I yazı
Bu barədə hələlik siyasətçilər və analitiklər susurlar. Reallıq isə ziddiyyətin dərinləşə biləcəyindən xəbər verir. Müəyyən mənada “geosiyasi laqeydlik” adlandıra biləcəyimiz bu tendensiyanın inkişaf etməsi ehtimalı yox deyildir. Doğrudur, bəzi ekspertlər regionda müşahidə edilən və konstruktiv xarakter daşıyan bir prosesi də vurğulayırlar. Həmin proses Azərbaycanın sülhsevər fəaliyyəti ilə əlaqəlidir.
Yəni, Cənubi Qafqazda geosiyasi mənzərənin konstruktiv istiqamətdə dəyişmə dinamikasından söz açılır və burada Azərbaycanın oynadığı müsbət rol etiraf edilir. Lakin Ermənistan və ona havadarlıq edən müəyyən Qərb dövlətlərinin regiona neqativ təsirinin məğzini arxa plana atmağa çalışırlar. Bu isə çox təhlükəli nəticələr verə bilər. Məsələ birbaşa Azərbaycanla Ermənistan arasında sülh müqaviləsinin imzalanma perspektivi fonunda bütövlükdə regional geosiyasətin mənzərəsindən gedir. Problemin bu tərəfi məhz daha geniş prizmada Cənubi Qafqazda geosiyasi proseslərin istiqamətlərinə baxmağı tələb edir.
Avropa geosiyasi ayrılma xəttində
Ana Palaçio 2019-cu ildə “Project Syndicate” nəşrində dərc etdirdiyi məqalədə yazırdı ki, “Avropa geosiyasi ayrılma xəttindədir”. İspaniyalı müəllif məqaləsində o dönəmdə BMT Baş Katibi olmuş Antonio Quterreşin qlobal geosiyasətdə “böyük çatlama” ifadəsini nümunə kimi göstərmişdir. A.Quterreş ABŞ və Çinin liderliyi ilə dünyanın geosiyasi mənzərəsinin “iki savaşan və rəqabət aparan” düşərgəyə bölünmə riskinin artıdığından bəhs etmişdir. Bu da beynəlxalq nizamı poza bilər.
İndi isə yazırlar ki, bu ehtiyatlılıq nəinki özünü doğruldur, hətta artıq “dərin uçurum” yaradır, müxtəlif regionlarda “geosiyasi xətt sınır” və ya bütövlükdə “geosiyasi ayrılma xətləri genşlənir”.
Nümunə kimi, 2021-ci ildə Türkiyənin ANKASAM Beyin Mərkəzində Mustafa Cem Koyunçunun AUKUS-un yaranması ilə “yeni geosiyasi ayrılma xəttinin” formalaşmasından yazmasını və Pyotor Yakovlevin “Perspektivi” jurnalında “beynəlxalq münasibətlər sistemində əsas ayrılma xətləri”ni təhlil etməsini göstərmək mümkündür.
Məsələ yalnız alimlər, analitiklər və ya ekspertlərin dəyərləndirmələri ilə məhdudlaşmır – bir tərəfdən müxtəlif regionlarda gedən geosiyasi proseslər, digər tərəfdən siyasətçilərin özlərinin qiymətləndirməsi təsdiq edir ki, artıq geosiyasi sınma xətləri və geosiyasi çatlama istiqamətləri bir çox regionda real trekə çevrilir. Mövcud aspektdə hazırda ən həssas regionlar sırasında Cənubi Qafqaz heç də sonuncu yerdə deyildir.
Kənardan “əsən sərt küləklər”: turbulentlik şəraitində “situativ sülh”
İndi siyasətçilər daha çox Azərbaycanla Ermənistan arasında münasibətlərin normallaşması ətrafında regiona təsir etməyə cəhd göstərirlər. Bu oyunda Rusiya ilə yanaşı və hətta daha çox ABŞ və Avropa İttifaqının bir sıra böyük dövlətləri canfəşanlıq edirlər. Hər üçü eyni faktor üzrə üstünlüyü ələ almağa çalışır – Azərbaycanla Ermənistan arasıda tarixi, siyasi, geosiyasi ədalət prinsipi ilə deyil, öz maraqlarına uyğun sülh yaratmağa cəhdlər göstərir. Hər birinin öz diplomatik ibarəsi vardır. Rusiya regionda ənənəvi mövcudluğunu və bölgə dövlətləri ilə ümumi tarixə malik olmasını, xalqların dostluğunu və başqa duyğusal faktorları qabardır. Qərb isə demokratiya, liberalizm, insan haqları, azad inkişaf və sair kimi əzbərlədiyi və artıq gəlişi gözəl anlayışlar kimi qəbul edilən rəvayətlər danışır.
Hər iki tərəfin fəaliyyətində səmimilik və ədalətlilik görünmür. Belə bir şərt daxilində davamlı sülhün necə ola biləcəyini heç özləri də bilmirlər. Bir sıra ekspertlər isə hesab edirlər ki, Qərb və Rusiyanın indiki fəaliyyəti yalnız situativ sülh” deyilən vəziyyəti yarada bilər.
“Situativ sülh” o deməkdir ki, davamlı, qalıcı, real faktorlara əsaslanan və tərəflərin tam qəbul etdiyi sülhdən deyil, situasiyaya uyğunlaşdırılmış və buna görə də situativ şərtlər dəyişən zamanı barışın da sona çatacağı müvəqqəti razılıqdan söhbət gedir. Bu cür gedişat yalnız və yalnız onu təşkil edənlərə müvəqqəti sərf edir. Lakin Azərbaycan və Ermənistanı sülhə qovuşdurmur.
Müvəqqəti sülh görüntüsünü yaratmaqda Qərbə züy tutanlardan biri də Ermənistandır. Ən pisi də bundan ibarətdir. Çünki maraqlı tərəflərdən biri psevdosülh yolunu tutursa, bütövlükdə normallaşma ehtimalı çox aşağı düşür. Bu mənada Ermənistan da Cənubi Qafqazda “geosiyasi ayrılma xətti”nin yaranmasında və bütövlükdə gedişatın geosiyasi parçalanmaya aparılmasında iştirakçıdır!
Bu prosesdə daha çox risk yaradan faktorlar sırasında rəsmi İrəvanın özündən yeni-yeni “sülh şərtləri” uydurması ayrıca neqativ yer tutur. Son olaraq, Ermənistan rəsmilərinin məlum 2020-ci il 10 noyabr Bəyannaməsinin qüvvədən düşdüyündən və müqavilənin ancaq Qərb paytaxtlarının birində imzalana biləcəyindən söz açmaları onun misallarından biridir. Üstəlik, N.Paşinyan özündən “Azərbaycan əldə edilən razılaşmalara əməl etsə” şərtini çıxarmışdır. Birincisi, söhbət hansı razılaşmalardan gedir? İkincisi, indiyə qədər əldə olunan real razılaşmaları məhz Ermənistan pozmuşdur, Azərbaycan isə daim ona əməl etmişdir. Biz siyahını tuta bilərik, lakin o, çox uzun olacaqdır və keçən əsrin 90-cı illərinin əvvəllərindən bu yana olan müddətdə rəsmi İrəvanın bəd əməllərini əks etdirəcəkdir. Sadəcə, BMT-nin məlum 4 Qətnaməsinə əməl etməməsini xatırlamaq kifayətdir.
Bu faktlar onu göstərir ki, Ermənistan kənar təsirlər nəticəsində real olaraq sülhə deyil, regionda meydana gələ biləcək geosiyasi turbulentlikdən istifadə edərək, yenidən qarşıdurma yaratmağa meyllənir. Buna görə də Azərbaycan Prezidenti “Ermənistan revanşizmin baş qaldırmayacağına tam zəmanət verməlidir” xəbərdarlığını etməkdə tam haqlıdır.
Bu xəbərdarlıq həm də dövlətimizin başçısının mövcud vəziyyəti, kifayət qədər dərindən bildiyini və ona uyğun mövqe tutduğunu göstərir. Konkret olaraq, Azərbaycan Türkiyə ilə birlikdə regiona real və qalıcı sülh gətirəcək xəttini davam etdirir. Rəsmi Bakının son zamanlar Türkiyənin də danışıqlarda iştirakını vurğulamaq zərurəti bu baxımdan çox əhəmiyyətlidir.
Buradan vacib bir geosiyasi nəticə çıxarmaq olar: Cənubi Qafqazda regional geosiyasi çatlamanın qarşısını yalnız Azərbaycan–Türkiyə birliyi ala bilər. Burada Rusiyanın da müsbət rol oynayacağı istisna deyildir. Moskva üçün bu, bir çox aspektlərdə müsbət divident gətirərdi.
Beləliklə, Cənubi Qafqazın geosiyasi turbulentlikdən Azərbaycanın fəallığı ilə qurtulacağı proqnozunu vermək olar. Bakının qətiyyəti, ədalətli, obyektiv davranışı və sülhsevər mövqeyindən uzaqlaşmaması belə qənaətə gəlməyə əsas verir. Buna görə də növbəti və ondan sonrakı müzakirələrin hansı paytaxtda keçirilməsinin elə bir əhəmiyyəti yoxdur. Azərbaycan Vaşinqtonda da, Parisdə də, Brüsseldə də, Moskvada da eyni mövqedə olacaq! Bizcə, daha ədalətli və nəticə verə biləcək müzakirələr gec və ya tez İstanbulda olacaq!
F.MƏHƏMMƏDOĞLU
XQ