Serbiyanın Avropa Şurası Parlament Assambleyasındakı nümayəndə heyəti AŞPA-nın Azərbaycan nümayəndə heyəti ilə bağlı qəbul etdiyi qətnaməyə görə Assambleyanın sədri Teodoros Rousopoulosa etiraz müraciəti ünvanlayıb.

Nümayəndə heyətinin rəhbəri Bilya­na Pantiç Pilya, deputatlar – Dubravka Filipovski, Elvira Kovaks, Dunya Simo­noviç Bratiç, Stefan Yovanoviç, Yelena Zariç Kovaçeviç və Aleksandar Marko­viçin imzaladıqları açıqlamada deyilir: “Təəssüf ki, Serbiya Respublikasının nümayəndə heyəti 2023-cü il dekabrın 17-də ölkədə keçirilən parlament seç­kilərindən sonra Milli Assambleyamızın formalaşması prosesinin davam etməsi ilə əlaqədar bu qətnamə ilə bağlı səs­vermədə iştirak edə bilməyib. Buna bax­mayaraq, Serbiya nümayəndə heyəti Azərbaycan nümayəndə heyətinə qar­şı olan münasibət və olduqca şübhəli əsaslarla qəbul edilmiş qətnamə ilə əlaqədar öz narazılığını diqqətə çatdır­maq istəyir. Biz qəti əminik ki, qətnamə AŞPA daxilində səmimi dialoqdan ge­riyə addım atmaq deməkdir və bu, yal­nız davam edən qütbləşməyə təkan ve­rir. Bu, həmçinin Assambleya daxilində dəyərlərin deqradasiyasının dərinləş­məsinin bir göstəricisidir”.

Serbiyanın AŞPA-dakı nümayəndə heyəti qəbul edilmiş qət­naməyə qəti etirazını bildirərək, Assambleyanın və Avropa Şura­sının reputasiyasına və müəyyən edilmiş roluna mənfi təsirlərin qarşısını almaq məqsədilə onu yenidən nəzərdən keçirməyə çağırır: “Azərbaycanın parlament nümayəndə heyətinin etimad­naməsinin qəbul edilməməsi AŞPA çərçivəsində Azərbaycan ilə əməkdaşlığı qeyri-mümkün edir və bu ölkə ilə Avropa Şurasının daha geniş çərçivədə müxtəlif orqan və mexanizmlərdən ibarət zəngin palitrasında əməkdaşlıq və öhdəliklərin yerinə yetirilməsi baxımından daha çox imkanın itirilməsinə gətirib çıxarır”. 

Müraciətdə daha sonra qeyd edilir ki, belə vəziyyət dialoq və müvafiq öhdəliklərimizin yerinə yetirilməsi üçün platforma rolunu oynayan bu qurumun əsas məqsədinə ziddir. Bu, assambleyanın və bütövlükdə Avropa Şurasının nüfuzuna da ciddi zərbə, eləcə də onların dəstəklədiyi əməkdaşlıq ruhuna etinasızlıqdır. Bun­dan əlavə, bu, Şuranın Cənubi Qafqaz regionuna, o cümlədən, təşkilatın mandatına birbaşa aid olan məsələlərdən uzaqlaşma­sına gətirib çıxarır ki, bu da təşkilatın maraqlarına uyğun hesab edilə bilməz.

Sənəd bu sözlərlə bitir: “Serbiya nümayəndə heyəti AŞPA-nın bütün üzvləri ilə səmimi dialoqun və əməkdaşlığın da­vam etdirilməsinin son dərəcə vacibliyini bir daha vurğulayaraq, qətiyyətli davranmağınız və Azərbaycan Respublikası nümayən­də heyətinin etimadnaməsinin ratifikasiya edilməməsi ilə bağlı qətnamənin ləğv olunması xahişi ilə sizə müraciət edir”.

XQ