Erməni separatçılığı və COP29-la bağlı anti-Azərbaycan təbliğatı

Belə hallar ilk dəfə deyil yaşanır. Söhbət Ermənistanda məskunlaşmış Qarabağdakı sabiq separatçı rejimin təmsilçilərinin sərsəmləmələrindən gedir. İndi də “Artsax milli assambleyası” deyilən qondarma qurum bə­yanat verib. Bu “strukturun” mənasızlığı barədə söhbət açacağıq. Ancaq məqsədimiz onun fonunda daha vacib məqamı vurğulamaqdır. 

Azərbaycanla Ermənistan arasında sülh gündəmi deyilən bəlli siyasi trayektoriya var. Rəsmi İrəvan hər nə qədər bu trayek­toriyaya kölgə salmağa, əhəmiyyətini heçə endirməyə, bir sözlə, sülhdən yayınmağa çalışsa da, barış mühitinin formalaşması ilə bağlı ritorikadan rəsmi qaydada imtina etmir. Daha doğrusu, imtina edə bilmir. Çünki erməni iqtidarı 2019-cu ildə Azər­baycanla danışıqlar prosesinin boykotuna yönəlmiş təxribatçı davranışlarının sonra­dan hansı böyük fəlakətlə nəticələndiyini görüb. 

Digər tərəfdən, rəsmi İrəvan bey­nəlxalq birliyin gözündə pis olmaq istəmir. Ancaq manipulyasiyalarından da qalmır. Çalışır ki, sülh prosesinə özünə sərfəli müqəddimələr gətirsin və beləliklə, Qara­bağ avantürasını diri saxlasın. Əslində, pa­rabeyinlərin ortaya atdıqları “Artsax milli assambleyası” deyilən “struktur” da elə buna xidmət edir. Özü də təkcə bu “struk­turun” yox, qondarma rejimin digər özək­lərinin, guya, fəaliyyətdə olduğuna dair məlumatlar var və ara-sıra onlar özlərinin “varlıqlarını” sübut etməyə çalışırlar.

Əslində, məsələyə real aspektdən ya­naşsaq, bu sayaq meyillər Ermənistanın Azərbaycana qarşı ərazi iddiasını davam etdirməsi deməkdir. Baxmayaraq ki, rəs­mi İrəvanın ayrı-ayrı təmsilçiləri bütün beynəlxalq platformalarda ölkəmizin ərazi bütövlüyünü və suverenliyini tanıdıqlarını vurğulayırlar. Onların aldıqları nəfəs də yalan olduğu kimi, mövcud istiqamətdə səsləndirdikləri açıqlamalar da səmimiy­yətdən uzaq, spekulyativ səciyyə daşıyan cəfəngiyatdır. 

Belə bir durumda Azərbaycan nə etmə­lidir? Axı Ermənistan silahlı qüvvələrinin atəşkəsi pozması ilə Qarabağdakı keçmiş separatçı rejimə məxsus qondarma struk­turların anti-Azərbaycan bəyanatlar səs­ləndirmələri arasında heç bir fərq yoxdur. Hər iki halda ölkəmizin ərazi bütövlüyünə və suverenliyinə qəsd amili var. Birinci halda bu qəsd sərhədlərimizə yaxın ərazi­də törədilirsə, ikinci halda təhlükəli nöqtə Ermənistan adlı qurama respublikanın içərisindədir. Deməli, ölkəmiz zəruri mü­dafiə tədbirinə əl atmaq ixtiyarını özündə saxlayır. Şərt o deyil ki, paytaxt İrəvandakı separatçılar oturduqları daldalanacaqlardan və zirzəmilərdən Azərbaycana raket tuşla­sınlar. Elə destruktiv yüklü bəyanatlar səs­ləndirmələri də bəsdir. 

Bir el misalında deyildiyi kimi, dəvəqu­şu başını quma salıb gizlənmək istəsə də, əndamı çöldə qalır. Yəni ki, baş nazir Nikol Paşinyan administrasiyasının fitnə-fəsad dolu oyunları hər kəsə yaxşı məlumdur. Heç şübhəsiz, “Artsax milli assambleyası” adlanan ölülər yığınını da işə salmaq bu administrasiyanın əməlidir. Çünki “ölülə­rin” qaldırdıqları məsələləri Ermənistan hakimiyyəti də qabardıb və müxtəlif mər­hələlərdə həmin məsələləri Azərbaycan­la sülh gündəminin tərkib hissəsinə daxil etməyə çalışıb. Eyni zamanda, çalışıb ki, “etnik təmizləmə” şousunu, Azərbaycanın Ermənistan ərazilərini işğal etməsi cəfən­giyyatını qaldırmaqla, ölkəmiz əleyhinə mənfi beynəlxalq rəy formalaşdırsın. Elə bir mənfi rəy ki, onun nəticəsində Azərbay­cana qarşı təzyiqlər göstərilsin, sanksiyalar tətbiq edilsin. Paşinyanın komandası Qara­bağın erməni milli mirası sərsəmliyinə və Bakı həbsxanalarındakı caniləri məzlum qiyafəsində təqdimatına əsaslanaraq da anti-Azərbaycan təbliğatı aparıb. Əlbəttə, məqsədinə nail ola bilməyib. İndi isə “Art­sax milli assambleyası” oxşar “motivləri” irəli sürür. Nəyə görə və konkret məqsəd nədir?

Bəli, məqsəd BMT-nin İqlim Dəyiş­mələri üzrə Çərçivə Konvensiyasına Tərəf Dövlətlərin 29-cu Konfransı (COP29) məsələsində Azərbaycanı ləkələmək, ölkəmizin belə bir mötəbər tədbirə evsa­hibliyi obrazına zərər vurmaqdır. Burada maraqlı nüans var. Məlum olduğu kimi, Azərbaycan Respublikası Prezidentinin Administrasiyası və Ermənistan Respub­likası baş nazirinin aparatı ötən il dekab­rın 7-də birgə açıqlama yaymışdı. Həmin açıqlamada bildirilmişdi ki, “Xoş niyyətin təzahürü olaraq, Ermənistan Respublikası BMT-nin İqlim Dəyişmələri üzrə Çərçivə Konvensiyasına Tərəf Dövlətlərin 29-cu Konfransına (COP29) ev sahibliyinə öz namizədliyini geri götürərək, Azərbaycan Respublikasının namizədliyini dəstəkləyir. Azərbaycan Respublikası və Ermənistan Respublikası ümid edirlər ki, Şərqi Avropa qrupuna daxil olan digər ölkələr də Azər­baycanın namizədliyini dəstəkləyəcəklər. Xoş niyyətin təzahürü olaraq, Azərbaycan Respublikası Ermənistanın Şərqi Avropa qrupundan COP-un büro üzvlüyünə na­mizədliyini dəstəkləyir”.

Yəni, zamanında Azərbaycanın COP29-a evsahibliyi Ermənistan tərəfin­dən dəstəklənib. Ona görə ölkə rəhbərliyi hazırda birbaşa özünü inkar yolu tuta bil­mir. COP29-la bağlı ölkəmiz əleyhinə təb­liğatı daha çox xaricdəki erməni lobbi və diaspor təşkilatları, habelə ermənipərəst dairələr aparırlar. Görünür, “Artsax milli assambleyası” adlı qondarma quruma da “rol” verilib. 

Yekunda onu da deyək ki, Ermənis­tan rəhbərliyinin bütün anti-Azərbaycan fəaliyyəti kimi, haqqında söz açdığımız “rol” məsələsi də çox təhlükəlidir. Təhlükə keçmiş separatçı rejimin təmsilçilərinin qi­yafəsində “ölülər” üçün yox, Ermənistan adlı kliniki ölüm keçirən, özündə yalnız az-maz həyat simptomlarını yaşadan dövlət baxımından aktualdır. Bu dövlətin rəhbər­liyi təfərrüatları və perspektivi yaxşı-yaxşı düşünməli, əməllərindən daşınmalıdır. Özü də vaxt itirmədən. Sonra gec ola bilər... 

Ə.RÜSTƏMOV
XQ