Dövlətimizin başçısı İlham Əliyevin Türkiyə Prezidenti Rəcəb Tayyib Ərdoğanın dəvəti ilə İstanbula işgüzar səfəri bir daha göstərdi ki, iki qardaş ölkə arasında dostluq və qardaşlıq münasibətləri tarixinin ən güclü mərhələsindədir. Türkiyə–Azərbaycan münasibətləri prezidentlər İlham Əliyevin və Rəcəb Tayyib Ərdoğanın hakimiyyətləri zamanı daha da inkişaf edib və strateji müttəfiqlik səviyyəsinə yüksəlib.

Hər iki ölkənin dövlət və hökumət başçılarının, eləcə də siyasi, iqtisa­di, ticarət, elm, təhsil, mədəniyyət və digər sahələr üzrə aidiyyəti qurumla­rın rəhbərlərinin qarşılıqlı səfərləri isə əməkdaşlığın inkişafında əhəmiyyətli rol oynayıb.

Prezident İlham Əliyev səfər çər­çivəsində İstanbulda keçirilən “TEK­NOFEST” aerokosmik və texnologiya festivalındakı çıxışında bütün bunlar barədə ətraflı bəhs edib. Dövlətimizin başçısı nitqində Türkiyənin son 20 il ərzində böyük və şərəfli yol keçdiyini, Cümhurbaşqanı Rəcəb Tayyib Ərdo­ğanın liderliyi ilə qardaş ölkənin dünya çapında söz sahibinə çevrildiyini, böl­gəmizdə sülhün, sabitliyin, təhlükəsiz­liyin qarantı olduğunu diqqətə çatdırıb: “Türkiyə böyük Türk dünyasının birləş­məsi işində çox böyük rol oynadı. Ötən ay türk dövlətlərinin Ankarada keçiril­miş Zirvə toplantısında da bütün türk dövlətləri əziz qardaşıma öz dəstəyini, öz hörmətini və bizim ümumi həmrəyli­yimizi bildirmişdir. Türk dünyasının bö­yük coğrafiyası, böyük potensialı, bö­yük təbii qaynaqları, böyük hərbi gücü var. Türk dünyasının birləşməsində Rəcəb Tayyib Ərdoğanın Türk dünyası qarşısında tarixi xidmətləri vardır”.

Azərbaycan lideri çıxışında daha sonra Türkiyənin artıq Avrasiyanın ti­carət, enerji, nəqliyyat və siyasi mərkə­zi kimi tanındığını, bu dövlətin önəmi­nin, rolunun getdikcə artdığını, dinamik inkişafda olan sənayesinin isə həm özünü, həm də müttəfiqlərini gücləndir­diyini vurğulayıb. 

“TEKNOFEST” festivalına gəldikdə isə qeyd edək ki, bu tədbir çərçivəsin­də keçirilən texnoloji yarışlar öz arzu­larını reallığa çevirmək istəyən gənc­lərin layihələrinin təqdimatı üçün ideal platformadır. Məhz bunun nəticəsidir ki, belə bir möhtəşəm festivalın iştirak­çılarının sayı ildən-ilə sürətlə artır. Belə ki, “TEKNOFEST”in ilk dəfə təşkil olun­duğu 2018-ci ildə tədbirə 4 min 333 komanda və 20 min iştirakçı qatılmış­dısa, bu il komandaların sayı 333 min­dən, iştirakçıların sayı isə 1 milyondan çoxdur. 

Dünyanın bir nömrəli aviasiya, kos­mik və texnoloji festivalı kimi nüfuz qa­zanan “TEKNOFEST” artıq öz sahəsin­də bir markaya çevrilib. Texnologiyaya, müdafiə sənayesinə, elmə marağı olan gənclərin bir araya gəldikləri bu tədbir keçən il Bakıda keçirilib. 

“TEKNOFEST Azərbaycan” festiva­lını 300 minə yaxın insan ziyarət edib. Festival çərçivəsində üç beynəlxalq tədbir və səkkiz texnoloji müsabiqə təşkil olunub. Həmin müsabiqələrdə 5 mindən çox gəncin formalaşdırdığı 1000-dən çox komanda yarışıb.

Cəmi 4 milyon mükafat və dəstək məbləği ilə başlayan proses artıq 44 milyon lirəyə çatıb. Rekordların və ilklərin festivalı olan “TEKNOFEST”in qarşıdakı dövrdə uğur səviyyəsinin daha da yüksələcəyinə böyük əminlik yaranıb.

Yeri gəlmişkən, “TEKNOFEST”in qurucusu Selçuk Bayraktar Azərbay­canda, o cümlədən, azad edilmiş tor­paqlarda, Şuşada dəfələrlə olub. Son gəlişi–aprelin 3-də respublikamıza səfəri zamanı isə ölkəmizdə “Bayraktar” mərkəzinin yaradılması haqqında razılı­ğa gəlinib. Yaxın gələcəkdə bu mərkə­zin nəzdində təhsil, xidmət, istehsal sahələrinin qurulacağı da qərara alınıb. 

Türkiyə Prezidenti Rəcəb Tayyib Ərdoğan festivalda çıxış edərək Azər­baycanla qardaşlıq münasibətlərinə də bir daha toxunub. Kahramanmaraşda təməli qoyulan evlərə görə Prezident İlham Əliyevə təşəkkürünü bildirən Cümhurbaşqanı deyib: “Kahramanma­raşda təməlini bir az əvvəl birlikdə qoy­duğumuz evlər üçün İlham qardaşıma da çox təşəkkür edirəm. Azərbaycan dövləti və xalqı bu müddətdə dostlu­ğun və qardaşlığın nə demək olduğunu göstərdi”.

Yeri gəlmişkən, Türkiyə Prezidenti çıxışında Qara dənizdə çıxarılan təbii qazın istismarına başlanılmasını, milli döyüş təyyarəsinin, “Gökbey” helikop­terinin, “Hürjet” və “ATAK-2” qırıcıla­rının, “Altay” tankının istifadəyə veril­məsini Türkiyənin son illərdə böyük uğurlarının göstəricisi kimi dəyərlən­dirərək, “TEKNOFEST”in bütün bu na­iliyyətlərin rəmzi olduğunu qeyd edib. 

Türkiyənin son illərdə kosmik sahədə də böyük uğurlar qazandığını diqqətə çatdıran Cümhurbaşqanı İME­CE peykinin kosmosa göndərilməsinin əhəmiyyətini xatırladaraq, Beynəlxalq Kosmik Stansiyaya yola düşəcək türk pilotlar Alper Gezeravcıya və Tuva Ci­hangir Ataseverə uğurlar arzulayıb.

V.BAYRAMOV, “Xalq qəzeti”