Son günlər bu istiqamətdə atılan mühüm addımların şahidi oluruq
Xalqımızı xalq kimi, millət kimi qoruyub saxlayan bizim ənənələrimiz olub, tariximiz olub, ədəbiyyatımız, ana dilimiz və mədəniyyətimiz olubdur. Mədəniyyət, ədəbiyyat, milli musiqi, ana dilimiz tarixi keçmişimizdir – biz bu sahələrə böyük diqqət göstərməliyik.
İlham ƏLİYEV,
Azərbaycan Respublikasının Prezidenti
Əslində, bu yazını ulu öndərin yubileyi münasibətilə qələmə almaq istəmirdim. Çünki burada söhbət konkret olaraq cənab Prezident İlham Əliyevin təşəbbüsü ilə son illərdə həyata keçirilən mədəni tədbirlərdən gedir. Ancaq bu tədbirlərin bir çoxunun məhz “Heydər Əliyev ili”ndə reallaşdırılması onların məzmununu daha da zənginləşdirir, möhtəşəmliyini artırır. Bu tədbirlər həm də ona görə xalqımızın hər bir fərdi üçün əlamətdardır ki, biz son iki il yarımda atdığımız addımlarla məhz Azərbaycan dövlətinin və ordumuzun regionda yaratdığı yeni reallıqları təbliğ edirik. Təbii ki, işğaldan azad edilmiş ərazilərdə keçirilən tədbirlər başda olmaqla.
…Təkcə ictimai-siyasi həyatımızda deyil, mədəni-mənəvi dünyamızda da elə faktlar, hadisələr olur ki, onları sakitcə izləməklə və ya milli tariximizin hansısa səhifəsinə yazmaqla kifayətlənmək olmur. İnsan istər-istəməz həmin fakt haqqında düşüncələrini mütləq kiminləsə bölüşmək istəyir, öz arqumentlərini müzakirə obyektinə çevirməyə çalışırsan. Məsələn, mən, cənab Prezidentin avqustun 8-də görkəmli aktyor, Xalq artisti Rasim Balayevlə görüşündən, onların səmimi söhbətlərindən sonra özümü məhz o cür hiss etdim. Şahidi olduğum səmimiyyət barədə kiməsə danışmaq istədim.
Həmin görüşdə məni məmnun edən detallar hansılar idi? Əvvəla, Rasim Balayev dövlət başçısı ilə salamlaşanda hansısa rəsmi və ya diplomatik jestlərdən deyil, bilavasitə Ağsu ağsaqqallarının leksikonunda olan “Salamməleyküm!”dən istifadə etdi. Birmənalı olaraq deyə bilərəm ki, bu, Rasim Balayevin aktyorluğundan gələn cizgi deyil, onun səmimiyyətinin göstəricisi idi. Həmin səmimiyyətin ortaya qoyulması üçün dövlət başçısı tərəfindən yaradılan şərait də alqışlanmalıdır.
İkincisi, dövlət başçısını məhz tay-tuş kimi, əziz, doğma adamı kimi bağrına basan sənətkar bu addımının ( heç kəs o sarayda ölkənin birinci adamını o şəkildə qucaqlamağa cəsarət etməzdi) səbəbini də açıqladı: “Mənim bir arzum var idi ki, Qarabağdan sonra, işlərinizdən sonra Sizi qucaqlayım. Çox şükür ki, bizə qismət oldu”.
Üçüncüsü, Prezidentin Rasim Balayevə dediyi “Qəhrəmanımız Babəkin, dahi şairimiz Nəsiminin obrazlarını siz canlandırmısınız və Azərbaycan xalqının təsəvvüründə də onlar elə sizin obrazınızdır”– ifadəsi onun mədəni həyatımızdakı proseslərə dərindən bələd olmasının göstəricisi idi. Doğrudan da, milyonlarla soydaşımız Nəsimi haqqında danışarkən, göz önünə məhz Rasim Balayevin simasını gətirir.
Dördüncüsü, Rasim Balayev dünyanın hər yerindəki soydaşlarımızın demək istədiyi fikirləri dilə gətirdi: “Möhtəşəm Qələbə də Sizin adınızla bağlıdır. Mən xalqın arasında oluram, bütün təbəqələrlə görüşürəm, Siz öz adınızı tarixə bir Ali Baş Komandan kimi, elə əsl Babək kimi yazdınız. Əsl Babək Sizsiniz, biz onun obrazını oynayırıq”.
Yeri gəlmişkən, dövlət başçımız bu il iyunun 12-də görkəmli kinorejissor, ssenarist, Xalq artisti Oqtay Mirqasımova “İstiqlal” ordenini təqdim edərkən də olduqca səmimi söhbət etmişdi. Oqtay müəllim də cənab Prezidentin əsgər, sərkərdə kimi milli tariximizə düşdüyünü yada salmışdı: “Siz həm gözəl sərkərdə, gözəl siyasətçi, sözündən dönməyən kişisiniz. Bu keyfiyyətlər bizim üçün önəmlidir. Biz uşaqlıqdan belə böyümüşük – həmişə əsgər, qəhrəman bizim üçün kumir olub. Allah razı olsun. Siz böyük Heydər Əliyevin – atanızın oğulusunuz. Bu, çox böyük bir işdir və adama nə qədər ruh verir. Bunu hər kəs bilir”.
Bəli, bu səmimi söhbətlərə şərait yaradılması Prezident İlham Əliyevin sənət adamları ilə görüşlərdə Heydər Əliyev ənənələrini böyük məsuliyyət və ustalıqla davam etdirməsinin təzahürüdür.
Ölkədə keçirilən genişmiqyaslı mədəni tədbirlərə gəlincə isə xatırladaq ki, son illərdə həyata keçirilmiş həmin tədbirlərin önündə “Xarıbülbül” musiqi festivalları ənənəsinin bərpası gedir. Məlum məsələdir ki, həmin ənənəni bərpa etmək üçün ilk növbədə, Şuşanın və Ağdamın işğaldan azad edilməsi lazım idi. Çünki “Xarıbülbül” festivalları işğaldan əvvəl Şuşada və Ağdamda keçirilmişdi. Hamının yadındadır, — 1989-cu ildən Şuşa şəhərində məşhur xanəndə Seyid Şuşinskinin 100 illik yubileyi ilə əlaqədar keçirilməyə başlanan festivalda Yaponiya, ABŞ, Türkiyə, Almaniya, İsrail, İtaliya, İspaniya, Avstriya, Əfqanıstan kimi ölkələrin və SSRİ respublikalarının mədəniyyət və incəsənət adamları iştirak edirdilər. Sonuncu festival 1992-ci ilin may ayında keçirilmişdi.
Azərbaycan Prezidenti İlham Əliyevin xalqımızın işğalçı ölkə üzərindəki möhtəşəm Zəfərindən sonra – 2021-ci il mayın 7-də imzaladığı sərəncama əsasən, Şuşa şəhəri ölkəmizin Mədəniyyət paytaxtı elan edilmişdir. Həmin sərəncamla Vaqif Poeziya Günləri və “Xarıbülbül” festivalı da bərpa olunmuşdur. Bərpadan sonrakı ilk festival 2021-ci il mayın 12–13-də keçirilmişdir.
Ötən il mayın 12-14-də isə Şuşa şəhərində V Xarıbülbül Beynəlxalq Folklor Festivalı təşkil edilmişdi. Festivalın açılışında Azərbaycan Respublikasının Prezidenti İlham Əliyev və Birinci vitse-prezident Mehriban Əliyeva, mədəniyyət, ictimaiyyət xadimləri, xarici qonaqlar iştirak etmişdilər. Dövlət başçımız həmin tədbirdə xatırlatmışdır ki, bu gün Azərbaycan mədəniyyəti, mədəniyyətimizin görkəmli nümayəndələri Şuşaya qayıdıblar və bu qayıdış reallıqdır. Bu reallıqla hər kəs hesablaşmalıdır.
Sonda bir məqamı xüsusilə vurğulamaq zərurəti yaranır. Hələ 2020-ci il noyabrın 8-də Prezident İlham Əliyev Şuşanın azad olunması münasibətilə xalqa müraciətində qeyd etmişdi ki, Qarabağın tacı olan bu şəhər tezliklə dirçəldiləcək və özünün əvvəlki şöhrətini qaytaracaqdır. 2021-ci ildəki festivalın açılış mərasimində isə dövlətimizin başçısı “Biz bu gözəl ənənəni bərpa etdik və bundan sonra “Xarıbülbül” festivalı Şuşada hər il keçiriləcək”, – demişdi. 2022-ci ilin mayında Mədəniyyət paytaxtımızda keçirilən V “Xarıbülbül” Beynəlxalq Folklor Festivalı isə cənab Prezidentin həmin fikirlərinin əyani təsdiqi idi.
Bəli, bu gün Azərbaycanda mədəniyyət siyasəti, dövlətimizin adına, xalqımızın tarixinə və ruhuna layiq səviyyədə davam etdirilir. Bir daha xatırladaq ki, bu tendensiya ulu öndər Heydər Əliyevin siyasi kursundakı “mədəniyyət istiqaməti”nin uğurla davam etdirilməsidir. Azərbaycan dövləti mədəniyyət xadimlərinin yanında olduğu kimi, mədəniyyət ictimaiyyətimiz də daim dövlətin yanındadır. Deməli, daha böyük uğurlarımız hələ qabaqdadır.
İttifaq MİRZƏBƏYLİ, “Xalq qəzeti”