İstanbulun Fateh bölgəsində yerləşən Yeddiqüllə zindanı tarix boyu gözətçi qülləsi, heyvanxana, konsert və tamaşalara evsahibliyi edən bir məkan, bəzən isə məhkumların cəzalandırıldığı bir yer olaraq tanınıb. Günümüzdə muzey kimi ziyarət edilən bu məkan möhkəm qala divarları və qüllələrlə əhatə olunub.
Eramızın 390-cı ilində Roma imparatoru Theodosius tərəfindən inşa edilmiş bu tikilidən əsasən Bizans imperatorluğu dövründə xarici ölkələrdən bura təşrif buyurmuş kralları və digər rəsmi qonaqları qarşılamaq üçün istifadə olunurdu. O zamanlar burada cəmi dörd qüllə inşa edilmişdi. II Mehmet adı ilə tanınan Fateh Sultan Mehmetin İstanbulu fəth etməsindən sonra daha üç qüllə əlavə olunmuşdur.
Qüllələr - Gənc Osman, Cəbbəxana, III Əhməd, Xəzinə, Zindan, Top və Bayraq adlanır.
Gənc Osman qülləsi - Osmanlı padşahların arasında ən gənc hökmdar olan Osman paşa bu binanın ikinci mərtəbəsində qətlə yetirildiyi üçün qülləyə onun şərəfinə bu adı veriblər.
Cəbbəxana qülləsi - o dönəmlərdə bura silah-sursat anbarı kimi istifadə olunduğuna görə bu cür adlandırılıb.
III Əhməd qülləsi - Osmanlı hökmdarlarından olan III Əhmədin bu qüllənin tikintisində böyük əməyi olmuşdur. Buna görə qülləyə onun adı verilib. Lakin müəyyən dövrlərdə baş verən zəlzələlərə tab gətirməyən qüllə dağılıb məhv olmuş, dövrümüzə qədər gəlib çıxa bilməmişdir.
Xəzinə qülləsi - Adından da məlum olduğu kimi, burada dövlətin xəzinəsi saxlanılırdı. Lakin III Murad taxta çıxandan sonra naməlum səbəblərdən xəzinə saraya aparılıb.
Digər adı Yazılar qülləsi olan Zindan qülləsi məhkumların saxlandığı və işgəncə verildiyi yer olaraq nəzərdə tutulmuşdu. Lakin qüllədə baş vermiş yanğınlar nəticəsində taxta hissələrə ciddi ziyan dəymişdir.
Top qülləsi - baş verən yanğınlarda zərər görmüş digər qüllələrdən biri də bu qüllədir ki, burada da məhkumlar saxlanılırdı.
Bayraq qülləsi - qüllələrin içində ən sağlam qüllədir. Bu qülləyə türk bayrağı sancılır və şanlı türk əsgərləri də gecə-gündüz bu bayrağın keşiyində dayanırdılar.
Yeddi qüllə zindanları çox qədim tarixə malik olduğuna görə, bu barədə çoxlu əfsanələr də yayılmışdı. Yayılan rəvayətlərə görə burada saxlanılan məhkumların qüllənin divarlarına hopmuş hayqırtı səsləri hələ də eşidilməkdədir.
Fidan HÜQUQQIZI, “Xalq qəzeti”