İyunun 24-də ölkəmizdə akkreditə olunmuş diplomatik korpusları təmsil edən nümayəndə heyəti işğaldan azad olunmuş Laçın rayonuna səfər ediblər. Nümayəndə heyətinin tərkibinə 33 ölkədən və 10 təşkilatdan, ümumilikdə, 60-a yaxın diplomat və hərbi attaşe daxil edilib. 

Səfər çərçivəsində diplomatlar “La­çın” sərhəd-gömrük buraxılış məntəqə­sində də olublar. Buraxılış məntəqəsin­də yaradılmış şəraitlə tanışlıq zamanı diplomatlar yolun bağlanması barədə Ermənistan tərəfinin təxribatçı iddiaları­nın həqiqətə uyğun olmadığına şəxsən əmin olublar. Məlumat verilib ki, iyunun 15-də Azərbaycan hərbçisinin yaralan­ması ilə nəticələnən erməni silahlı təx­ribatı ilə bağlı hazırda burada istintaq tədbirləri aparılır. İnsidentin baş vermə­si faktı barədə xarici diplomatlara ətraflı məlumat verilib.

Diplomatlara o da billdirilib ki, hazır­da tibbi yardıma ehtiyacı olan vətəndaş­ların daşınması üzrə Beynəlxalq Qızıl Xaç Komitəsinin fəaliyyəti üçün şərait yaradılıb. Beləliklə, “blokada” haqqında istənilən iddialar erməni tərəfinin mani­pulyasiyalarıdır, hansı ki, Azərbaycan tərəfindən istintaq tədbirlərinin aparıl­ması faktından yalançı təbliğat üçün istifadə edirlər. Bununla bağlı diplomat­lara ətraflı məlumat vermək üçün onlar Həkəri çayı üzərindəki körpünün qarşı tərəfinə gətiriliblər.

Diplomatik korpus üzvləri əvvəlcə Laçında Bayraq meydanı və Həkəri ça­yının sahilində salınan Heydər Əliyev küçəsini ziyarət ediblər.

Laçında aparılan yenidənqurma və abadlıq işləri ilə tanış olan diplomatlar 1 Dekabr küçəsində salınmış ilk ya­şayış məhəlləsinə baxış keçirib, artıq yurd-yuvasına geri dönmüş sakinlərlə söhbət ediblər. Qeyd olunub ki, Prezi­dent İlham Əliyevin tapşırığına əsasən, şəhərdə, ümumilikdə, 700 bina bər­pa edilir. Onlardan 620-si fərdi ev, 9-u çoxmənzilli yaşayış binasıdır. Eyni za­manda, 71 inzibati bina yenidən qurulur.

Diplomatik korpus nümayəndələri, həmçinin Zabux kəndində tam sürətlə davam edən tikinti quruculuq işləri ilə də yaxından tanış olublar. 

Azərbaycanda akkreditə olunmuş diplomatik korpus üzvləri Laçında qurulmaqda olan “Aqro-Sənaye” Parkına baş çəkiblər. Burada onlara sənaye parkının imkanları barədə ətraflı məlumat verilib. Aqro Sənaye Parkının Laçının iqtisadi dirçəlişi və əhalinin məşğulluğu baxımından xüsusi əhəmiyyət kəsb etdiyi qeyd olunub. Diqqətə çatdırılıb ki, burada 46 şirkət fəaliyyət göstərəcək və ümumilikdə, 1200-ə yaxın laçınlı işlə təmin olunacaq.

Sonda xarici diplomatlar Zəngilanın Ağalı kəndinə baş çəkiblər.

Qeyd edək ki, səfərdə diplomatları ölkəmizin aparıcı kütləvi-informasiya va­sitlərinin nümayəndələri təmsil ediblər.

(Səfər haqqında geniş yazı qəzeti­mizin növbəti sayında dərc olunacaq) 

Vaqif BAYRAMOV, “Xalq qəzeti”