Bu il sentyabrın 19-da Azərbaycanın Qarabağda Rusiya sülhməramlı­larının müvəqəti nəzarətində olan ərazilərdə antiterror əməliyyatına başlaması xəbəri dərhal qlobal medianın əsas mövzularından birinə çevrilib. Bu hadisə, səbəblər və gözləntilər barədə dünyanın aparıcı informasiya agentlikləri, radio və televiziya kanalları operativ xəbər­lər, geniş şərh və rəylər, analitik yazılar təqdim edirlər.

Qeyd etmək lazımdır ki, beynəlxalq KİV hadisələrin mahiyyətini müxtəlif ra­kurslardan işıqlandırmağa çalışır. Bu barədə yazılarda belə bir məqam xüsusi vurğulanır ki, Cənubi Qafqazda aparılan əməliyyatlar beynəlxalq hüquq normala­rına uyğundur və müstəqil Azərbaycanın tamamilə öz ərazi bütövlüyü və suveren­liyini təmin etmək hüququ vardır. 

Türkiyə mətbuatı, xüsusilə, “Anadolu” agentliyi və TRT kanalı Qarabağda ha­disələri diqqətlə izləyir, bu barədə oxucu və tamaşaçıları operativ qaydada məlu­matlandırır. Qardaş ölkənin mediasında bu ölkənin ən yüksək ranqlı rəsmilərinin hadisələrə dair mövqelərini əks etdirən rəylər də geniş yer alır. 

Prezident R.T.Ərdoğanın BMT-nin yüksək tribunasından Azərbaycanın haqq işini birmənalı olaraq dəstəkləməsi, bu ölkənin müdafiə naziri Yaşar Gülərin Tür­kiyənin hər zaman olduğu kimi, bu dəfə də ölkəmizin yanında olması barədə bəyana­tı, eləcə də sadə türklərin “Can Azərbay­can”ı heç vaxt darda qoymayacaqları ilə bağlı ürək sözləri Azərbaycan və Türkiyə dövlətləri və xalqlarının bir-birilə nə qədər yaxın olduğunu bir daha nümayiş etdirir. 

Qərb mediası “dünyanın ən həssas nöqtələrindən biri”nə çevrilən Qarabağ­dakı proseslərə biganə qalmır. “Amerika­nın səsi” radiosu xəbər verir ki, Azərbay­can ordusu Qarabağda “lokal xarakterli antiterror tədbirləri”nə başlayıb: “Rəsmi Bakı hərbi əməliyyatları 2020-ci ilin no­yabrında imzalanmış üçtərəfli Bəyanatın müddəalarının təmin olunması və Azər­baycan konstitusiya quruluşunun bərpa edilməsi məqsədi ilə əsaslandırıb”.

Məlumatda, həmçinin qeyd edilir ki, Azərbaycan mətbuatı Prezident Admi­nistrasiyasının Qarabağ ermənilərinin müraciətinə cavab olaraq rəsmi açıq­lamasını yayıb. Sənəddə hakimiyyətin Qarabağ erməniləri ilə Yevlaxda görüşə hazır olduğu deyilir. Bununla bərabər, açıqlamada əlavə edilir ki, hərbi əmə­liyyatın dayandırılması üçün qanunsuz erməni silahlı dəstələri bütün silahları təhvil verməli və qanunsuz rejim özünü buraxmalıdır.

BBC informasiya agentliyi də Qa­rabağdakı hadisələrə operativ reaksiya verir. Agentliyin şərhçisi “Əməliyyatlar niyə başlandı?” adlı yazıda bildirir ki, döyüşlərin başlanması ərəfəsində altı azərbaycanlı həyatını itirmişdi. “Hadisə qanunsuz erməni silahlı birləşmələrinin əraziyə mina yerləşdirməsi nəticəsində baş vermişdir”. BBC-nin şərhində, həm­çinin qeyd olunur ki, Qarabağda vəziyyət bir neçə ay idi ki, gərgin idi və Azərbay­canın belə bir əməliyyata başlayacağı gözlənilirdi. 

Yeri gəlmişkən, sentyabrın 19-da Ermənistanın baş naziri Nikol Paşin­yan təhlükəsizlik şurasının iclasını ke­çirib. Dünyanın əksər mətbu nəşrləri bu barədə məlumat yayıblar. Bildirilir ki, baş nazir Azərbaycanın Qarabağda keçirdiyi hərbi əməliyyatlarla bağlı ABŞ dövlət katibi Antoni Blinken və Fransa Prezidenti Emmanuel Makronla telefon­la danışıb. Paşinyan canlı yayımla çıxış edərək onu da vurğulayıb ki, Ermənistan Azərbaycanla hərbi əməliyyatlara cəlb olunmayacaq.

Təəssüf ki, erməni lobbisinin təsirinin güclü olduğu Fransa mediası Azərbay­cana qarşı qərəzli və əsassız məlumatlar yayır. Bu yazılarda, guya, Azərbaycan tərəfinin Qarabağda mülki əhalini və in­frastrukturu hədəfə aldığı iddia olunur. Bütün bunlar, təbii ki, dezinformasiya xarakteri daşıyır.

Dünən İrəvanda ictimai-siyasi vəziy­yət yenidən kəskinləşib. Belə ki, Paşin­yanın Qarabağla bağlı çıxışından sonra Yerevanda hökumət evinin qarşısında etirazlar başlayıb. Etirazçılar Ermənis­tan hakimiyyətindən Qarabağdakı əmə­liyyatlara müdaxilə etməyi tələb ediblər. TASS agentliyinin yazdığına görə, aksiya iştirakçıları Rusiya səfirliyinin çıxışını da bağlayıblar.

Sosial şəbəklər də Cənubi Qafqaz­da gedən proseslərə biganə qalmırlar. Hazırda “Facebook”, “Telegram”, “İns­tagram” və sair şəbəkələrdə bu barədə çeşidli fikir və mövqelər sərgilənir. Təq­dirəlayiq haldır ki, sosial şəbəkələrdə Azərbaycanın haqq işini dəstəkləyənlərin sayı durmadan artır. 

Dünən axşam saatlarında məlum oldu ki, Qarabağda lokal xarakterli anti­terror tədbirlərinin dayandırılması barədə tərəflər arasında razılıq əldə olunub. Hə­min xəbərdə bildirilib ki, Qarabağın ermə­ni sakinlərinin nümayəndələrinin Rusiya sülhməramlı kontingenti vasitəsilə müra­ciətini nəzərə alaraq 2023-cü il sentyab­rın 20-də saat 13:00-da bir sıra şərtlər altında antiterror tədbirləri dayandırılır. 

Bu xəbər də həm qlobal media, həm də sosial şəbəkə izləyiciləri tərəfindən müsbət qarşılanıb. Bu barədə paylaşım­larda qeyd olunur ki, ən kövrək sülh belə qanlı savaşlardan yaxşıdır. Bununla da Azərbaycan dövləti və xalqı bəşəri, hu­manist dəyərlərə sadiq qaldığını bir daha nümayiş etdirdi. 

Amma, qarşı tərəf, yəni, ermənilər öz məkrli siyasətlərindən əl çəkməli, sülh şəraitində yaşamağın üstünlüyünü, nəhayət, dərk etməlidirlər. Ümid edək, məhz belə olacaq! Ermənilər daşı ətəklə­rindən töküb sülhə qol qoysalar, regionda sabitlik hökm sürər, inkişaf və rifah üçün meydan açılar. 

Həmid VƏLİYEV,
BDU-nun beynəlxalq jurnalistika və informasiya siyasəti kafedrasının professoru

– Qlobal media Azərbaycan döv­lətinin Qarabağda başladığı antiterror əməliyyatına böyük diqqətlə yanaşır. Bu da səbəsiz deyil. Çünki Cənubi Qafqaz hazırda dünyanın ən həssas bölgələrindən biridir. Təbii ki, burada baş verən gərgin proseslər planetimiz­də yeni dünya düzəninin formalaşma­sına böyük təsir göstərə bilər. 

Təqdirəlayiq haldır ki, dünyanın bir çox nüfüzlu mətbu nəşrləri hadisələr barədə operativ məlumat verməyə ça­lışırlar. Göstərirlər ki, Azərbaycanın öz ərazisində antiterror əməliyyatı apar­mağa tam hüququ var. 

Lakin ermənilərə yaxın olan, ermə­ni lobbisinin təsiri altında olan, xüsu­silə də ermənipərəst Fransa mətbuatı bu günlərdə Azərbaycan barədə say­sız-hesabsız yalan məlumatlar yayır, Qarabağda aparılan əməliyyatlarda mülki şəxslərin, uşaqların, qocaların hədəfə alındığı barədə saxta məlu­matlar tirajlayır. Azərbaycanın rəsmi dairələri bu yalanları vaxtında təkzib edirlər. 

Bizim dostlarımızla rəqibləri­miz arasında Qarabağla bağlı çox­dan informasiya müharibəsi gedir. Əlamətdar haldır ki, əvvəlki dövrələrə nisbətən indi hadisələr daha obyek­tiv şərh olunur. Fikrimcə, sosial şə­bəkələrin də xalqımıza dəstək ver­məsi Azərbaycan diplomatiyasının və mediasının uğuru hesab oluna bilər. 

Yaxşı haldır ki, Azərbaycan döv­ləti, diplomatlarımız, o cümlədən mediamız bu antiterror əməliyyatları ərəfəsində dünya ictimaiyyətini mə­lumatlandıra bilmişdir. Yaxın və zuaq ölkələrin internet televiziyalarında da Azərbaycanın ədalətli mövqe­yii dəstəklənir. Xüsusilə Ukraynanın onlayn televiziyalarında ölkəmizin mövqeyi dəstəklənir. 

Görünən budur ki, hazırda qonşu­su Rusiyanın təcavüzünə məruz qalan Ukrayna Azərbaycanın öz suverenliyi­nin təmin etmək istiqamətində atdığı addımları alqışlayır.

Ceyran CƏFƏRLİ,
Məsaim ABDULLAYEV
XQ