Hacıqabul Sənaye Məhəlləsində ilin əvvəlindən 50 milyon manatlıq məhsul istehsal olunub

Prezident İlham Əliyevin qarşıya qoyduğu dayanıqlı iqtisadiyyat və inklüziv cəmiyyət hədəfləri günümüzün reallığına çevrilib. Məhz bunun nəticəsidir ki, 2003-cü ildən başlayaraq ötən zaman ərzində reallaşdırılan strategiya sayəsində milli iqtisadiyyatın real xərci 4 dəfə, ixrac 15,6 dəfə artıb. İqtisadiyyatın orta artım tempi dünya üzrə orta səviyyədən 4 faiz yüksək olub. 

Son illərdə qeyri-neft sektorunun inkişafında mühüm rol oynayan səna­ye zonalarının yaradılması da diqqət mərkəzində saxlanılıb. Bunun nəticəi­dir ki, indiyədək respublikada 7 sənaye parkı və 5 sənaye məhəlləsi istifadəyə verilib. Həmin sənaye zonalarında ümumi investisiya dəyəri 7,18 milyard manat olmaqla 131 sahibkarlıq sub­yektinə rezident statusu verilib və on­lardan 68-i, yaxud 51,9 faizi istehsal fəaliyyətinə başlayıb. Sənaye zona­larına 6,56 milyard manat investisiya yatırılıb və 10 min 600-dən çox daimi iş yeri açılıb.

Sənaye parkı və məhəllələrində ötən müddət ərzində, ümumilikdə, 10,23 milyard manatlıq məhsul isteh­sal edilib və onun 3,35 milyard manat­lıq hissəsi ixrac olunub. Cari ilin birinci yarısında isə bu müəssisələrin satdığı 1,4 milyard manat dəyərində məhsulun 33,2 faizi, yəni 470,6 milyon manatlığı ixraca yönəldilib. Bu dövrdə sənaye zonalarının qeyri-neft sektorunda xü­susi çəkisi isə 16,5 faiz, qeyri-neft sə­naye məhsullarının ixracında isə 20,7 faiz (470,6 milyon manat) olub. Ötən 9 ayda sənaye zonalarının müəssisələ­rində məhsul istehsalının dəyəri 2022-ci ilin eyni dövrü ilə müqayisədə 7 faiz artaraq 2,3 milyard manata çatıb. Bu­nun da 31,2 faizi 50-dən artıq ölkəyə satılıb. 

Sənaye zonalarının dinamik inkişafı Hacıqabul Sənaye Məhəlləsində fəa­liyyət göstərən “Penoplex Prikavkaz­ye” MMC-nin istilik izolyasiya lövhələri­nin istehsalı müəssisəsinin timsalında daha aydın nəzərə çarpır. İqtisadiyyat Nazirliyinin İqtisadi Zonaların İnkişafı Agentliyinin məlumata görə, innova­tiv texnologiya əsasında müəssisədə istilik izolyasiya lövhələrinin istehsalı həyata keçirilir və istehsal prosesində xammal kimi ümumi təyinatlı polistirol­dan istifadə edilir. 100 faiz Rusiya kapi­talı olan müəssisənin investisiya dəyəri 18,4 milyon manatdır. 

İllik istehsal gücü 100 min kubmetr olan müəssisədə istehsal olunan məh­sulların 60 faizinin daxili, 40 faizinin isə xarici bazarlara satılması planlaşdırılır.

Sənaye məhəlləsinin 6,7 hektar ərazisində inşa edilmiş müəssisə döv­lət vəsaiti hesabına hazır infrastruk­turla (qaz, işıq, su, kanalizasiya, yol) təmin olunub. Eyni zamanda, İqtisadiy­yat Nazirliyi tərəfindən verilmiş inves­tisiya təşviq sənədi sayəsində texnika, texnoloji avadanlıqlar və qurğuların idxalına görə 12,9 milyon manat vəsa­itə qənaət (gömrük rüsumu və ƏDV) edilib.

Xatırladaq ki, Hacıqabul Sənaye Məhəlləsi mikro, kiçik və orta sahib­karların fəaliyyətinin dəstəklənməsi, qeyri-neft sektorunun davamlı inkişa­fının təmin edilməsi, əhalinin istehsal sahəsində məşğulluğunun artırılması məqsədilə dövlət başçısının 2017-ci il 25 iyul tarixli sərəncamı ilə yaradılıb. 200 nəfərdən çox insanın daimi işlə təmin edildiyi bu sənaye məhəlləsin­də ümumi investisiya həcmi 163 mil­yon manatdan çox olan 14 sahibkarlıq subyekti rezident kimi qeydiyyatdan keçib və bunlardan 8-i artıq fəaliyyətə başlayıb. Mövcud layihələr üzrə əlavə olaraq sənaye məhəlləsinə 120 milyon manata yaxın investisiyanın yatırılma­sı, 1500-dən artıq iş yerinin yaradılma­sı nəzərdə tutulub.

2023-cü ilin 9 ayında Hacıqabul Sənaye Məhəlləsində 50 milyon ma­natlıq məhsul istehsal edilib ki, bu da əvvəlki ilin eyni dövrü ilə müqayisədə 97 faiz artım (2022-ci ilin 9 ayında 25,8 milyon manatlıq məhsul istehsal edilib) deməkdir.

İndiyədək sənaye məhəlləsinin re­zidentləri tərəfindən 95 milyon manata yaxın məhsul istehsal olunub ki, bunun da 1 milyon manatlıq hissəsi ixracın payına düşür.

XQ