərazidə fors-major hallar üçün 45 kVA gücündə ehtiyat dizel generatoru quraşdırılıb. Yenidən qurulan “Meydan” kiçik su elektrik stansiyasında il ərzində 10 milyon kilovat-saat elektrik enerjisi istehsal olunacaq.
Bu il ismara verilən stansiyalardan biri də ermənilərin Kəlbəcəri tərk edərkən dağıtdıqları “Qamışlı” kiçik su elektrik stansiyasıdır. Bu stansiya da daxil olmaqla indiyədək azad edilən ərazilərdə tikilən su elektrik stansiyalarının hər birində derivasiya boruları çayın axını ilə paralel quraşdırılıb. Burada boru ilə axan su da yenidən çaya buraxılır. Bütün yerlərdə, o cümlədən “Qamışlı” stansiyasında da su ehtiyatlarından səmərəli istifadə olunması, daşqınların qarşısının alınması və su itkisinə yol verilməməsi üçün çayın məcrasına uyğun idarəolunan suqəbuledicilər tikilib. Eyni zamanda, təbii mühitin, flora və faunanın qorunması da aidiyyəti dövlət qurumları ilə razılaşdırılmış şəkildə xüsusi diqqətdə saxlanılıb.
İki hidroaqreqatdan ibarət “Qamışlı” stansiyasında 110 kilovoltluq yarımstansiya yaradılıb. Burada enerjisistemə tam inteqrasiya olunmaqla məsafədən idarəetməyə imkan verən mərkəzləşmiş SCADA sistemi qurulub. Stansiyada Avropanın aparıcı şirkətlərinin istehsalı olan müasir hidroturbinlər, generatorlar, idarəetmə, rele mühafizəsi və avtomatika panelləri quraşdırılıb.
“Qamışlı” kiçik su elektrik stansiyasında il ərzində 18,5 milyon kilovat-saat ekoloji cəhətdən təmiz yaşıl hidroenerjinin istehsal edilməsi nəzərdə tutulur.
Xatırladaq ki, 2024-cü ilin birinci rübündə Kəlbəcər rayonunda ümumi gücü 75,5 MVt, illik enerji istehsal potensialı 230 milyon kilovat/saat olan 10 kiçik su elektrik stansiyası mövcud olacaq. Hazırda Kəlbəcər rayonunda 5 yerdə ümumi gücü 48,3 meqavat olan kiçik su elektrik stansiyalarının tikintisi davam edir.
P.ƏFƏNDİYEV
XQ