Bugünlərdə Avropa İttifaqının rəsmisi Peter Stanonun Ermənistanın “Armenpress” xəbər agentliyinə verdiyi müsahibəsində əksini tapmış təxribatçı və ayrı-seçkilik xarakterli açıqlamaları regionda vəziyyəti gərginləşdirməyə yönəldiyindən ölkəmizin rəsmi etirazı ilə cavablandırıldı.
Qərbi Azərbaycan İcması da həmin müsahibədə, guya, ermənilərin Azərbaycanda etnik təmizləməyə məruz qalması iddiasının müqabilində azərbaycanlıların 35 il əvvəl Ermənistandan son nəfərinədək qovulması gerçəyinin üstündən sükutla keçilməsini siyasi riyakarlıq və ölkəmizə qarşı bədxah münasibət kimi qarşılayıb. İcmanın bununla bağlı bəyanatında bildirilir ki, Aİ rəsmisi Azərbaycanın Qarabağ bölgəsindən Ermənistana köçmüş ermənilərin qayıtmaq hüququ barədə danışdığı halda, Ermənistandan qovulmuş 300 min azərbaycanlının qayıdışı barədə heç nə deməmişdir:
– Bu, etnik və dini zəmində ayrı-seçkilikdir. Xatırladaq ki, dəfələrlə etdiyimiz müraciətlərə baxmayaraq, Aİ bizim qayıdış hüququmuz barədə mövqeyini ictimai şəkildə ifadə etməkdən imtina edir. Bundan başqa, Aİ rəsmisi Ermənistanın ərazi bütövlüyünün qorunmasından müqəddəs vəzifə kimi dəm vuraraq, Azərbaycanı təhdid etmişdir. Əvvəla, Aİ-yə yaxşı məlumdur ki, Azərbaycan bütün dövlətlərin ərazi bütövlüyünə və suverenliyinə hörmətlə yanaşır.
Bundan əlavə, 30 il ərzində Azərbaycanın ərazi bütövlüyünü pozmuş, işğal etdiyi Azərbaycan ərazilərindən yüz minlərlə azərbaycanlını qovmuş və Azərbaycanın minə yaxın şəhər və kəndini dağıtmış Ermənistanın əməllərinə göz yuman Aİ-nin indi Ermənistanın heç bir təhdid altında olmayan ərazi bütövlüyünün müdafiəsinə qalxması ikiüzlülükdür.
Sənəddə daha sonra deyilir ki, Aİ rəsmisinin Azərbaycanın “Qarabağda birtərəfli hərbi addım atması”ndan əndişələnməsi riyakarlıqdır:
– Azərbaycan öz suveren ərazisində əməliyyat keçirməyə görə heç kimdən, o cümlədən Aİ-dən icazə almır və heç kimə hesabat vermir. Qarabağda beynəlxalq qüvvələrin mövcudluğunun vacibliyini vurğulayan Aİ, gedib belə missiyaların Aİ ölkələrinə, məsələn, irqçilik və islamofobiyanın çiçəkləndiyi, Korsika dilinin qadağan edildiyi Fransaya və ya rus etnik azlığına qarşı ayrı-seçkilik siyasəti yeridən Litvaya göndərilməsi ilə məşğul olsun.
Aİ Azərbaycanın daxili işlərinə müdaxilə kimi düşük və təkəbbürlü əməllərinə son qoymalı, bölgədə vəziyyəti gərginləşdirən ikiüzlü və ayrı-seçkilik siyasətindən əl çəkməli, Ermənistanın silahlandırılmasını dayandırmalı və bu ölkədən qovulmuş azərbaycanlıların öz evlərinə qayıtmaq hüququna hörmət etməlidir.
Hazırladı:
T.RÜSTƏMLİ
XQ
