Rəsmi Vaşinqton artıq nəzərlərini Orta Asiya dövlətlərinə də yetirməyi qərara alıb. Ağ evdə başa düşüblər ki, zəngin təbii ehtiyatları və insan resursları olan bu regionu gözardı etmək olmaz. Ən azı ona görə ki, ABŞ-ın əsas rəqibi hesab olunan Çin artıq bölgədə xeyli güclənib.
Bir müddət əvvəl qlobal mediada belə bir məlumat yayıldı ki, Prezident Co Bayden BMT Baş Assambleyasının növbəti 78-ci sessiyasında iştirak edən Orta Asiya dövlətlərinin liderləri ilə Nyu-Yorkda görüşməyi planlaşdırır. Bu, kifayət qədər diqqətçəkən bir xəbər idi, çünki bu vaxta qədər belə bir formatda görüş keçirilməmişdi.
Nəhayət, sentyabrın 20-də ABŞ-nin dövlət katibi Entoni Blinkenin də iştirak etdiyi tədbirdə Prezident Co Bayden Qazaxıstan, Özbəkistan, Qırğızıstan, Tacikistan və Türkmənistanın dövlət başçılarını salamlayıb bildirdi ki, bu, tarixi görüşdür, onun ölkəsi bu əməkdaşlığa böyük önəm verir. Dövlət başçısının sözlərinə görə, qarşılıqlı etimada söykənən sıx əməkdaşlıq bütün tərəflərə fayda gətirə bilər.
Həqiqətən, “C5+1” platforması Birləşmiş Ştatlar ilə Orta Asiya dövlətləri arasında hərtərəfli əlaqələrin genişlənməsi üçün yeni imkanlar açır. Ağ ev, ilk növbədə, region ölkələri ilə beynəlxalq terrorizmə qarşı mübarizədə sıx əməkdaşlıq etmək niyyətindədir. Bundan başqa, amerikalı iş adamları üçün Orta Asiyanın özəl sektoru kifayət qədər cəlbedicidir.
Rusiya ilə Çinin əhatəsində yerləşən Orta Asiya dövlətləri adları çəkilən hər iki böyük ölkə ilə geniş əlaqələrə malikdirlər. Düzdür, region dövlətlərinin Rusiya ilə münasibətlərinin tarixi iki yüz ilə yaxın bir müddəti əhatə edirsə, Çinlə sıx birbaşa əlaqələr yalnız son bir neçə onillər ərzində başlayıb və yüksələn xətlə inkişaf edir.
Yeri gəlmişkən, Çinin regionda “çəkisi”nin artması Vaşinqtonu çox narahat edir. Amma Pekini bölgədən sıxışdırıb çıxarmaq o qədər də asan deyil. Ona görə ki, Qədim İpək Yolunun üzərində yerləşən Orta Asiya ölkələri Orta Dəhliz vasitəsilə həm Çin, həm də Avropa ilə ticarət əlaqələrini genişləndirməkdə maraqlıdırlar.
Eyni zamanda region dövlətləri üçün ABŞ-la hərtərəfli əməkdaşlıq yeni fürsətlər yaradır. Bir tərəfdən onlar özlərini daha təhlükəsiz bir “çətir” altında hiss edəcəklər, o biri tərəfdən də bölgə iqtisadiyyatının ABŞ sərmayəsinə böyük ehtiyacı var.
Maraqlıdır ki, görüşdə iştirak edən dövlət başçılarının heç biri tədbir başa çatandan sonra mətbuata hər hansı bir açıqlama verməyib. Görünür, təcrübəli dövlət başçıları nə Moskvanı, nə də Pekini qıcıqlandırmaq istəməyiblər.
ABŞ-dakı nüfuzlu Pitsburq Universitetinin professoru Cenifer Brik Murtazaşvili “C5+1” platformasında əməkdaşlığa start verilməsini uğurlu addım hesab edir. O, jurnalistlərə bu məsələ ilə bağlı bildirib ki, hələ bu vaxta qədər Birləşmiş Ştatların heç bir prezidenti Orta Asiya dövlətlərinə bir dəfə də olsun səfər etməyib. Yəni Vaşintqon bu regionun əhəmiyyətini layiqincə dəyərləndirməyib. Bəlkə, bundan sonra dəyərləndirdi.
Ağ evin Milli Təhlükəsizlik Şurasının keçmiş əməkdaşı Erik Qrin isə “Amerikanın səsi”nin Özbəkistan xidmətinin müxbirinə bildirib ki, Rusiyanın Ukraynaya hücumu bir çox ölkələri, eləcə də Orta Asiya dövlətlərini öz xarici siyasət prioritetlərinə yenidən baxmağa sövq edib. Onun fikrincə, Nyu-Yorkdakı görüş iki mühüm amildən qaynaqlanır. Birincisi, Rusiyanın Ukraynaya hərbi təcavüzündən sonra MDB məkanında yeni geosiyasi reallıqlar yaranıb. Bu, Orta Asiya liderlərini də ehtiyatlandırır.
İkincisi, regionun özündə ciddi inteqrasiya prosesləri gedir. Burada dövlətlərin rəsmiləri arasında tez-tez görüşlər keçirilir. Liderlər başa düşürlər ki, qarşılıqlı əməkdaşlıq regionda sabitlik və inkişaf üçün də meydan yaradır.
Ağ ev regiona təkcə sabitlik deyil, həm də sərmayə gətirə bilər. Bunu Türkmənistanın 41 yaşlı Prezidenti Sərdar Berdiməhəmmədov da dərk edir. O, üç gün əvvəl BMT tribunasından çıxış edərkən deyib ki, Orta Asiya respublikaları üçün ABŞ-la hərtərəfli əlaqələr qurmağın vaxtı çoxdan çatmışdır.
Siyasi təhlilçilər belə bir məqama da diqqət yetirirlər ki, C.Bayden görüşdə insan haqları və demokratiya məsələrinə toxunmayıb. Halbuki əvvəllər Vaşinqton həftə səkkiz, mən doqquz bu məsələdə region ölkələrini qınayırdı. Buna baxmayaraq, Orta Asiya dövlətləri Əfqanıstanla müharibə zamanı ABŞ-ı birmənalı olaraq dəstəkləyiblər.
C.Bayden sonda tədbirin səmimi və məhsuldar keçdiyini vurğulayıb və növbəti görüşün məhz Orta Asiya dövlətlərinin birində keçirilə biləcəyinə eyham vurub. Qeyd edib ki, həmkarları ilə yenidən görüşüb müzakirələr aparmaq arzusundadır.
Şahbaz ŞAMIOĞLU,
Slavyan Universitetininprofessoru, siyasi şərhçi:
– Ağ evin hazırkı sahibinin Nyu-Yorkda 5 Orta Asiya dövlətinin prezidentləri ilə görüşüb müzakirələr aparması faktı son vaxtlar dünyada gedən geosiyasi proseslər müstəvisindən nəzərdən keçirilməlidir. Yeni dünya düzəni formalaşır və böyük güclər qüvvələr nisbətini öz xeyirlərinə formalaşdırmağa çalışırlar.
Çinin dünyanın bir çox regionlarında, eləcə də Orta Asiyada siyasi, iqtisadi, hətta hərbi təsirinin artması Vaşinqtonun nəzərindən qaçmayıb. Eyni zamanda, vurğulamaq lazımdır ki, ABŞ dövləti bu istiqamətdə artıq xeyli vaxt itirib və tələsik həmin boşluğu doldurmağa çalışır.
Fikrimcə, Prezident Co Baydenin Orta Asiya dövlətlərinin liderlərinə xüsusu diqqəti məhz bu amillərdən qaynaqlanır.
Yeri gəlmişkən, Nyu-Yorkda “C5+1” paltformasında keçirilən görüş təkcə Orta Asiya respublikaları üçün deyil, Cənubi Qafqaz regionu, eləcə də Azərbaycan üçün böyük önəm daşıyır. Belə ki, ölkəmiz ilə həmin dövlətlərin böyük siyasi, iqtisadi və mədəni əlaqələri var. Rəsmi Bakı regionda sabitliyin qorunub möhkəmlənməsində maraqlı tərəflərdən biridir.
Təsadüfi deyil ki, Azərbaycan Prezidenti cənab İlham Əliyev bir neçə gün bundan əvvəl Mərkəzi Asiya Dövlət Başçılarının Düşənbədə keçirilən 5-ci məşvərət görüşündə iştirak edib. Bu fakt bir daha sübut edir ki, Orta Asiya respublikaları sürətlə inkişaf və tərəqqi edən Azərbaycanı özlərindən ayrı təsəvvür etmirlər.
Məsaim ABDULLAYEV
XQ