Paşa ƏMİRCANOV
[email protected]
Ermənistanda yenidən ara qarışıb. Bəzi ictimai qüvvələr – “HayaKve” (Ermənistan referendumu və “Haya Vote”) təşəbbüsünün tərəfdarları parlamentin qarşısında toplaşaraq ölkənin Cinayət Məcəlləsinə iki bəndin əlavə edilməsini təklif edirlər. Əslində layihə bütünlüklə təşəbbüs tərəfindən irəli sürülüb. Birinci təklif belədir: “Ermənistan Respublikasının adından çıxış edən və öz hərəkətləri ilə “Artsax”ı başqa dövlətin bir hissəsi kimi tanıyan dövlət məmuru 10 ildən 15 ilədək müddətə azadlıqdan məhrumetmə ilə cəzalandırılır”.
İkinci təklif isə Ermənistan Respublikası adından çıxış edən, öz bəyanatları və digər hərəkətləri ilə 1915-ci ildə Osmanlı imperiyasında “erməni soyqırımı” faktını inkar edən və ya onun tarixi əhəmiyyətini və təhlükəsini azaldan dövlət məmurunun 10 ildən 15 ilə qədər bir müddətə azadlıqdan məhrumetmə ilə cəzalandırılmasını nəzərdə tutur.
“HayaKve” ictimai-siyasi təşəbbüsü Ermənistan parlamentinin binası qarşısında dövlət və hüquq məsələləri komitəsində baxılan qanun layihəsinə dəstək məqsədilə mitinq keçirir və təşəbbüsü dəstəkləyənlərin hamısını parlamentin qarşısına dəvət edərək aksiyaya qoşulmağa çağırır.
Bu, hələ işin yarısıdır. Ermənistanın Cinayət Məcəlləsinə təklif edilən əlavələrin nəzərə alınıb-alınmayacağı hələ məlum deyil. Hökumətin separatçı “Artsax” rəhbərlərini tanımaqdan və onları maliyyələşdirməkdən imtina etdiyi məlumdur. Üstəlik, baş nazir keçmiş “Dağlıq Qarabağ” da daxil olmaqla Azərbaycanın ərazi bütövlüyünü tanıyıb. Son vaxtlar sülh müqaviləsi və sərhədlərin delimitasiyası ilə bağlı danışıqlar da intensivləşməkdədir. Odur ki, “HayaKve”nin təşəbbüsünün nəzərə alınacağı şübhə doğurur.
Maraqlı olan Ermənistanda ictimai xadim və publisist kimi tanınan Ovanes İşxanyanın parlamentin binası yaxınlığında jurnalistlərə dedikləridir. “HayaKve” təşəbbüsünün aksiyasına qatılan İşxanyan deyib: “Erməni Artsaxının səhifəsini bağlanmış hesab etmək mümkün deyil, çünki Artsax bizim mülkümüzdür və bu, bizim Vətənimiz, əcdadlarımızın məskənidir”.
Onun sözlərinə görə, “Artsax”ı ağlınızdan çıxarmaq eyni şeyi Ermənistana münasibətdə də tədricən etmək deməkdir: “Əgər biz Artsaxın olmaması faktı ilə barışa bilsək, onda Sünikin olmayacağı, Tavuş ərazilərinin təslim olacağı və erməni dövlətçiliyinin olmaya biləcəyi ilə də barışa bilərik”.
Onun fikrincə, “Artsax” xalqının geri qayıtması üçün imkanlar yaratmaq məqsədilə “Artsax” uğrunda mübarizəyə müdaxilə edənləri kənarlaşdırmaq lazımdır: “Bu maneənin aradan qaldırılması yolunda Ermənistanda, təbii ki, əməkdaşlıq mədəniyyəti formalaşmalıdır. “AyaKve” təşəbbüsü bu mədəniyyəti formalaşdıranlardan biridir”.
Təşəbbüsün koordinatoru Avetik Çalabyan isə az qala “Artsax”ın itirildiyi ilə barışıb və hesab edir ki, bu gün başlanan mübarizə onun nə vaxtsa “qaytarılması üçün açar ola bilər”. O deyir: “Artsax orada yaşayanlara məxsusdur. Əgər bu gün onlar vəziyyətin tələbi ilə Ermənistanda yaşayırlarsa, hər şeyi etmək lazımdır ki, nə vaxtsa Artsaxa qayıda bilsinlər. “HayaKve” bizə, bax, bunu etməyə imkan yaratmaq istəyir”.
Budur, Ermənistanda bir çoxları bu ilin 19-20 sentyabr hadisələrindən sonra Qarabağ ermənilərinin könüllü surətdə ərazini tərk etməsindən peşman olublar. İndi “bəlkə də qaytardılar” prinsipi ilə fəaliyyət göstərməyə çalışırlar. Amma bizim atalar sözlərindən birində deyilir ki, daldan atılan daş topuğa dəyir. Ermənistanda belə daşların hara dəydiyini bilməsək də, görürük ki, artıq qatar gedib və özü ilə təxminən 30 illik bir müddətdə yaşadıqları ərazidə böyük günahlara batmış bir toplumu – Qarabağ ermənilərini də aparıb.
Təbii ki, bu köç zamanı Azərbaycanın xoş niyyəti, ermənilərə Qarabağda qalıb həyatlarını davam etdirmələri ilə bağlı çağırışları nəzərə alınmadı. Təəssüf ki, Ermənistan və qondarma separatçı rejimin başbilənləri regionda dinc yanaşı yaşamaq əvəzinə, ermənilərin köçündən Bakı əleyhinə sui-istifadə etmək xətti götürdülər. Bax, erməni havadarlarının bu gün Bakıya iftiralar ataraq, təzyiqlər göstərmək cəhdi də məhz Ermənistan siyasilərinin hoqqabazlığından başqa bir şey deyil. Guya Fransa, ABŞ, yaxud Avropa İttifaqı Qarabağdan könüllü şəkildə getmiş erməniləri geri qaytaracaq. Amma bütün bunlar xam xəyallar olaraq qalır.
Elə Ermənistan parlamentinin qarşısında “Artsax”a gün ağlamaq istəyənlərin təşəbbüsü də, beləcə, nəticəsiz cəhd olaraq qalacaq. Artıq hökumətin parlament binası qarşısına polis qüvvələrini cəlb etdiyi barədə də xəbərlər gəlməkdədir. Görünür, bu ölkədə daldan atılan daşlar polis dəyənəyi ilə bilikdə topuğa deyil, başa dəyir...