IV MƏQALƏ
Uğur öz davranışınızdan doğur.
Dalay-Lama
Dövlətlərarası münasibət mədəniyyəti
Dövlətlərarası münasibətlər yalnız siyasi hadisə deyildir, o həm də ənənəsi olan tarixdir, mədəniyyət nümunəsidir. Dünyanın güclü və oturuşmuş dövlətlərinin digərləri ilə münasibətləri hansısa konkret meyar üzərində qurulur. Məsələn, Türkiyə üçün bu, ədalətlilik prinsipi ilə sıx bağlıdır. Digər faktor həmişə məzlumun yanında olmaqdır. Bir başqa faktor isə qarşı tərəfin dövlət olmaq hüququnu təbii olaraq qəbul etməkdir.
Azərbaycan dövlətçilik ənənəsində də eyni faktorlar vardır. Bunlardan başqa, Azərbaycan dövlətçiliyində yardım göstərmək kimi nəcib xüsusiyyət mövcuddur. Xatırlayırsınızsa, Ermənstan bizə qarşı düşmənçilik etdiyi bir dönəmdə belə orada zəlzələ olanda Azərbaycan təyyarə ilə yardım göndərdi. Ermənilər isə bu yardımı daşıyan təyyarəni də vurdular. Bu onu göstərirdi ki, onların dövlətlərarası münasibətlərdə humanitarlıq keyfiyyəti yoxdur.
Azərbaycan dövlətçiliyində tarixi reallıqları ciddi surətdə nəzərə almaq da vardır. Azərbaycan indiyə qədər heç bir qonşusuna qarşı bu prinsipi pozmamışdır. Təsadüfi deyildir ki, Prezident İlham Əliyev II Qarabağ savaşı haqqında danışarkən əsas faktorlardan biri kimi, tarixi ədalətin bərpasını vurğulamışdı.
XX əsrin birinci yarısından bu yana Ermənistan adlanan ölkənin dövlətlərarası münasibətlər tarixçəsinə baxdıqda yuxarıda vurğulanan özəllikləri görə bilmirik. XX əsrin əvvəllərində dövlət qurmaq adına dəfələrlə qonşu xalqlara qarşı kütləvi qətliamlar törətdilər. Xüsusilə, azərbaycanlılara qarşı amansızlıqla kütləvi terror və qətllər həyata keçirdilər. Azərbaycanda minlərlə ailə vardır ki, həmin illərdə qalan xatirələr sırasında bir acı fakt da mövcuddur. O dövrün yaşlı insanları deyərdilər ki, “ermənilər həyətimizdə filan qədər qohum-əqrabanın başını kəsdilər”.
Ümumiyyətlə götürdkdə belə aydın olur ki, Ermənistan adlanan məmləkət üçün dövlətlərarası münasibətlərdə mədəniyyət deyilən dəyər yoxdur və ya olduqca zəifdir. Səbəbi nədir? Burada bir fransız tarixçisinin araşdırmasına baş vurmaq istərdik.
Pyer Nora məşhur fransız tarixşünasıdır. O, uzun illər “Fransa yaddaşdır” tədqiqat layihəsi üzərində işləmişdir. Araşdırma nəticəsində belə qənaətə gəlmişdir ki, Fransa cəmiyyət və dövlət olaraq yaddaşdır. Yəni onun həm dövlət, həm də cəmiyyət kimi müəyyən özünütəşkiletmə xətti vardır.
Lakin ABŞ-ın yaddaşı yoxdur. Dövlət kimi bir neçə yüz il yaddaşı vardır və buradan da ABŞ-ın dövlətlərarası münasibətlərə öz yanaşması mövcuddur. Biz detallara varmaq istəməzdik, lakin tarix göstərir ki, Amerika dövlətlərarası münasibətlərdə özünün müstəsnalığı prinsipinə daha çox üstünlük verir. Buradan onun dünya lideri olmağı təbii qəbul etməsi kimi özündənrazı münasibəti yaranmışdır. Artıq 200 ildən çoxdur ki, Amerika digər dövlətlərə bu “eynəkdən” baxır. Əksini qəbul etmək istəmir. Çünki tarixi aspektdə dövlətlərarası münasibətdə başqa təcrübəsi və həmçinin, mədəniyyəti yoxdur.
Cəmiyyət baxımından isə ABŞ P.Noraya görə, yaddaşsızdır. Ora insanlar dünyanın müxtəlif regionlarından (əsasən Avropadan) bu və ya digər səbəblərə görə, yeni yaşayış məskəni kimi yığışmışlar. Paralel olaraq, Amerikanın yerli tarixi ənənəsini yaşadan qövmünü – hinduları soyqırıma məruz qoymuşlar. Bununla indiki amerikanlar özləri ilə ABŞ-nin cəmiyyət kimi tarixi yaddaşı arasında sədd yaratmışlar. Hələ də onlar bu səddi söküb yeni yaddaş formalaşdıra bilmirlər.
Ancaq amerikalılar güclü dövlət qurmuşlar və o, hazırda dünya geosiyasi dinamikasına çox ciddi təsir edir. Daha fəlakətlisi odur ki, nə dövlət kimi tarixi yaddaşı olan, nə də cəmiyyət kimi öz yaddaşını düzgün anlayan və zəif, qondarma kiçik dövlətlər də böyüklük iddiasına düşürlər. Ermənistan onlardan biridir.
Tarixi faktdır ki, ermənilərin son min ilə yaxın müddətdə dövləti olmamışdır. Müəyyən yerlərdə xırda knyazlıqlar və ya başqa formada dövlətə oxşar bir qurum düzəltməyə çalışmışlar. Onları da başqa güclü dövlətlər dərhal yox etmişlər. Hər halda, nəticədə ermənilər xalq kimi başqa dövlətlərin mərhəmətinə sığınmışlar. XX əsrin əvvəllərində havadarlarının köməyi ilə, qədim Azərbaycan torpaqlarında qondarma qurum yaratdılar ki, bu da dövlətçilik baxımından ermənilər üçün nonses idi. Onlar faktiki şoka düşdülər. Dövlətlərarası münasibətləri qurmağın tarixi təcrübəsi olmadığına görə, bu istiqamətdə ciddi yanlışlıqlara yol verdilər. Onların sırasında regionda qonşu olduqları türklərə – Türkiyə və Azərbaycana qarşı düşmən münasibəti ayrıca yer tutur.
Ermənistanın indi müşahidə etdiyimiz dövlətlərarası münasibətləri dövrün tələblərinə uyğun qura bilməmələri məhz bu sahədə tarixi yaddaşlarının ya olmaması, ya da çox zəif olması ilə bağlıdır. Deməli, Ermənistan siyasi dairələri və bütövlükdə, cəmiyyət bunu etiraf edib, özündən müştəbehlik halından imtina etməlidirlər. Onlarda dövlətlərarası münasibətlərdə mədəniyyət çatışmazlığı açıq hiss olunur. Bunu yalnız düşmənçilik etdiyi dövlətlərlə deyil, dost elan etdiyi ölkələrlə münasibətdə də görürük.
Məsələn, Ermənistan Rusiyanın sayəsində heçdən özgə torpaqları üzərində yaradılmış ölkə olmaqda birbaşa ruslara borcludur. Onlar yalnız Rusiyanın hesabına indi dövlət sayılırlar. İranla münasibətlərdə də erməni nankorluğu özünü göstərir. Onun əlaməti İranın maraqlarına uyğun olmayan formada Qərblə “dostluğa” başlamaqda ifadə olunur.
Belə çıxır ki, müasir mərhələdə Ermənistan üçün dövlətlərarası münasibətlərdə öz modelini yaratmaq ciddi problemə çevrilmişdir. Bir dövlət ki, tez-tez dostu düşmən edirsə və ya “dostlar”ını dəyişirsə və bu zaman özü heç dəyişmək istəmirsə, deməli onun dövlətçilik ənənəsi yoxdur. Əgər bu ənənə olsaydı, anlardı ki, məsələ ziddiyyət yaranmışsa, deməli, köhnə davranışlar dalana aparır, onları dəyişmədən uğurlu yolu davam etdirmək mümkün deyil. Bu işdə dostları dəyişmək, sadəcə olaraq, fəlakətə aparan yolda yolçuları yeniləməkdir. Ancaq Ermənistan üçün tarixi fürsət yaranmışdır.
Həmin fürsətdən faydalanmağın başlanğıcı isə Azərbaycanla dövlət kimi münasibətləri tarixi ədalət və müstəqilliyə hörmət əsasında qurmaqdan ibarətdir. Bundan öncə erməni siyasi dairələri birmənalı etiraf etməlidirlər ki, Azərbaycana qarşı dövlət və cəmiyyət olaraq yanlış mövqe tutmuşlar. Bunu etiraf edib, üzr istənilməlidir.
Bunun fonunda daha bir mühüm məsələ vardır. Ermənistan siyasi ideoloji səviyyədə Azərbaycanın qələbəsini qəbul etməlidir.
Unutmayın: Azərbaycan qalibdir!
Azərbaycanın II Qarabağ savaşında əldə etdiyi qələbə yalnız ölkənin siyasi sərhədləri ilə məhdudlaşan hadisə deyildir. Bu qələbə, bütövlükdə, Cənubi Qafqazda dövlətçilik tarixinin yeni səhifəsidir. Bununla Azərbaycan sübut etdi ki:
– Müstəqillik Azərbaycanı güclü dövlət edir. Digərləri də müstəqildirlər, lakin hələ də güclü dövlət deyillər. Azərbaycan isə çox ağır şərtlər və böyük dövlətlərin qərəzli münasibəti fonunda güclü müstəqil dövlət olmuşdur!
– Azərbaycanı müstəqil dövlət kimi güclü edən başlıca səbəb onun dövlətçilik tarixinin zəngin olmasıdır. Əsrlər boyunca bir neçə dövlət yaradan Azərbaycan xalqı müasir çox mürəkkəb və çətin dönəmdə müstəqilliyindən güclü dövlət olmaq üçün maksimum yararlana bilmişdir. Çünki indiki dönəmdə müstəqil dövlət quruculuğunda dövlətçilik ənənəsi ilə müasirliyin adekvat nisbəti təmin edilmişdir;
– müstəqil Azərbaycanı güclü dövlət edən həm də onun çox güclü liderinin olmasıdır. Azərbaycan nadir dövlətlərdəndir ki, olduqca böhranlı vəziyyətdən liderinin – ulu öndər Heydər Əliyevin sayəsində xilas olmuş və davamlı inkişaf xəttinə çıxmışdır;
– Azərbaycan həm də ona görə güclü dövlət ola bilmişdir ki, onun yeritdiyi siyasi kurs yalnız inkişaf paradiqmasına əsaslanır. Prezident İlham Əliyev siyasi varis kimi ulu öndər Heydər Əliyevin inkişaf paradiqmasını XXI əsrin tələblərinə uyğun davam etdirir və yeni liderlik nümunəsi yaradır;
– Azərbaycanın nümunəsində güclü dövlət olmaq yerləşdiyi regionda hər bir şəraitdə sabitlik, əməkdaşlıq və inkişafın qarantı olmaq qabiliyyəti ilə sıx bağlıdır. Ermənistanın bütün qərəzli davranışlarına baxmayaraq, Azərbaycan regionun rifahı naminə fəaliyyətini genişləndirir və inkişaf etdirir.
Ermənistan məhz siyasi-ideoloji səviyyədə bütün bunları etiraf etməli və ona uyğun kurs hazırlamalıdır. Azərbaycanın regional liderliyini siyasi-ideoloji aspektdə obyektivcəsinə etiraf etmədən Ermənistanın real inkişafı mümkün deyildir!
Konstitusiya dekorasiyası
Beləliklə, Ermənistanın yeni konstitusiya axtarışları yuxarıda vurğulanan etiraflar olmadıqca dekorativ, başqalarına nümayiş etdirmək üçün hazırlanmış şou olaraq qalacaqdır. Erməni toplumu bu yanlış yolda nə qədər çox qalsa¸bir o qədər dövlətçiliyin varlığı sual altına düşəcəkdir. Əgər ermənilər bunları anlamasalar, onlar üçün qondarılan dövlət dağılmalıdır. Başqa cür regiona sülh, rifah, sabitlik gəlməyəcəkdir.
Onu da deyək ki, Ermənistana bu prosesdə ən çox əngəl törədənlər onun “yeni dostları”dır. Onların başında Fransa gəlir. Sonra ABŞ, Almaniya, İran və Hindistan vardır. Hindistan burada yeni hadisədir. Çünki Hind okeanından Qafqaza yol çox uzaqdır. Rəsmi Dehli hesab edir ki, bu yolu qısalda bilər. Bunun üçün ermənilərə silahlar vermək kifayətdir. Lakin Dehlinin əsl dərdinin nədən ibarət olduğu bəllidir. Bu səbəbdən də istənilən zaman, o, Ermənistandan üzünü döndərə bilər. İran isə anti-Azərbaycan eyforiyasına son qoymalı və müstəqilliyimizi obyektiv olaraq qəbul etməlidir. Bunu etmədikcə ermənilərə yeni təcavüzkarlıq ovqatı vermiş olur ki, bunun da sonucu fəlakətdir. Ermənistanın digər “dostları” da eyni dərəcədə haylar üçün dünyanın ən pis işini görürlər.
Deməli, yenə də ermənilərə elə gəlir ki, dövlətçiliklə bağlı nəsə real iş görürlər, hətta yenilik edirlər. Lakin yenə də yanılırlar. Çünki konstitusiyaya yeniliyin önündə siyasi və toplumsal varlıq olaraq özündə yenilik gəlir. Ermənilər öncə özlərini və dünyaya baxışlarını dəyişməlidirlər. Təəssüf ki, bunu müşahidə etmirik. Bu səbəbdən Ermənistan hələ də region üçün geosiyasi risk olaraq qalır!
Füzuli QURBANOV,
XQ-nin analitiki, fəlsəfə elmləri doktoru