Xaricdəki bəzi ermənilər “dəmir yumruq”la hesablaşmırlar
Ermənistan və Azərbaycan xalqları arasında vaxtilə nifaq toxumu səpən qüvvələrdən biri də xaricdəki erməni lobbisi və diaspor təşkilatları olub. Fransada, ABŞ-də, Rusiyada və digər ölkələrdə yaşayıb fəaliyyət göstərən, burada yüksək postlarda təmsil olunan, siyasi dairələrə çıxış imkanı olan haylar böyük dövlətlərin mövqeyinə təsir edərək onlardan iki xalq arasında münasibətləri gərginləşdirmək üçün yararlanıblar.
Heç də təsadüfi deyil ki, Qarabağın Azərbaycandan ayrılıb Ermənistana birləşdirilməsi kimi bədnam təşəbbüs ilk dəfə xaricdə – Fransada irəli sürülüb. SSRİ-nin sonuncu rəhbəri Mixail Qorbaçovun iqtisadi məsələlər üzrə müşaviri olmuş akademik Abel Aqanbekyan Fransanın “Humanite” qəzetinin 1987-ci il noyabrın 18-də dərc olunmuş sayında çıxan müsahibəsində Qarabağın Azərbaycandan çox Ermənistana bağlı olduğunu “əsaslandırmağa” çalışıb. Bundan sonra Xankəndiyə dünyanın müxtəlif yerlərindən emissarlar, o cümlədən, Livandan beynəlxalq miqyaslı terrorçu Monte Melkonyan gəlib-getməyə başlayıb.
Amerikadakı erməni diasporu konqresmenlərlə və senatorlarla, yerli icraedici orqanların rəhbərləri ilə sıx iş aparıb. Bunun nəticəsində 1992-ci ildə ABŞ Konqresində ölkəmizə qarşı 907-ci düzəliş qəbul olunub. Tam adı “Azadlığa dəstək Aktına 907-ci düzəliş” olan sənəd Birləşmiş Ştatların Azərbaycana birbaşa dövlət yardımlarını qadağan edib. Erməni diaspor və lobbisinin təşəbbüsü ilə qəbul edilmiş qadağa Azərbaycanı ABŞ hökumətindən birbaşa yardım almayan yeganə postsovet dövlətinə çevirmişdir. Konqres sonrakı illərdə də ermənilərə dəstək istiqamətində çoxlu sənəd qəbul etmişdir.
Rusiyadakı erməni diasporu da Azərbaycan əleyhinə xüsusi fəaliyyəti ilə seçilib. Diaspor Rusiya–Azərbaycan münasibətlərinin pis olması üçün var gücü ilə çalışıb. Nəticədə Rusiya–Azərbaycan münasibətləri müstəqilliyin bərpasından sonrakı illərdə heç də qaydasında olmayıb.
Hazırda ölkəmizə hücumlar etməyi əsas fəaliyyət istiqaməti elan edən, əsassız ittihamlar irəli sürən Avropa Parlamenti isə hələ 1989-cu ilin yanvarında Qarabağda gərginləşən münaqişə ilə bağlı qəbul etdiyi qətnamədə Azərbaycanı suçlamışdı.
Erməni diasporu uzun illər Ermənistanın siyasətinin formalaşmasında mühüm rola malik olub. 2009-cu il oktyabrın 10-da İsveçrənin Sürix şəhərində Ermənistan və Türkiyə arasında münasibətlərin normallaşmasını nəzərdə tutan iki protokolun (“Ermənistan Respublikası ilə Türkiyə Respublikası arasında ikitərəfli əlaqələrin inkişafı haqqında” və “Ermənistan Respublikası ilə Türkiyə Respublikası arasında diplomatik münasibətlərin qurulması haqqında” protokollar – S.H.) imzalanmasından bir həftə əvvəl – oktyabrın 1-də ölkənin sabiq prezidenti Serj Sarkisyanın müzakirə üçün erməni icmasının kompakt halda yaşadığı Paris, Nyu York, Los-Anceles, Beyrut və Rostov şəhərlərinə səfər etməsi bunun bariz nümunəsi idi. Sarkisyan yalnız Ermənistan–Türkiyə münasibətlərinə dair diasporla məsləhətləşdikdən və onların fikirlərini öyrəndikdən sonra xarici işlər naziri Edvard Nalbandyanı protokolları imzalamaq üçün Sürixə göndərmişdi.
Qazax rayonunun 4 kəndinin Azərbaycana qaytarılmasına etiraz edən, etirazçıları dəstəkləyən erməni apostol kilsəsi, onun başçısı olan bütün ermənilərin katolikosu II Qaregin isə 2009-cu il sentyabrın 24-də S.Sarkisyanla görüş zamanı onun təşəbbüsünü alqışlayaraq demişdi: “Diaspor xalqımızın vacib və ayrılmaz hissəsidir. Bugünlərdə imzalanması gözlənilən Ermənistan–Türkiyə sənədlərini də qızğın şəkildə müzakirə edən diaspor övladlarının onları maraqlandıran suallara cavabları şəxsən sizdən eşitmək imkanının olması düzgün olardı”.
Ancaq Nikol Paşinyanın 2018-ci ilin mayında “narıncı inqilab” yolu ilə hakimiyyətə gəlişindən sonra Ermənistan iqtidarı ilə diasporu arasında da münasibətlərdə soyuqluq yarandı. Məsələ onda idi ki, diaspor əvvəlki hakimiyyətlərə güclü təsir edə bilirdi. Onların sözü Ermənistanda eşidilirdi. Ancaq Paşinyan dərk edirdi ki, diaspor Ermənistan və erməni xalqı üçün ianə şəklində topladığı pulların böyük hissəsini mənimsəyir, cüzi bir hissəsini isə Hayastana göndərir. Paşinyanın diasporun Ermənistanın ictimai-siyasi həyatına təsirini minimuma endirmək üçün atdığı ən böyük addım 2008-ci il oktyabrın 1-dən fəaliyyət göstərən diaspor nazirliyini ləğv etməkdən ibarət oldu. Hakimiyyətə gəldikdən bir il sonra – 2019-cu il mayın 8-də diaspor nazirliyi əvəzində baş nazir aparatında diaspor məsələləri üzrə ali komissarlıq yaradıldı.
Onu da bildirək ki, 1990-cı illərinin əvvəllərində Azərbaycan torpaqlarının işğal edilməsi erməni diasporunun iştahını daha da artırmışdı. Ölkəmizin təbii sərvətləri vəhşicəsinə talanır, yeraltı faydalı qazıntılarımız qanunsuz olaraq xaricə daşınırdı. Diasporda cəmləşmiş erməni iş adamları bu prosesdə yaxından iştirak edirdilər. 44 günlük Vətən müharibəsi nəticəsində Azərbaycan təkcə tarixi torpaqlarına deyil, yerüstü və yeraltı təbii sərvətlərinə də sahib çıxdı. Beləliklə, hər məsələdə şəxsi qazanc güdən erməni diasporunun Paşinyanla münasibətləri daha da kəskinləşdi.
Görün iş nə yerə gəlib çatıb ki, bu gün xaricdəki erməni disaporunun bir çox nümayəndələri “daşlar ölkəsi”nə gedib-gələ bilmirlər. Rusiyadakı ermənilərin “parlaq nümayəndəsi”, böyük media holdinqə başçılıq edən Marqarita Simonyanın, onun əri Tiqran Keosayanın, Fransadakı erməni təşkilatlarının koordinasiya şurasının həmsədri Murad Papazyanın, Fransada yaşayan erməni əsilli jurnalist Leo Nikolyanın Hayastana girişi qadağan olunub. Yeri gəlmişkən, qeyd edək ki, sonuncu şəxs 8 gündür ki, “Zvartnos” hava limanının neytral zonasında aclıq aksiyası keçirir. Bundan əvvəl, o, Ermənistana buraxılmaması ilə bağlı siyasi qərar verildiyini bildirmişdi. Nikolyan onu da bildirib ki, hökumət nümayəndələri ona baş çəkib, Fransaya qayıtması üçün bilet və pul təklif ediblər, lakin o, bundan imtina edib.
İndi isə diaspor Ermənistandakı sərhəd kəndləri ilə bağlı etirazlar fonunda baş nazirə qarşı yeni hücumlar edir. Xüsusilə, Rusiyadakı erməni diasporunun anti-Paşinyan fəaliyyəti diqqəti cəlb edir. Saylarına görə Livanda ikinci yerdə olan haylar paytaxt Beyrutda Paşinyana qarşı forum keçirmək təşəbbüsü ilə çıxış ediblər.
“Qafqaz Strateji Araşdırmalar Mərkəzi”nin sədr müavini, siyasi elmlər üzrə fəlsəfə doktoru Nazim Cəfərsoy “XQ”-yə açıqlamasında bildirdi ki, dörd kəndin qaytarılması ilə bağlı Ermənistandakı etirazların böyüməməsi üçün müəyyən inzibati addımlar atılır. Onun sözlərinə görə, proseslər hələ ki, nəzarətdədir, ancaq Ermənistan zəif halqadır. Ölkənin siyasətində Paşinyana yönəlik müxtəlif qruplar var. Proseslərə ordunun, müxtəlif təhlükəsizlik orqanlarının və kilsənin də ciddi neqativ yanaşması mövcuddur. Üstəlik, onların xaricdəki erməni diasporundan və Rusiya, Fransa və ABŞ-dəki müəyyən dairələrdən də dəstək almaq potensialları var. Bütün bunları bir arada düşündüyümüz zaman hələlik nəzarət altında olan proseslər Paşinyanı devirəcək və ya hakimiyyətində ciddi sarsıntı yarada biləcək gücə də malikdir. Proseslər qəfildən geniş vüsət ala bilər.
Erməni diasporu ilə Paşinyan arasındakı münasibətlərə gəldikdə isə N.Cəfərsoy qeyd etdi ki, diasporu və erməni milli kimliyini formalaşdıran ən əhəmiyyətli faktorun önündə türk düşmənçiliyi gəlir: “Ermənilər Türkiyə və Ermənistan torpaqları hesabına “dənizdən dənizə böyük Ermənistan” qurmaq istəyiblər. Bu zaman xaricdən –İngiltərədən, Fransadan, ABŞ-dən və Rusiyadan xüsusi dəstək alıblar. Nəticədə ötən əsrin əvvəllərində Cənubi Qafqazda Ermənistan adlı dövlət yaranıb. Bu dövlət əsrin sonlarında yenə müxtəlif xarici qüvvələrin dəstəyi ilə silahlandırılıb və torpaqlarımızı işğal edib. Ancaq onların cəhdləri uğursuzluqla nəticələnib və 200 illik plan iflasa uğrayıb”.
Müsahibimiz bildirdi ki, Hayastanı hazırda idarə edən N.Paşinyan bölgədə erməni xalqının və ümumiyyətlə, erməni dövlətçiliyinin varlığını qoruyub saxlamağın yolunun qonşularla normal münasibətlər qurulmasından keçdiyini anlayır: “Onun hazırda bu düşüncədə olmasında 44 günlük Vətən müharibəsindəki Qələbəmizin xüsusi rolu var. Bu çərçivədə Paşinyan qonşularla, xüsusilə Azərbaycan və Türkiyə ilə normal münasibətlər qurmağa çalışır. Paşinyan anti-Azərbaycan, anti-türk, irrasional, separatçı erməni anlayışını dəyişmək istəyir. Bunun yolunun Azərbaycanla normal münasibətlər qurmaqdan keçdiyindən bəhs edir. Normal münasibətlər qurmaq da sərhədlərin dəqiqləşdirilməsi, nişanlanması, Azərbaycanın ərazi bütövlüyünün tanınması, bu kontekstdə 4 kəndin ölkəmizə qaytarılması ilə xarakterizə edilə bilər”.
N.Cəfərsoy qeyd etdi ki, erməni diasporunda bu məsələlərlə bağlı ciddi narahatlıq var. Çünki diaspor anti-Azərbaycan, anti-türk mahiyyətdədir. Diaspor rəhbərləri hələ də “böyük Ermənistan” düşüncəsi ilə fəaliyyət göstərir və radikal düşüncələrə malikdirlər: “Onlar Amerikada, Avropa qitəsinin müxtəlif ölkələrində, Rusiyada əyləşib Ermənistanı təcavüzkarlığa sürükləməyə cəhd edirlər. Hayastana ideoloji, siyasi, bəzən də iqtisadi dəstək verməyə çalışırlar. Digər tərəfdən erməni diasporunun üzvləri yaşadıqları ölkələrin siyasətinin bir parçası kimi çıxış edirlər: “Məsələn, Fransanın Ermənistan siyasətində diasporun çox ciddi rolu var. Son vaxtlar Parisin ölkəmizlə bağlı yürütdüyü siyasətdə əsas amillərdən biri də budur. Diaspor ABŞ-nin bölgə siyasətinə də çox ciddi təsir göstərir. Biz bunu zaman-zaman görmüşük və görməkdəyik. Məsələn, ABŞ-dəki erməni diasporunun Paşinyanın səfir təyin etdiyi Lilit Makuntsla münasibətləri çox gərgindir. Müstəqilliyin bərpasından sonra Rusiyanın bölgə siyasətində erməni diasporu çox aktiv rol oynayıb. Son dövrlərdə gücü azalsa da, orada revanşistləri dəstəkləyənlərin sayı kifayət qədərdir”.
Politoloq onu da bildirdi ki, bütün bunlar erməni lobbisi və diaspor təşkilatlarının Paşinyana nifrətinin təzahür formalarıdır. Onlar Paşinyanın görmək istədiyi işləri əngəlləmək, onu sabotaj etmək, mümkün qədər zəiflətmək, hətta hakimiyyətdən getməsi üçün bütün vasitələrdən istifadə etməyə çalışırlar. Bura sui-qəsd, dövlət çevrilişi kimi addımların atılması da daxildir. Hələ ki, buna gücləri çatmır. Proseslərdə diasporla yanaşı, erməni apostol kilsəsi də aktiv iştirak edir. Hətta, zaman-zaman proseslərə “liderlik” edir. Dörd kəndin qaytarılmasına qarşı çıxan qüvvələri içərisində də kilsənin fəal rol oynadığını görürük.
Səxavət HƏMİD
XQ