Paşinyanın dünən hökumətin iclasında “humanitar böhran”,
“soyqırımı” ilə bağlı dedikləri nə reallığa söykənirdi, nə də faktlara...
Hayastanın baş naziri və ətrafını çoxqatlı yalan donuna bürüdüyü “həqiqətlərini” dünyaya üfürməkdən yorulmur. Həm də təkcə onun özü deyil, bütün komandası bu ideoloji cəbhədə, dezinformasiya məkanında əməlli-başlı fəallaşıb. Etiraf etməliyik ki, postmüharibə dönəmində ermənilərin Azərbaycanın üzərinə belə genişmiqyaslı “diplomatik yürüşünün” şahidi olmamışdıq.
Yalan məlumatlarla, saxtalaşdırdıqları dosyelərlə, təhrif etdikləri reallıqla təkcə ermənipərəst siyasi dairələri və “müttəfiqlərini” deyil, həmçinin dünyanın nüfuzlu beynəlxalq təşkilatlarını, “hüquq müdafiəçilərini”, “veteran-diplomatları”, “məşhur eks-vəkilləri” səfərbər etməyə çalışan İrəvan və onun kənar dəstəkçiləri bununla nəyəsə nail ola biləcəklərini düşünürlər.
Dünən başçılıq etdiyi hökumətin iclasında “yalan və iftiralar” seriyasından növbəti tezislərini dünyaya, ictimai rəyə üfürən Nikol Paşinyan girovuna çevrildiyi siyasi vəziyyətdən çıxmaq üçün Azərbaycanın ünvanına cəfəng açıqlamar verdi. O, “Dağlıq Qarabağa” daşımaları qadağan edən (?), Laçın dəhlizini (?) qanunsuz olaraq (?) ermənilərin üzünə bağlayan, hətta BQXK-nin vasitəçiliyi ilə humanitar xarakterli uşaq qidalarını və dava-dərmanı (?) bölgəyə buraxmayan Bakını “böhranı dərinləşdirməkdə və genişləndirməkdə” suçladı. İyulun 26-da Ermənistan Respublikası hökumət komisiyasının “Dağlıq Qarabağ xalqı” üçün 19 “tır”dan ibarət humanitar yardımın göndərilməsi barədə qərarından bəhs edən Paşinyan həmin karvanın 17 gündür Sünik (Zəngəzur -red.) vilayətinin Laçın yolu ərazisində saxlanıldığını və Azərbaycanın bu yolla “Dağlıq Qarabağ” ermənilərini soyqırımına (?) məruz qoymağı planlaşdırdığını bəyan etdi.
Baş nazirin heç bir fakta, sübuta söykənməyən, iftira və böhtan xarakterli bu açıqlamasına heç ermənilərin özləri belə inanmırlar,– desək, yanılmarıq. Ən azı ona görə ki, Qarabağ iqtisadi rayonumuzda yaşayan sıravi ermənilərin bu günlərdə Laçın yolu üzərindəki həmin Həkəri sərhəd nəzarət-buraxılış məntəqəsindən sərbəst şəkildə keçmələrinin video-görüntülərini izləyiblər. Eləcə də qaçaqmalçılıq fəaliyyəti sübuta yetirilən BQXK-nin təcili yardım maşınlarının hərəkətini də görməmiş deyillər. Bəs bəzi erməni blogerlərin, ictimai fəalların Xankəndidə, Ağdərədəki restoran, kafe-barların gur işləməsindən, dadlı təamlarla zəngin masaların ətrafında təşkil olunan kef məclislərindən bəhs edən görüntülü paylaşımlarından da xəbərləri yoxdur? Var, həm də çox yaxşı xəbərləri var! Sadəcə görmək istəmədikləri həmin video-dəlilləri beyinlərinin arxa planına salıb, üzlərinə saxtakarlıq maskası taxıb, tək bizimlə deyil, dünya ilə “yalan-palan” oyununa girişiblər.
* * *
“Hamının yadına salmaq istəyirəm ki, həmin 18 “tır”da bu yüklər var: 100 ton un, 80 ton makaron, 60 ton şəkər, 40 ton bitki yağı, 40 ton quru süd, 20 ton duz, 12 ton uşaq qidası, 9 ton tibb ləvazimatı. Cəmi 361 ton humanitar yükdür. Sonradan həmin humanitar yük karvanına “Qrand Kendi” şirkətinin 9 ton şirniyyatı olan iki avtomaşın, Paris meriyasından və Fransanın İl-de-Frans, Overn, Rona-Alpı və digər bölgələrindən 25 ton makaron məmulatı olan bir yük maşını da qoşulub”.
Bu şübhəli humanitar statistikanı hökumət nümayəndələrinin və daxili elektoratın diqqətinə çatdıran Hayastanın baş naziri Azərbaycanın “Dağlıq Qarabağda humanitar böhran” yaratması ilə bağlı artıq “beynəlxalq ekspert dairələrindən də rəylərin eşidildiyini” sevinclə bəyan etdi.
Kimdir, yaxud kimlərdir həmin beynəlxalq ekspertlər? Qalmaqallı məhkəmə proseslərində, hay-küylü əmlak davalarında tərəfli davranışları və təmənnalı çıxışları ilə yadda qalmış ispan vəkilinin, Beynəlxalq Məhkəmənin keçmiş prokurorunun heç bir hüquqi dəyəri və qüvvəsi olmayan, kağız parçasından ibarət “ekspert rəyini” yüksək instansiyanın möhürlü hökmü-qərarı kimi daxili və xarici bazara sırımağa çalışan Paşinyan bununla kimi aldatmağa cəhd edir? Əlbəttə ki, yalnız özlərini. Beynəlxalq hüquqdan dəm vuran hayların baş nazirinə sadəcə onu xatırlatmaq kifayətdir ki, Beynəlxalq Ədalət Məhkəməsi İrəvanın həmin Laçın yolunda hüquq pozuntusu və Qarabağın erməni icmasının təhlükəsizliyi ilə bağlı iddiasını əsassız saydığı, mübahisələndirmə predmeti olmadığı barədə 6 iyul tarixli qərarını təhrif etməklə çox uzağa gedə bilməyəcək.
* * *
Nəhayət, Hayastanın baş naziri hökumətin dünənki toplantısında sözünün “mustafasını” da açıqlayıb: “İndiki şəraitdə etiraf etməliyik ki, vəziyyətdən ən yaxşı çıxış yolu Laçın dəhlizindən Azərbaycanın qanunsuz blokadasının (?) götürülməsi və beynəlxalq mexanizm çərçivəsində Stepanakert (Xankəndi) – Bakı dialoqunun başlanmasıdır”.
Son vaxtlar tez-tez təkrarladığı, amma heç vaxt gerçəkləşməyəcəyinə özünün də əmin olduğu bu uğursuz versiyanın ardınca İrəvanın sülh gündəliyinə sadiq olduğunu deməkdən utanmayan Nikol Paşinyan rəsmi Bakını “sülhün əldə edilməsi üçün yaranmış tarixi imkanı aradan qaldırmağa yönəlmiş addımaları atmaqdan çəkinməyə” çağırdı.
Bəli, Bakı Xankəndi ilə dialoqa hazır olduğunu çoxdan bəyan edib, bununla bağlı xoşməramlı addımlarını da atıb. Amma kənar qüvvələrin və daxildəki separatçıların əsirinə çevrilmiş Qarabağın erməni icması danışmaq üçün Azərbaycanda yer “qəhətə çıxdığı” üçün, görüş yeri kimi Bratislavanı, Sofiyanı nişan verirlər. Azərbaycan daxili məsələsini niyə üçüncü dövlətin ərazisində müzakirə etməldir?– sualına İrəvanın hansı cavabı verdiyini hələ eşitməmişik. Hər müstəvidə, çeşidli planlarda və ayrı-ayrı məkanlarda yalana və yalnız yalana söykənməklə bunlar hara qədər getməyi düşünürlər, anlamaq mümkün deyil. Əslində, sağlam məntiqlə izahı tapılmayan müşküllərin mənbəyi hayların pozulmuş, yalanla həqiqəti bir-birindən ayrımaqda çətinlik çəkən beyinləridir.
Bəlkə biz 2020-ci il noyabrın 10-dansonra ermənilərin suveren Azərbaycanın Qarabağ iqtisadi rayonunda qalıb yaşamasına, hətta, gedənlərin təhlükəsiz şəkildə geri qayıtmasına imkan verməklə, onlarla bu qədər humanist davranmaqla səhvə yol vermişik? Yox, Azərbaycan səhv etmədi, sivil dövlət olaraq özünə və beynəlxalq hüquqa hörmətini nümayiş etdirdi. Bəs əvəzində nə gördü? Naşükürlük! Daha yetər, bura qədər bəsdir. Sizi tanıdıq və uydurduğunuz nağıllarınıza kim inansa da, biz inanmayacağıq!
Tofiq ABBASOV,
politoloq
Bir halda ki Paşinyan Laçın yolundakı vəziyyətlə bağlı Azərbaycanın beynəlxalq hüquq normalarını pozduğunu iddia edir, bununla o, ilk növbədə savadsızlığını nümayiş etdirir. Bu faktı özü tam çılpaqılığı ilə ortaya qoyur. Çünki, Azərbaycan, ümumiyyətlə, istər regional, istərsə də beynəlxalq olsun, heç bir norma və qaydanı pozmayıb. Ölkəmiz işğaldan qurtulub, ərazi bütövlüyümüz bərpa olunub, sərhədlərini özü qoruyur, bütün kommunikasiya şəbəkəsində nəzarət-buraxılış postlarını qurursa, bu fəaliyyət heç bir qanunverici aktın şərtlərinə zidd deyildir. Bu səbəbdən Paşinyan həmin sərsəm bəyanatları verməzdən əvvəl özünün bu çağırışlarının nə dərəcədə hüquqa uyğun, ölçülü-biçili olduğu barədə gərək düşünsün. Belə hüquqi məsələləri gündəliyiə çıxarırsa, Azərbaycanı ittiham edirsə, nəyə əsaslandığını izah eləsin. Azərbaycanın hansı qanun və ya qanunları pozduğunu açıqlasın.
Hər bir ölkənin olduğu kimi, bizim də sərhəd qanunlarımız var. Hələ işğal dövründə bəzi siyasilər, ekspertlər, jurnalistlər Qarabağa Ermənistanın qapısından keçərək gəlirdilər. Təbii olaraq, onların hamısı Azərbaycanın qara siyahısına düşürdü və XİN belələrinin respublikamıza girişinə qadağa tətbiq edirdi. Onların bəziləri səhvlərini anladıqdan sonra Bakıdan üzr istəyir, adlarının qara siyahıdan çıxarılmasını xahiş edirdilər. İrəvandan bəzi turistləri gəzinti adı ilə gətirirdilər Qarabağa və separatçı rejimin “möhürünü” onların pasportlarına vururdular. Guya, bununla onların yeni, müstəqil dövlətə gəldikləri “təsdiqlənirdi”. Bu isə həmin əcnəbilərin Azərbaycan ərazisinə birinci və sonuncu səfərləri olurdu. Əksəriyyəti sonradan Bakıdan üzrxahlıq edirdi. İndi buna son qoyulub.
Paşinyan hökumət üzvlərinin qarşısında dəbdəbəli bəyanatları səsləndirəndə, heç olmasa, beynəlxalq hüququ, dünya birliyini nəzərə alsın. Amma məsələ burasındadır ki, bu adamın nə düz əməlli savadı, nə də bacarığı var.
Dəfələrlə müşahidə etmişik ki, beynəlxalq platformalarda Prezident İlham Əliyevlə hər dəfə üz-üzə gələndə Nikol Paşinyan zəifliyi, cılızlığı, naşılığı ucbatından xar olur. Danışıqlar prosesində isə siyasi savadının nə qədər aşağı olduğu aşkar görünür.
İmran BƏDİRXANLI, “Xalq qəzeti”