Azərbaycan sülh istəyir, amma qonşusu Ermənistan olan ölkə müharibə ola biləcəyini də unutmamalıdır
Hazırda Qarabağda yaranmış vəziyyəti, sadəcə, anomal adlandırmaq olar. Bu anomallığı şərtləndirən əsas amillərdən biri burada yaşayan ermənilərin özlərindən asılı olmayan qeyri-müəyyən vəziyyətə düşmələridir. Onların bu duruma düşmələrinin səbəbkarı isə “mənzil-qərargahı” Xankəndidə yerləşən separatçı xunta rejimidir. Daxildən çatları görünməyə başlamış rejim özünün utopik və ümidsiz ideyaları naminə həmin sıravi ermənilərdən girov kimi istifadə edir.
Bu, eləcə də Qarabağ ermənilərini gözləyən aqibət, bölgədə maraqları toqquşan tərəflərin sərgilədiyi davranışların motivləri və modelləri, Azərbaycan Prezidenti İlham Əliyevin bu günlərdə “Euronews” televiziyasına müsahibəsində regionun sakinlərinə müraciətinin əhəmiyyəti barədə “Caliber.Az” saytının əməkdaşı Orxan Amaşovun şərhinin tərcüməsini yüngül improvizə ilə oxucularımızla bölüşmək qərarına gəldik.
Analitik qeydlərin müəllifi hesab edir ki, Arutyunyan və onun separatçı qruplaşmasının yuxarı eşolonu getdikcə daha çıxılmaz situasiya ilə üzləşmək məcburiyyətində qalıblar. Azərbaycanın suveren ərazisində hələlik fiziki olaraq qalmış bu “çete”nin hərbi və siyasi resursları tükənmək üzrədir. Bu il aprelin 23-də şərti sərhəddə – Laçın yolunun başlanğıcında, Həkəri çayının üzərindəki körpüdə Azərbaycanın özünün nəzarət-buraxılış məntəqəsini yaratması həm Xankəndidəki qondarma rejimə, həm də ərazimizi tərk etməyə tələsməyən daşnak-separatçılara endirilən “şok-zərbə” oldu. Onlar bundan sonra avantüralarının “yeriməyəcəyini”, sərbəst hərəkət etməyin mümkünsüzlüyünü tədricən anlamağa başladılar. Həqiqətən, sərhəddə post qurulandan sonra bu qanunsuz rejim hər tərəfdən və hər şeydən təcrid olundu. Amma ona dəstək verən bir neçə amil hələ də qalmaqdadır ki, onlar əbəs yerə bölgədə situasiyanın dəyişilə biləcəyinə “cəsarətli ümid” bəsləyirlər.
Kreml gec-tez seçim etməli olacaq
Rusiyanın, bir qayda olaraq, postsovet məkanındakı bəzi münaqişə ocaqlarında gizli motivlərə malik olduğuna diqqəti yönəldən analitikə görə, Xankəndidəki separatçılara müvəqqəti fiziki müdafiə ilə müşayiət olunan mənəvi dəstək verən Moskvanın məqsədi Qarabağda hərbi iştirakını davam etdirmək və bütövlükdə, Cənubi Qafqaz üzərində nəzarəti əlində saxlamaq istəyi ilə bağlıdır. İntəhası, Kremlin “öz qoşunlarını bölgədə saxlamaq” və Azərbaycanla hərtərəfli və çoxplanlı dostluq münasibətlərinə xələl gətirməmək arasında seçim dilemması yaranacağı təqdirdə, ondan son qərar üçün məntiqli və səmərəli yanaşma tələb olunacaq. Ukraynada vəziyyətin daha da gərginləşdiyi, bütün diqqətini cəmləşdirdiyi cəbhədə durumun arzuedilən səviyyədə sayılmadığı indiki şəraitdə Bakını bundan artıq qıcıqlandırmaq Moskvaya qətiyyən lazım deyil. Başqa sözlə desək, əgər biz Qarabağda hərbi kontingentə malik olmaqla “nüfuz” üstünlüyünü kommunikasiyaların açılması və buna bağlı digər sahələrdə əldə edəcəyi iqtisadi faydanı qarşı-qarşıya qoysaq, çox güman ki, Moskva özünün dumanlı imperiya ambisiyalarına deyil, soyuq diplomatik məntiqə söykənərək düzgün seçim edəcək. Hər halda hadisələrin cərəyan dinamikası bundan xəbər verir.
Sözünü əmələ çevirə bilməyən İrəvan
Hazırda Ermənistan hakimiyyəti Xankəndidəki separatçı xunta rejiminə Azərbaycanın qanuni tələblərini yerinə yetirməsi üçün təsir göstərməyi ya bacarmır, ya da bunu istəmir. Paşinyan deyəndə ki, Ermənistan, bütün suveren dövlətlər kimi, Azərbaycanın ərazi bütövlüyünü rəsmən tanımağa hazırdır və Qarabağ erməniləri öz problemlərini Bakı ilə həll etməlidirlər. Bu, bir qədər qəribə səslənir. Həm də onun bu sözlərinin altında real iş, hərəkət dayanmadığına görə səmimiyətdən uzaq görünür. Bu, azmış kimi, Paşinyan hökumətinin separatçı rejimi humanitar yükləri Ağdamdan qəbul etməyə inandırmaq əvəzinə, Bakı ilə razılaşdırmadan, “tır” karvanını şərti sərhəd istiqamətinə göndərməsi gərginliyi daha da artırıb.
Bundan savayı, Qarabağ ermənilərinin “hüquq və təhlükəsizliyi” ilə bağlı məsələnin həlli üçün beynəlxalq mexanizmin yaradılmasında təkid edən İrəvan Rusiyaya Bakı və Xankəndi arasında daxili dialoqu ləngitmək üçün əlavə bəhanələr vermiş olur. Beləliklə, Rusiyanın “gözlə görünməyən” motivləri ilə Ermənistan rəhbərliyində iradənin və cürətin olmaması Qarabağdakı separatçıları bir növ ümidləndirir. Nəinki ümidləndirir, hətta mükafatlandırır. Qarabağda separatçı əhval-ruhiyyəni yüksək səviyyədə qoruyub saxlamaqdan ötrü Rusiya və Ermənistandan başqa oyunun digər aktorları, misal üçün, Fransa da öz “töhfəsini” verməkdədir.
Ümumiyyətlə, Qərbdən danışanda onu da qeyd etmək lazımdır ki, bu düşərgə daxili fikir ayrılıqları və hakimiyyət uğrunda mübarizə ucbatından heç də monolit deyil. Onların arasında ikiüzlülər kifayət qədərdir ki, bu da bizə heç sərf eləmir. Hərçənd Ermənistan–Azərbaycan sülh prosesində Brüsselin və Vaşinqtonun dövlətlərin ərazi bütövlüyünün və suverenliyinin qarşılıqlı tanınması konsepsiyasına söykənən birgə və davamlı səylərini Bakı təqdir etməkdədir. Doğrudur, əgər ümumi mənzərəyə nəzər yetirəndə bəzi yanlışlıqları və natamamlıqları görmək mümkündür. Tərəflərə münasibətdə bəzən ikili standartların da izini müşahidə etmək olar.
* * *
Beynəlxalq məsələlər üzrə şərhçi Orxan Amaşov Qarabağ ermənilərinə münasibətdə müxtəlif aktorların məsələyə yanaşma və niyyətləri barədə diskussiyanı davam etdirərək bildirir ki, bölgədə əsas oyunçu bütün bu hadisələrin suveren ərazisində baş verdiyi Azərbaycandır. Bəs Bakı indiki durumda nəyə nail olmağa çalışır? Bu sual yalnız humanitar yardımın çatdırılacağı marşrutla deyil, həm də çoxlu sayda digər məsələlərlə bağlıdır.
Bu yaxınlarda Şuşada “Euronews”a müsahibəsində Prezident İlham Əliyev bəyan etdi ki, Azərbaycan cəmiyyətinin bir hissəsi kimi, Qarabağ ermənilərinə “təhlükəsizlik və hüquqi təminat, o cümlədən, təhsil, mədəni, dini, bələdiyyə” təminatı təqdim olunacaq. Əslinə qalsa, bu, nəinki qəbuledilən, eyni zamanda, olduqca səxavətli, qarşı tərəfdən düzgün qiymətləndirmə tələb edən təklifdir. Cənab Prezident həmin müsahibəsində qəti və birmənalı şəkildə onu da hamının nəzərinə çatdırdı ki, o, dediyi sözün arxasında durmağı bacaran adamdır. Biz və qarşı tərəf bunun dəfələrlə canlı şahidi olmuşuq. Məgər İlham Əliyev 2020-ci ildə Ermənistanla müharibə ərəfəsində demirdimi ki, Azərbaycan işğal altındakı torpaqlarını düşməndən azad edəcək və özünün ərazi bütövlüyünü bərpa edəcək? Dedi və həyata keçirdi. Çünki bu vəzifə onun fəaliyyətinin başlıca missiyası idi və həmin missiyanı şərəflə yerinə yetirdi. Məgər o demirdimi ki, Laçın yolunun başlanğıcında sərhəd nəzarət-buraxılış məntəqəsinin qurulması suveren Azərbaycanın qanuni haqqıdır və bunu edəcək? Onun dediyi baş verdimi? Baş verdi! Dövlətimizin başçısı, həmçinin deyir ki, Xankəndidə Azərbaycanın üçrəngli bayrağı dalğalanacaq, orada qalıb yaşamağa qərar verən erməni sakinlər Azərbaycan vətəndaşının bütün konstitusion hüquqlarından istifadə edəcəklər.
Azərbaycan Prezidentinin sonuncu dediyi sözün əmələ çevrilməsi güman etdiyimizdən də tez baş verə bilər. Çünki, o, həmişə sözünü konkret işlə möhürləməyə vərdiş etmiş liderdir. Hesab edirik ki, buna ermənilər də, kənar aktorlar da artıq əmin olublar.
İmran BƏDİRXANLI, “Xalq qəzeti”