Türkiyədən izmirli dostumuz Zəki Hözərin xoş duyğularla dolu mesaj göndərərək, bizi türkiyəli rəssam, 86 yaşlı Devrim Erbilin Bakıdakı Heydər Əliyev Mərkəzində açılan “Türkiyədən sevgilərlə” adlı fərdi sərgisinə dəvət etməsi xoş bir xəbər oldu. 

Bildiyimiz qədərincə,“Rəsmin şairi” adlandırılan Devrim Erbil həyatının 60 ilini tarixi İstanbulda yaşayıb və yara­dıb. Buradakı Gözəl Sənətlər Dövlət Akademiyasında təhsil alıb. Abstraksi­onist rəssam kimi tanınıb. Bu şəhərə bağlılıq onun yaradıcılığının hər guşə­sindən boy göstərir. 

...Sərginin açılış mərasimində bütün bunlar daha təfsilatlı xatırlanır. Mərkə­zin direktorunun birinci müavini Fərqan Novruzov məlumat verir ki, bu mötə­bər məkan fəaliyyəti dövründə çoxsaylı yerli və beynəlxalq tədbirlərə evsahibli­yi edib. Budəfəki qonağımız dünyanın bir çox muzey kolleksiyalarında rəsm əsərləri ilə yer alan və yüzlərlə sərgisi açılan Devrim Erbil Türkiyənin təsvi­ri sənətinin məşhur simalarındandır. D.Erbilin İstanbula həsr edilən əsərləri xüsusilə məşhurdur. Buradakı sərgi­sində isə müəllifin Bakıya həsr edilən əsərləri də ilk dəfə yer alır.

Sərginin kuratoru Renk Erbil çıxı­şında tədbirin təşkilində əməyi keçən hər kəsə təşəkkürlərini bildirir. O, Erbil ailəsinin Azərbaycana sevgisindən da­nışaraq deyir ki, sərgidə gözəl Bakını əks etdirən əsərlər də var. “Biz heç yer­də və heç bir məkanda bu qədər ge­niş sayda əsərlər sərgiləmirik, sadəcə, Azərbaycanın, Erbil ailəsi olaraq bizim qəlbimizdə tam başqa yeri olduğu üçün Bakıda genişmiqyaslı sərgi açaraq bu əsərləri nümayiş etdirmək istədik”.

Tanınmış türk sənətşünas, profes­sor Kiymet Giray Devrim Erbilin həyat və yaradıçılığından danışır, onun türk təsviri incəsənətinin ən önəmli təmsil­çisi, eyni zamanda dünya miqyasında tanınmış fırça ustalarından olduğunu söyləyir: “Bunun sayəsində İspaniya hökumətinin təqaüdünə də layiq görü­lüb. O, Madrid və Barselonada başla­dığı sənət araşdırmalarını daha sonra London və Parisdə davam etdirib. Tür­kiyənin bir sıra nüfuzlu dövlət müka­fatlarına, o cümlədən Dövlət rəssamı adına layiq görülüb. Eyni zamanda bir çox beynəlxalq sərgi və layihələrin iş­tirakçısıdır. Türkiyədə onun adını daşı­yan Müasir İncəsənət Muzeyi və Fond da fəaliyyət göstərir. Əsərlərində təbiət mövzusuna üstünlük verən rəssam bü­tün həyatını incəsənətə həsr edib. O, bir çox məqalələrin müəllifi, dünya üzrə mötəbər konfrans və seminarların təş­kilatçısıdır, radio və televiziyada fəal işi ilə tanınır.

Ünlü rəssam Devrim Erbilə söz verilir. O, fərdi sərgisinin Bakıda keçi­rilməsindən qürur hissilə danışır. Deyir ki, dünyanın bir çox ölkəsində sərgilə­ri açılıb, amma buradakı kimi səmimi insanları hər yerdə görmək mümkün deyil. “Sərgimin yüksək səviyyədə təşkilinə görə Heydər Əliyev Fondu­nun vitse-prezidenti Leyla Əliyevaya və Heydər Əliyev Mərkəzinə dərin təşəkkürümü bildirirəm. Mənim qardaş Azərbaycana böyük hörmətim və sev­gim var. Hamınızı səmimiyyətlə bağrı­ma basıram. Mənə burada Qarabağın da rəsm əsərini çəkib-çəkməyəcəyim barədə sual verdilər. Otuz il acısını bir­gə çəkdik, təbii ki, oranı görəndən son­ra rəsmini də çəkəcəyəm. Bu, mənim Bakıya ilk səfərim olmasa da, buralara yenə də gəlmək niyyətindəyəm.” 

Qeyd edək ki, Devrim Erbilin “Tür­kiyədən sevgilərlə” adlı fərdi sərgisi 3 ay davam edəcək.

N.QƏDİMOĞLU,
Ə.ƏLİYEV,
“Xalq qəzeti”