“Türkiyə Böyük Millət Məclisinə (TBMM) millət vəkili seçilsəm, Azərbaycanı təmsil edən bir türk olaraq türk dünyasına xidmətlərimi, öz həyatımda yaşadığım çətinliklərə görə, fiziki qüsurlu insanlara, o cümlədən Qarabağ müharibəsində iştirak edərək bizə zəfər qürurunu yaşadan qazilərimizə hər şəkildə dəstəyimi əsirgəməyəcəyimə söz verirəm”. 

Bu sözləri “Yenidən Rifah” Partiya­sından Türkiyə Böyük Millət Məclisinə namizədliyi irəli sürülən Azərbaycan əsilli Vəfa Aktuz “Xalq qəzeti”nə açıqlamasın­da bildirdi. 2018-ci ildə Türkiyədə keçi­rilən parlament seçkilərində bu ölkənin hakim Ədalət və İnkişaf Partiyasından (AK Partiya) namizədliyinin təsdiqlənmə­diyini xatırlayan Vəfa Aktuz dedi ki, ha­zırda AK Partiya ilə eyni ideyanın daşı­yıcısı olan “Yenidən Rifah” Partiyasından namizədliyinin təsdiqlənməsi ilə qürur duyur: 

–2019-cu ildə “Yenidən Rifah” Parti­yasına dəvət edildim və bu dəvəti qəbul edib partiyaya üzv oldum. Hazırda par­tiyanın xarici əlaqələr şöbəsində sədr müaviniyəm. Bu partiya Türkiyədə milli görüş ideologiyasının qurucusu mərhum Nəcmeddin Ərbakanın oğlu Fatih Ərba­kan tərəfindən qurulub. Mən də din və millətçiliyə önəm verən sağ ideologiyanın tərəfdarı kimi bu partiyadan namizədli­yimi irəli sürdüm, opponentlərin çox ol­masına baxmayaraq, milyonların arasın­dan namizədliyimin qəbul edilməsinə və mənə olunan etimada görə çox sevindim.

TBMM-də sadəcə millət vəkili ol­maq üçün bu mübarizə yolunu seçmə­diyini vurğulayan Vəfa Aktuz qeyd etdi ki, başlıca məqsədi Türkiyə parlamen­tində azərbaycanlıların səsi olmaqdır. Deputatlığa namizəd bundan əlavə Türkiyə Prezidenti Rəcəb Tayyib Ərdo­ğanın timsalında bütün türk millətinə bir azərbaycanlı kimi vəfa borcunun olduğunu da söylədi: 

– 44 günlük Qarabağ zəfərində Tür­kiyədən Azərbaycana verilən dəstək danılmazdır. Bu dəstəyin arxasında hər iki ölkənin liderlərinin güclü iradəsi da­yanır. Ona görə də bir Türkiyə vətəndaşı və millətim adına mənəvi borcum olaraq hörmətli cənab Rəcəb Tayyib Ərdoğa­nın növbəti dəfə prezident seçilməsində bacardığım dəstəyi verməyə hazıram. Partiyamızda öncə yaşanan tərəddüd­lərdən çox həyəcan və kədər hissləri ke­çirsəm də sonrakı fəaliyyətlərimiz gözəl nəticələndi: “Yenidən Rifah” Partiyasının “Cumhur ittifaqı”na daxil olması məni məmnun etdi. 

Əlbəttə, millət vəkili olmaq siyasətə yeni addımlarını atan hər kəsin xəyalı ola bilər. Fəqət mənim üçün millət vəkili ol­manın başqa bir məsuliyyəti var. Odur ki, Azərbaycanda və Türkiyədə fəaliyyətdə olan təşkilatlarımızın imkanlarından, öz potensialımdan və bilik- bacarıqlarımdan maksimum istifadə edərək Vətənimə, millətimə və bir ürəkdə iki can olan Azər­baycana və Türkiyəyə xidmət edəcəyəm.

İxtisasca pedaqoq olan müsahibimiz Azərbaycanda fəaliyyət göstərən “Gülüs­tan Kimsəsiz Uşaq və Qadınlara Yardım” İctimai Birliyinə və Türkiyədəki “4 Un­sur” dərnəyinə rəhbərlik edir. Uşaq ikən ailəsilə Rusiyada yaşayan Vəfa Aktuz 3 yaşında hər iki ayağını itirib. Hazırda Türkiyə vətəndaşı ilə ailə qurub, 2 qız anasıdır. 

Xatırladaq ki, Vəfa Aktuzdan başqa Türkiyədə indiki parlament seçkilərində millət vəkilliyinə daha 5 Azərbaycan əsilli namizəd var: Şamil Ayrım, Dərya Akdə­mir, Əsmayə Novruzova Özörmenoğlu, Kərəm Qarabulud və iş adamı Alagöz Cantürk. 

Soydaşlarımıza istəklərinə çatmaları­nı arzu edirik.

M.SULTANOVA
Ankara