Özbəkistan Respublikası Prezidenti yanında Milli Sosial Müdafiə Agentliyinin direktoru Mansurbek Olloyerovun başçılıq etdiyi nümayəndə heyəti ölkəmizin qonağıdır.
Sonra Əmək və Əhalinin Sosial Müdafiəsi Nazirliyinin tabeliyindəki DOST Agentliyində nümayəndə heyəti ilə görüş olub. Görüşdən əvvəl qonaqlar 1 saylı DOST Mərkəzi, burada əhaliyə göstərilən xidmətlərlə tanış olublar. Onlar üçün DOST konsepsiyasına, nazirliyin innovativ iş təcrübələrinə, elektron sistemlərinə dair təqdimatlar edilib.
Özbəkistan nümayəndə heyəti ilə görüşdə əmək və əhalinin sosial müdafiəsi naziri Sahil Babayev ölkələrimiz arasında qədim tarixə malik əlaqələrin olduğunu, Azərbaycan və Özbəkistan dövlət başçılarının səyləri ilə bu əlaqələrin daim inkişaf edərək genişləndiyini, beynəlxalq təşkilatlar çərçivəsində də iki ölkə arasında sıx əməkdaşlığın həyata keçirildiyini vurğulayıb.
Ötən dövrdə imzalanan əməkdaşlıq sənədlərinin əlaqələrin inkişafında mühüm önəmi qeyd edilib. İki ölkə arasında əlaqələrin, qarşılıqlı faydalı əməkdaşlığın sosial sahəni də əhatə etdiyi bildirilib.
Nümayəndə heyətinə Azərbaycanda əmək və məşğulluq, sosial müdafiə sahələrində son illər aparılan islahatlar barədə ətraflı məlumat verilib. Sosial sahədə innovativ həllərin geniş tətbiqi istiqamətində görülən işlər, DOST konsepsiyası, proaktiv xidmət mexanizmləri diqqətə çatdırılıb.
M.Olloyerov ölkələr arasında ikitərəfli əlaqələrinin daim genişlənməkdə olduğunu və sosial əməkdaşlığın inkişaf etdirilməsinin, sosial islahatlar prosesində təcrübə mübadilələrinin əhəmiyyətini vurğulayıb.
Nümayəndə heyətinin üzvləri agentliyin direktorunun birinci müavini xanım Şahnoza Mirziyoyeva və direktorun müavini Muxtorxon Taşxodjayev, həmçinin Özbəkistanın “Zamin” Fondunun icraiyyə komitəsinin rəhbəri Tamila Əliyeva da görüşdə iştirak edib.
Görüşdə sosial müdafiə, sosial xidmətlər, habelə bu sahələrdə innovativ həllərin, elektron texnologiyaların tətbiqi və s. üzrə gələcək əməkdaşlığa dair fikir mübadiləsi aparılıb. Qonaqlar səfər çərçivəsində DOST İnklüziv İnkişaf və Yaradıcılıq Mərkəzi, burada sosial cəhətdən həssas qrupların yaradıcı potensialının inkişafı üçün yaradılan şəraitlə, aparılan işlərlə də tanış olublar.
* * *
Özbəkistanın nümayəndə heyəti 5 saylı DOST Mərkəzi ilə tanış olub. Mərkəzdə qonaqlarla görüşdə Əmək və əhalinin sosial müdafiəsi nazirinin müavini Hidayət Abdullayev ölkəmizdəki sosial xidmət və reabilitasiya sistemi, bu sahələrdə aparılan islahatlar barədə məlumat verib. Görüşdə qeyd olunan sahələrdə təcrübə mübadilələrinin əhəmiyyəti vurğulanıb.
Nümayəndə heyəti üçün Sosial Xidmətlər Agentliyi (SXA), Dövlət Tibbi-Sosial Ekspertiza və Reabilitasiya Agentliyi, Əmək Bazarı və Sosial Müdafiə Məsələləri üzrə Milli Observatoriyanın fəaliyyətinə dair təqdimatlar edilib.
Qonaqlar səfər çərçivəsində SXA-nin paytaxtın Nərimanov rayonundakı İxtisaslaşmış Sosial Xidmət Mərkəzi, Pirallahı rayonundakı 18 yaşınadək əlilliyi müəyyən edilmiş şəxslər üçün yeni Günərzi qayğı mərkəzi və bu təbəqədən olan uşaqlar üçün 1 saylı Sosial xidmət müəssisəsində, Dövlət Tibbi Sosial Ekspertiza və Reabilitasiya Agentliyinin Şağan Reabilitasiya Pansionatında olublar.
Nümayəndə heyətinə həmin müəssisələrin fəaliyyəti, həssas əhali qruplarına, əlilliyi olan şəxslərə göstərilən reabilitasiya xidmətləri barədə məlumat verilib. “Birgə və Sağlam” İB Autizm Mərkəzində olan qonaqlar həmçinin Sosial Xidmətlər Agentliyinin sosial işçilərinin həssas qruplara aid uşaqların ailələrinə səfərlər edərək qiymətləndirmə aparması prosesi ilə yaxından tanış olublar.
Zərifə HÜSEYNOVA, “Xalq qəzeti”
