Bu gün dünyada gərgin siyasi proseslər gedir, faktiki olaraq yeni düzən formalaşır. Bu, planetin gələcəyi üçün olduqca mühüm önəmi olan bir hadisədir. Əlamətdar haldır ki, Türkiyə dövləti bu mühüm prosesdə qlobal güc mərkəzi olaraq iştirak edir.
Bakı Dövlət Universitetinin Türk filologiyası kafedrasının müdiri, filologiya elmləri doktoru, professor, yazıçı-publisist Rüfət Rüstəmov Türkiyənin dünya siyasəsətində yeri və rolu barədə söz düşəndə bunları dedi:
– Əvvəla onu qeyd etmək lazımdır ki, müasir Türkiyə zəngin ənənələri olan sivil, demokratik ölkədir. Bu il mayın 14-ü və 28-də bu ölkədə keçirilən prezident seçkiləri bunu bir daha təsdiq etdi. Ankara bu prosesdən daha güclü və qüdrətli bir siyasət mərkəzi olaraq çıxdı.
Seçkilərin təkcə Türkiyə üçün deyil, bütün region dövlətləri, eləcə də türkdilli xalqlar üçün böyük əhəmiyyəti var idi. Belə ki, bu gün dünyanın yeni düzəni formalaşır. Bu proses artıq həlledici mərhələyə qədəm qoyub. Belə bir taleyüklü məqamda Türkiyənin güclü və qüdrətli olması son dərəcə vacibdir.
Türkiyənin güclənməsinin qarşısını almaq istəyən bədnam qüvvələr var və bunu hətta açıq şəkildə etiraf edirlər. Amma onlar unudurlar ki, türk ruhu hər zaman güclüdür və heç vaxt yenilməyib. Türklər müstəqil dövlət qurmağı bacaran və onu yaşadan xalqlardandır. Onlar tarix boyu 25-dən çox dövlət və imperiyalar qurublar. Bu gün Türkiyə hər zaman olduğundan daha güclüdür və haqqın-ədalətin dayanan, sözünü deyən bir ölkədir.
Bu məqamda bir faktı yadınıza salmaq istəyirəm. Məlumdur ki, Osmanlı imperiyası Birinci Dünya Müharibəsində məğlub olmuşdu və onun torpaqlarının bir hissəsini qalib dövlətlər yağmalamışdı. Bu, düşmənlərin sevincinə səbəb olmuşdu. Amma onlar türk ruhunun nəyə qadir olduğunu unutmuşdular.
Qərbin heç gözləmədiyi bir halda ortaya Qazi Mustafa Kamal Atatürk kimi bir qəhrəman sərkərdə çıxdı və milli gücləri öz ətrafında birləşdirərək Qurtuluş Savaşına başladı. “Əhalisi, əsasən, türklərdən ibarət bölgələr türk sərhədi olaraq da qalmalıdır” fikrindən yola çıxan mübarizlərin 30 avqust 1922-ci ildə Meydan Savaşını qazanması nəticəsində işğalçı güclər indiki Türkiyə torpaqlarından geri çəkilməyə məcbur oldular.
İstanbulun qurtuluşundan sonra isə Lozanna sülh müqaviləsi imzalandı: Osmanlı imperiyası tarix səhnəsindən silindi, yerində yeni dövlət – Türkiyə adlı respublika quruldu. 29 oktyabr 1923-cü ilə qədər sürən danışıqlardan sonra Cümhuriyyətin yaranması və Ankaranın paytaxt olması bütün dünyaya bəyan edildi. Fəxrlə demək lazımdır ki, bizim müdrik ulu babalarımız o ağır günlərdə türk qardaşlarının yanında olublar.
Bu gün bu cümhuriyyətin 100 yaşı tamam olur. Bu an qeyri-ixtiyari olaraq qəlbimdən dilimə Böyük Atatürkün söylədiyi bu ecazkar sözlər axır: Nə mutlu türkəm deyənə!
Hazırda Türkiyə dünyanın ən sivil və demokratik dövlətlərindən biridir. Xoşbəxtlikdən son iyirmi ildə qardaş ölkəyə çağdaş dünyanın ən müdrik və xarizmatik siyasətçilərindən olan Rəcəb Tayib Ərdoğan rəhbərlik edir. Onu haqlı olaraq “Əzilən dünyanın gur səsi” adlandırırlar. “Dünya beşdən böyükdür!” deyən Türkiyə lideri qlobal siyasətdə mərdliyin, mənəviyyatın, ədalətin rəmzinə çevrilib. Bütün bunlar bizim gözlərimiz önündə cərəyan edir. Bundan necə qürur duymamaq olar!
Azərbaycan–Türkiyə dostluğu və qardaşlığı əbədi və sarsılmazdır! Xalqımızın üç il bundan əvvəl Qarabağda düşmənə qarşı apardığı 44 günlük şanlı savaş günlərində də türk qardaşlarımız bizimlə birlikdə olublar. Qədirbilən Azərbaycan xalqı bunu heç vaxt unutmayacaq!
Bu gün möhtərəm prezidentlərimiz, müzəffər Ali Baş Komandan İlham Əliyevin və Rəcəb Tayyib Ərdoğanın şəxsi dostluq münasibətlərinə bütün dünya heyran qalıbdır. Dostlarımız buna görə çox sevinir, şad olur, düşmənlər isə qəm dəryasına düçar olurlar.
Bakı və Ankara əl-ələ verərək regionda sülhü, təhlükəsizliyi və sabitliyi qorumaq üçün çalışır. Azərbaycan regionun iqtisadi lokomotivinə çevrilir. Düşünürəm ki, türk dünyasını quru yolla birləşdirəcək Zəngəzur dəhlizinin açılması zamanın tələbidir və bu, mütləq həyata keçiriləcək.
Əlahəzrət Zaman Türkiyənin və dünyadakı bütün türklərin xeyrinə işləyir. Üfüqdən regiona və bütün dünyaya sülh və təhlükəsizlik missiyasını icra etməyə hazır olan Böyük Turan boylanır.
Söhbəti qələmə aldı:
Məsaim ABDULLAYEV
XQ