Heydər Əliyev Fondu və Mədəniyyət Nazirliyinin təşkilatçılığı ilə Azərbaycanın mədəniyyət paytaxtı Şuşa şəhərində “Xarıbülbül” Beynəlxalq Musiqi Festivalı keçirilir. Artıq üçüncü ildir ki, Türk dünyasının nəbzi özünün builki mədəniyyət paytaxtında – Şuşada döyünür.
Möhtəşəm Zəfərdən sonra Turan ellərinin qürur və fəxarət qalasına çevrilmiş doğma Şuşada milli musiqimiz yenidən bütün dünyaya pərvazlanacaq, “nə mutlu türküm” deyən hər kəsin qəlbini riqqətə gətirəcək. Mayın 9-dan 12-dək davam edəcək “Xarıbülbül” Beynəlxalq Musiqi Festivalının təşəbbüskarları və təşkilatçıları bu nəcib və möhtəşəm missiyanın icraçıları yenə Heydər Əliyev Fondu və Mədəniyyət Nazirliyidir.
Dünən Şuşa şəhərində start götürən “Xarıbülbül” Beynəlxalq Musiqi Festivalında Azərbaycanla yanaşı, Türkiyə, Qazaxıstan, Qırğızıstan, Macarıstan, Moldova Respublikasının Qaqauziya Muxtar Ərazi Qurumu (Qaqauz Yeri), Özbəkistan, eləcə də Özbəkistanın Qaraqalpaqıstan Muxtar Respublikası, Rusiya Federasiyasının Altay, Xakasiya, Saxa (Yakutiya), Tatarıstan, Tıva respublikaları, Şimali Kipr Türk Cümhuriyyəti, Türkmənistan təmsil olunur.
Təşkilat komitəsindən aldığımız məlumata görə, 3 gün davam edəcək beynəlxalq festivalın proqramı müxtəlif musiqi janrlarında konsert proqramları, rəngarəng sərgilər, eləcə də müxtəlif təqdimatlarla zəngindir. Festivalın proqramına uyğun olaraq dünən səhər saatlarından tamaşaların, iştirakçı ölkələrin sənətkarlıq nümunələrinin və milli mətbəxinin təqdimatı olub. “Qarabağ” otelinin qarşısında təşkil olunan tədbirdə 6 türk dövlətinin mətbəx və sənətkarlıq nümunələri sərgilənir.
Dövlət rəsmilərinin, respublikanın tanınmış mədəniyyət, incəsənət və elm xadimlərinin ziyarət etdikləri təqdimat hər kəsdə xoş təəssürat yaradıb. Əməkdar artist Emil Əfrasiyab Şuşada ilk dəfə olmaqdan məmnunluq duyduğunu ifadə edib:
– İlk dəfədir ki, Azərbaycanın dilbər guşəsi, mədəniyyət paytaxtımız Şuşadayam. Unudulmaz hislər keçirirəm, sanki, yuxudayam. Bu günləri bizlərə, Azərbaycan xalqına yaşatdığı üçün Prezident İlham Əliyevə dərin təşəkkürümü bildirirəm. Bu, çox önəmli, unudulmaz günlərdir. “Heydər Əliyev İli”ndə təşkil olunan budəfəki festival olduqca əlamətdardır. Belə möhtəşəm konsertdə iştirak etmək biz musiqiçilər üçün böyük şərəfdir.
Şuşaya dördüncü dəfədir gəldiyini söyləyən Xalq artisti Ənvər Sadıqov hamı kimi gözəl əhval-ruhiyyədə olduğunu söyləyib:
– Hər dəfə elə bilirəm ki, bu müqəddəs torpağa ilk dəfə ayaq basıram. Bu Qələbəni bizlərə yaşadan Müzəffər Ali Baş Komandana və rəşadətli Ordumuza minnətdarıq. Qarabağın azadlığı uğrunda şəhid olanlara Allahdan rəhmət diləyirik və xalqımız heç vaxt onları unutmayacaq. İnanıram ki, Zəfərimiz əbədi olacaq. Cıdır düzünə ilk dəfə qalxanda keçirdiyim hisləri sözlə ifadə edə bilmirəm. Şuşada olmağın özü elə bir duyğudur ki, gərək onu yaşayasan, hiss edəsən. Dünyanın bir çox ölkələrində Azərbaycan musiqisini təbliğ etmişik, tanıtmışıq, lakin Şuşada konsert vermək, çıxış etmək başqa bir aləmdir. Çox qürurluyam ki, bu gün Şuşadayam, belə möhtəşəm bir konsertdə iştirak edirəm.
Türkiyəli aşpaz Ahmet Yetimova da Azərbaycanda olmaqdan qürur hissi keçirdiyini deyib:
– Şuşaya gəldikdən sonra çox duyğulandım. Azərbaycan bizim ana Vətənimizdir. Bu torpaqların işğaldan azad olunması bizlərə də qürur hissi yaşatdı. Azərbaycana ilk dəfədir gəlirəm. Şuşanı bizim Qara dəniz bölgəsi ilə müqayisə edirəm. İnanırıq ki, Qarabağın çox böyük gələcəyi var. Tədbir başlayandan müşahidə edirəm ki, gələn hər kəs gözəl əhval-ruhiyyədədir. Türk xalqlarının təamlarının və sənətkarlıq məhsullarının festival çərçivəsində nümayiş olunması bir ayrı gözəllikdir.
Sonra Xan qızı Natəvanın evinin həyətində “Xarıbülbül” Beynəlxalq Musiqi Festivalı çərçivəsində Şuşa Dövlət Musiqili Dram Teatrının hazırladığı “Dəli Domrul” tamaşasının premyerası olub. Bu tamaşa Altay Məmmədovun “Kitabi-Dədə Qorqud” dastanının “Duxa Qoca oğlu Dəli Domrulun boyu” əsasında qələmə aldığı eyniadlı pyes əsasında hazırlanıb. Meydan üslubunda səhnələşdirilmiş tamaşada dünyanın faniliyi, məhəbbətin ucalığı ön plana çəkilir. Tamaşanın quruluşçu rejissoru Əməkdar artist Loğman Kərimov, rəssamı Valeh Məmmədov, rejissor assistenti Zəhra Salayeva, musiqi tərtibatçısı Ağasəlim Feyzullayevdir.
Qeyd edək ki, festival günlərində müxtəlif məkanlarda “Bayraq”, “Qəhrəmanlıq”, “Qarabağ məclisi”, “Poeziya”, “Dədə Qorqud”, “Dərvişlər”, “Molla Nəsrəddin” mövzularında guşələr də yaradılıb. Bu guşələrdə müxtəlif bədii təqdimatlar, tamaşalar göstəriləcək. Bunlaradan əlavə, Cıdır düzü, Üzeyir Hacıbəylinin heykəlinin qarşısı, Bülbülün ev-muzeyi və Şuşanın digər məkanlarında müxtəlif konsert proqramları, sərgilər və film nümayişləri olacaq.
Oxucularımızın nəzərinə çatdıraq ki, keçən il martın 31-də Türkiyənin Bursa şəhərində TÜRKSOY-a üzv ölkələrin mədəniyyət nazirlərinin Daimi Şurasının növbədənkənar iclasında Azərbaycanın mədəniyyət paytaxtı Şuşa şəhəri 2023-cü il üçün Türk dünyasının mədəniyyət paytaxtı elan edilib. Həmin il dekabrın 6-da Prezident İlham Əliyev bununla bağlı müvafiq sərəncam imzalayıb.
Builki “Xarıbülbül” Beynəlxalq Musiqi Festivalında TÜRKSOY-un üzvü olan ölkələrin təmsilçiləri, regionun türkdilli xalqlarının milli yaradıcılıq kollektivləri iştirak edirlər. “Xarıbülbül” Beynəlxalq Musiqi Festivalının ardınca, mayın 12-də “Şuşa Türk dünyasının mədəniyyət paytaxtı – 2023” tədbirinin rəsmi açılış mərasimi olacaq.
Beləliklə, xalqımız üçün yüksək mədəni-mənəvi dəyər kəsb edən, Türk dünyasının birlik və həmrəyliyinin rəmzinə çevrilən Şuşa türksoylu xalqlar arasında qarşılıqlı əməkdaşlığın, səmimi dostluğun perspektivlərinin daha da genişləndirilməsi işinə öz töhfəsini verəcəkdir.
“Xalq qəzeti”