“Şəhidlər ölməz, Vətən bölünməz” deyən millətimizin sarsılmaz iradəsi var. Biz bu gün burada rahat və təhlükəsiz yaşaya biliriksə, bunda igid qardaş və bacılarımızın rolu böyükdür. Ona görə Vətən uğrunda düşünmədən canını verən şəhidlərimizi, qazilərimizi, qəhrəmanlarımızı tanımalı və tanıtmalıyıq. Bu, bizim insan olaraq ən birinci vəzifəmizdir.
Bu məqsədlə Sabunçu Gənclər evində şəhid komandir Vüqar Əsədov, baş leytenant Məhəmməd Məmmədov, əsgər Anar Vəliyev, ilk könüllü snayper qız döyüşçü Vəfadar Dəmirçioğlu (Vəfa Mansurova) anılıb və qəhrəmanlıqlarından danışılıb.
Əvvəlcə dövlət himni səsləndirilib, şəhidlərin xatirəsi bir dəqiqəlik sükutla yad edilib. Sonra Qazax Xeyriyyə Cəmiyyətinin sədri, professor İlham Pirməmmədov torpaqlarımızın bütövlüyü uğrunda canlarından keçən şəhidlərimizə, şəhid ailələrinə və qazilərimizə göstərilən dövlət qayğısından söhbət açıb. Onların adlarının Azərbaycan tarixinin qəhrəmanlıq səhifəsinə əbədi yazıldığını söyləyən natiq şəhidlərin xatirəsinin heç zaman unudulmayacağını vurğulayıb.
Tədbirdə şəhidlərin ailə üzvləri və dostları çıxış edərək onlar haqqında danışmağın çox çətin, amma qürurlu olduğunu, onlarla fəxr etdiklərini deyiblər. Şəhidlərin qəhrəmanlıqları yada salınıb, yaşadıqları xoş anlardan söhbət açılıb.
Gənc şair Elmar Sahib çıxışında bildirib ki, qoçaqlığı və sadiqliyi ilə seçilən şəhid komandir Əsədov Vüqar Habil oğlu 1974-cü il iyunun 29-da Qaradağ rayonunda dünyaya gəlib. Orta məktəbi bitirdikdən sonra 1992-ci ildə Neft Akademiyasına (keçmiş Azərbaycan Neft və Kimya İnstitutu) qəbul olub. Müharibə başlayanda təhsilini yarımçıq qoyub könüllü olaraq cəbhəyə yollanıb və Füzuli uğrunda gedən döyüşlərdə komandir olaraq fəaliyyətə başlayıb. Müharibənin səngidiyi vaxtda onu məzuniyyətə göndərirlər. Gəlişindən iki-üç gün keçməmiş yenidən hərbi əməliyyatların başlandığını eşidir və heç kimə bir kəlmə demədən evdən döyüşə yollanır. Cəbhə xəttində cəngavər kimi savaşır və öz əsgərlərilə bərabər mühasirəyə düşür. Yoldaşlarını xilas etmək üçün qorxmadan düşmənin üstünə şığıyır və 4 güllə yarası alır. Vüqarın ağır yaralandığını fürsət bilən ermənilər onu əsir götürürlər. Həmin vaxt əsirlikdə olan azərbaycanlı həkimin köməyi ilə yaraları təmizlənib, bağlanılır. Vüqar oyananda yaralarını düşmənin sarıdığını düşünüb çox qəzəblənir və bütün sarğıları açır. Nəticədə qanaxmadan dünyasını dəyişən Vüqarı öz əsgəri Hadrudda dəfn edir.
Şəhid baş leytenantın anası Yaqut Məmmədova çıxışında qeyd edib ki, Məmmədov Məhəmməd Zakir oğlu 1994-cü il yanvarın 27-də Qazax rayonunun Alpout kəndində anadan olub. Orta məktəbi bitirdikdən sonra Bakı Dövlət Universitetinin (BDU) Qazax filialında “Tarix-coğrafiya müəllimliyi” üzrə ali təhsil alıb. Universiteti bitirdikdən sonra Azərbaycan Silahlı Qüvvələrində hərbi xidmətə başlayıb. 2017-ci ildən eyni hərbi birləşmənin sıralarında zabit və taqım komandiri olaraq xidmət edib. Qorxmazlığı ilə seçilən, Azərbaycan Ordusunun leytenantı Məhəmməd Məmmədov 44 günlük Vətən müharibəsində iştirak edib, 2020-ci il sentyabrın 27-də Tərtər rayonunun Suqovuşan qəsəbəsinin azadlığı uğrunda gedən döyüşlərdə savaşıb. Qızğın döyüşlərdə yaralanan Məhəmməd xəstəxanaya getməkdən imtina edib, yenidən əsgərlərinin yanına qayıdıb. Onların qayğısını çəkən komandir savaşlarda özü irəli atılıb, böyük igidliklər göstərib. Oktyabrın 6-da Ağdərə istiqamətində qanlı döyüşlər zamanı əsgəri Anar Vəliyevlə mühasirəyə düşərək şəhidlik zirvəsinə ucalıb. O, anadan olduğu Alpout kəndində dəfn olunub. Müzəffər Ali Baş Komandan İlham Əliyevin sərəncamları ilə ölümündən sonra “Vətən uğrunda”, “Laçının azad olunmasına görə” və “Suqovuşanın azad olunmasına görə” medalları ilə təltif edilib.
Müstəqil həyata yenicə göz açan 18 yaşlı şəhid əsgərin anası Fazilə Vəliyeva vurğulayıb ki, oğlu Vəliyev Anar Həmzə oğlu 21 iyul 2002-ci ildə Qazax rayonunun Orta Salahlı kəndində anadan olub. Orta məktəbi bitirdikdən sonra həqiqi hərbi xidmətə çağırılıb. Qəhrəmanlıqda heç kimdən geri qalmayan, fədakar döyüşçü torpaqlarımızın ərazi bütövlüyü uğrunda başlayan 44 günlük Vətən müharibəsində iştirak edib. Laçın və Suqovuşan döyüşlərində şücaət göstərib və oktyabrın 6-da Ağdərə istiqamətində komandiri ilə birgə mühasirəyə düşərək şəhadətə yüksəlib. O, yaşadığı Orta Salahlı kəndində torpağa tapşırılıb. Prezident İlham Əliyevin sərəncamları ilə ölümündən sonra “Vətən uğrunda”, “Laçının azad olunmasına görə” və “Suqovuşanın azad olunmasına görə” medallarına layiq görülüb.
Zərəngiz Dəmirçi Qayalı bacısı haqqında danışarkən deyib ki, Qazax–Ağstafa bölgəsinin ilk və yeganə könüllü snayper qız döyüşçüsü Mansurova Vəfa Dəmirçi qızı 23 iyul 1966-cı ildə Qazax rayonunun Daş Salahlı kəndində anadan olub. Orta məktəbi bitirəndən sonra sənədlərini BDU-nun tarix fakültəsinə verib. Tarixçi olmaq istəyən Vəfa, öz tarixini yazıb. Vətənin səmasını qara buludlar alanda ehtiyatda olan zabit atasının silahını götürüb cəbhəyə yollanır. Atasından silahla davranmağın, hədəfə sərrast nişan almağın sirlərini hələ yeniyetmə çağlarında öyrənmişdi.
Vəfa 1992–1995-ci illərdə “Avey”, “Üçgül”, “Satılmış” mövqelərində vuruşub. Qazax rayon 707 nömrəli hərbi hissənin üçüncü batalyonunun birinci bölüyünün snayperi qız döyüşçüsü olub. Lakin onu özünün razılığı ilə Mansurov Vəfadar Dəmirçi oğlu kimi qeydiyyata alıblar. Çünki qızların hərbi xidmətinə icazə verilmirdi. Xalq içində və əsgərlər arasında ona Vəfa Dəmirçioğlu deyirdilər.
Bu igid, cəngavər qız ayıq-sayıqlığı ilə seçilib, fədakarlıqları ilə ad qazanıb. Silah-sursat alınmasında, səngər qazılmasında, kəndin müdafiəsinin təşkilində əvəzsiz xidmətləri olub. Xalqın təkidli tələbi ilə Ulu öndər Heydər Əliyevin ikinci dəfə hakimiyyətə qayıdışından sonra atəşkəsə nail olunur. Bir müddət sonra Vəfa evlərinə qayıdır, amma vaxtaşırı səngərlərə baş çəkir, əsgər dostlarını ziyarət edirdi. Namərd düşmənin savaşdan sonra da atəşkəsi pozması nəticəsində yanında mərmi partlamasından beyin zədəsi alır, amma bunu bildirmir, döyüş yoldaşları və ailəsindən gizlədir. Bu zədədən 6 ay sonra 1998-ci il aprelin 25-də dünyasını dəyişir. Ailəsi onu mənsub olduğu Qayalı qəbiristanlığında dəfn edir. Qəhrəman qızın xatirəsi qəlblərdə daim yaşayır.
Mərasimin sonunda şeirlər səsləndirilib və videoçarxlar göstərilib.
A.İLHAMQIZI
XQ