Hörmətli oxucular! Biz “Xalq qəzeti” olaraq sizə dünya tarixinin ən qüdrətli imperiyalarından biri olan Osmanlının ilk iki qurucusu – Osman və Orxan Qazi barədə ötən nömrələrimizdə məlumat vermişik.
Bu dəfə 27 illik hakimiyyəti dönəmində Osmanlı torpaqlarını 96 mindən 500 min kvadrat kilometrə çatdıran, faktiki olaraq ölkəsinin hüdudlarını Anadoludan Rumelinə qədər genişləndirən, gənc Osmanlı dövlətini uğurlu idarəçilik sayəsində daha da gücləndirən I Muradın (1326-1389-cu illər) həyatı və fəaliyyəti barədə söz açacağıq. Qeyd edək ki, o, Osmanlı tarixində Murad Xudavəndiyar (Allahın dostu-red) kimi tanınaraq anılır.
Muradın cəmi 12 yaşı olanda atası Orxan bəy İzmitin fəthinə çıxmazdan öncə onu Bursa sancaqbəyi təyin edib. Və yeniyetmə Murad himayədarı böyük sərkərdə Lələ Şahin ağa ilə birlikdə Bursaya göndərilib. Burada o, ağlı, hünəri və qeyrəti ilə ilk gündən xalq tərəfindən sevilməyə başlayıb.
1357-ci ildə Rumeli fatehi kimi tanınan qardaşı Süleyman paşa vəfat edib və bu ərazinin idarəçiliyi də I Murada tapşırılıb. O, burada olduğu beş il ərzində həm ordusunu qüvvətləndirib, həm də əhalinin maddi rifahını yaxşılaşdırmağa çalışıb.
1361-ci ilin yazında şahzadə Murad əmrindəki Rumeli hərbi birlikləri ilə birlikdə Ədirnəyə hücuma keçib. Şəhərin 55 kilometr şərqində qərargah qurub və Şahin Paşa idarəsindəki ordunu qala üzərinə göndərib. Ədirnə təkfuru Sazlıdərə istiqamətində türklərin önünü kəsməyə çalışsa da, məğlub olaraq geri çəkilib və gecə vaxtı döyüş meydanından qaçıb.
1361-ci il mayın 5-də Ədirnə əhalisi şəhəri Osmanlı birliklərinə təslim edib. Şahzadə Murad hərbi dəstələrin başında Qum qalası qapısından şəhərə daxil olub. Lakin burada çox qalmayıb Şahin Paşa ilə birlikdə Bolqarıstan çarlığına aid Plovdiv bölgəsinə yeni səfərə çıxıb. Ancaq burada olarkən Bursa qazısı Çandarlı Qara Xəlil Əfəndidən atasının vəfatı xəbərini alıb. 1362-ci ildə Osmanlı taxt-tacına sahib olub. Ədirnəni dövlətinin paytaxtına çevirib. Roma papası I Muradın dövlətinin sərhədlərini genişəndirməsindən narahat olub və 1366-cı ildə səlibçilər Amadey VI Savoyskinin rəhbərliyi ilə türklərin əleyhinə yürüşə çıxıblar. Onlar Qallipoli yarımadasını ələ keçiriblər, lakin bir il keçməmiş türklər oranı yenidən geri qaytardılar.
I Muradın həyatı at belində, ağır döyüşlərdə keçirdi. O, 1371-ci ildə Maritsa çayı üzərindəki döyüşdə serb knyazlarını darmadağın edib və Makedoniya şəhərləri olan Drama, Kjavala və Sereni ələ keçirib. Bundan sonra Samaovoda bolqar və serblərin birləşmiş ordularını məğlub edib. Serb və bolqar knyazlarının çoxu I Murada tabe olaraq onun vassalına çevriliblər.
1380-cı illərdə I Murad Qərbə doğru yürüşlərini davam etdirib. 1385-ci ildə bolqarlar Sofiya türklərə təslim olub. Bu zaman Tokat tərəfdən Qaraman oğullarının birgə qoşunları hücum etdiyini eşidib. 1386-cı ildə Konya ətrafında rəqib qoşunları darmadağın edilib. 1389-cu ildə Murad oğlu Bəyazidlə Kosovo yaxınlığındakı döyüşdə şimali serb knyazları üzərində qələbə qazanıb. Lakin 63 yaşlı hökmdar bu ağır döyüşdə həlak olub. Şair Əhmədinin yazdığı "Qəzanamə"yə görə, bir neçə adamıyla birlikdə döyüş meydanını gəzən Sultan Murad, cəsədlər arasında gizlənən Miloş Kobiloviç tərəfindən xəncərlə yaralandı və bir müddət sonra vəfat etdi.
Sultan Muradın yaralandığı və öldüyü yerə Hüdavəndigar Məşhədi adı verilən türbə inşa olundu. I Murad ilk sultan ləqəbi alan Osmanlı hökmdarı sayılır. 1383-cü ildə onun adı sikkələrdə artıq sultan kimi qeyd edilib. O, Osmanlını güclü bir dövlətə çevirə bilib.
I Muradın iqtidarı dönəmində ənənəvi səlcuq idarəçiliyi tədricən Bizans və Misir məmlüklük qanunları ilə əvəz olunub. Muradın hakimiyyətinin erkən illərində təyin etdiyi Xəlil paşa 1387-ci ildə dünyasını dəyişənədək bu vəzifəni uğurla yerinə yetirib və xalq tərəfindən sevilərək Böyük vəzir adlandırılıb.
I Muradın dövründə müharibələr zamanı əldə edilən hərbi qənimətin beşdə biri xəzinəyə ayrılırdı ki, bu da dövlətin əsas gəlir mənbəyi sayılırdı. Bu vəsait hesabına nizami ordu saxlamaq, qalalar və saraylar inşa etmək, məscid və minarələr ucaltmaq mümkün olmuşdu.
Böyük vəzir Xəlil paşanın məsləhəti ilə, təxminən, 1370-ci illərdə yeniçərlər korpusu yaradıldı. Onlar əvvəlcə hökmdarın cangüdəni vəzifəsini yerinə yetirirdilər. Sonradan ordunun elit hissəsinə çevrildilər.
I Murad hamisi Lələ Şahin paşanı Rumelidə ilk bəylərbəyi təyin etmişdi. Bununla da Avropa ərazisində ilk Osmanlı dövləti qurulmuşdur.
Məsaim ABDULLAYEV, “Xalq qəzeti”