Müstəqillik dövrü Azərbaycan kino sənətinin şah əsərlərindən sayılan “Bəxt üzüyü” filmində baş qəhrəman Moşunun dilindən məxsusi formada sələnmiş, onun qorxmadığını ifadə edən və artıq ölkəmizdə zərb-məsələ çevrilmiş bir ifadə var: “Ayə, qoymuyun, ayə, a millət, üstümə İrasim gəler”.
Azərbaycan–Ermənistan münasibətlərinin tənzimlənməsi və sülh prosesində meydana çıxan müxtəlif əndərəbadi məqamları nəzərə alaraq, hazırda bir çoxlarına Moşunun dili ilə müraciət etmək mümkündür. Bu kateqoriyadan olanlar sırasına Hollandiyanın sabiq deputatları da qoşuldular.
Əslində sabiqlərin nə dediklərinə ciddi yanaşmaq, bəlkə bir o qədər yerinə düşmür. Hərçənd, nəzərə alaq ki, hər şey beləcə, təxminən bir dəlinin quyuya daş atması ilə başlayır. Deməli, məsələyə önəm vermək lazımdır. İndiki məqamda daşı quyudan çıxarmağa ehtiyac yoxdur. Sadəcə, daşı atana yerini bildirmək şərtdir.
***
Bəli, hollandiyalı sabiq deputatların söylədiklərinə diqqətlə yanaşmaq zəruridir və görək dedikləri nədir. Əlqərəz, eks parlamentarilərin bir qrupu bəyanat verərək, ölkə hökumətini, o cümlədən, beynəlxalq strukturları Qarabağa sülhməramlı missiya göndərməyə çağırıb. Ancaq sənəddə vurğulanan yalnız bu deyil...
Mövcud xüsusdakı üzərində dayanılmalı ilk məqam erməni mediasının “sabiqlərin” bəyanatını geniş yaymasıdır. Məlum olduğu kimi, Azərbaycan–Ermənistan münasibətləri baxımından sülh gündəliyi aktual olsa da, hazırda hay cəmiyyətinin bu ab-havadan uzaqlığı görünməkdədir. Hər halda, sülh istəməyənlərin səslərinin daha çox çıxdığına dair oturuşmuş qənaət var və onlar ən müxtəlif məsələləri ortaya atırlar ki, baş nazir Nikol Paşinyanın Azərbaycanın Qarabağ da daxil olmaqla, 86,6 min kvadratkilometr ərazidə suveren hüquqularını tanıması ilə bağlı dedikləri əhəmiyyətini itirsin, nəticədə nizamlama prosesi yeni reallıqlar qazansın. Bu, daim spekulyativ mövqe tutan Ermənistan hakimiyyətinin ürəyincədir. Nəhayət, erməni iqtidarının da Qarabağ mövzusundakı müxtəlif məsələlər, o cümlədən ərazidə yaşayan erməni əhalinin hüquq və təhlükəsizliyi müstəvisində manipulyasiyalara baş vurduğu aşkardır.
***
İkincisi. Qarabağda rus hərbçiləri var. Azərbaycan və Ermənistan sülh müqaviləsi bağlayacağı təqdirdə, onların orada qalmaları mənasız şəkil alacaq. Nəzərə alaq ki, hazırda Rusiyadakı bəzi qüvvələr Qarabağın erməni əhalisinin rusmeyilli olmasına dair rəy formalaşdırırlar. Onlar bu xüsusda həmin sülhməramlı rus hərbi kontingentinin mövcudluğunun uzadılmasına, bir növ, qanunauyğunluq libası geyindirirlər. Bu işə ölkənin ekspert cameəsi də kifayət qədər böyük əzmlə girişir. Belə təəssürat yaranır ki, Qarabağı ayrıca Rusiya məntəqəsi kimi görürlər. Yəni, Moskvada kimlərsə Azərbaycanla Ermənistan arasında sülh müqaviləsinin imzalanması, ölkələrin bir-birilərinin ərazi bütövlüklərini qarşılıqlı şəkildə tanımaları belə, rus qoşunlarının bölgəni tərk etmələri üçün əsas saymırlar. Bəs, demək mümkündürmü ki, bu meyil erməni avantürizmi üçün xeyirlidir? Sual ritorikdir, çünki cavabı məlumdur.
Ermənistan hakimiyyəti məsələyə iki aspektdən yanaşır. Birincisi, əgər Qarabağ Ermənistanın olmayacaqsa, heç Azərbaycanın da olmasın və mövcud istiqamətdə Rusiyanı da ön planda dayanması vacibdir. Digər tərəfdən, Qarabağdakı rus sülhməramlıları Cənubi Qafqazda rus hərbi faktorudur ki, bunu da Qərb daiərələri heç cür məqbul saymırlar. Unutmaq olmaz ki, həmin dairələrin hazırkı erməni iqtidarına təsirləri böyükdür. Nəticəyə gəlirik ki, Hollandiyanın eks deputatlarının dövriyyəyə buraxdıqları məsələ – Qarabağa beynəlxalq sülhməramlı missiya göndərilməsi, şübhəsiz ki, anti-Moskva ovqatının da siyasi məhsuludur. Deməli, holland eksləri, belə demək mümkünsə, “xodlayanlar” xaricdəki erməni lobbisi və diasporudur. Qarabağda beynəlxalq sülhməramlı qüvvələrin olması bölgəni qeyri-müəyyən şəkildə saxlamaq xətti götürmüş baş nazir Nikol Paşinyanın administrasiyasına sərfəlidir. Yəni, erməni iqtidarı rus sülhməramlılarındansa, xarici qüvvələri üstün tutur. Hərçənd, əvvəllər Paşinyan Qarabağdakı Rusiya sülhməramlılarının yalnız 10 noyabr 2020-ci il tarixli üçtərəfli Bəyanatla müəyyənləşmiş və qeyri-müəyyən xarakter daşıyan mandatının 10, hətta 20 il uzadılmasından dəm vururdu. Tutar qatıq, tutmaz ayran. Burada İrəvan üçün beynəlxalq sülhməramlı missiya qatıqdır, rus sülhməramlıları isə ayran. Bir sözlə, necə olursa-olsun, Azərbaycanın Qarabağda tam nəzarəti olmasın.
***
Üçüncü məqama keçid alaq. Hollandiyalı keçmiş deputatlar Paşinyanın Azərbaycanın ərazi bütövlüyünü tanımasına dair bəyanatına fokuslanaraq bildirirlər ki, belə olan təqdirdə Qarabağda erməni əhalinin təhlükəsizliyi məsələsi önəmlidir. Əlbəttə, onlara Azərbaycanın təhlükəsizlik təminatları kifayət sayılmır. Beynəlxalq sülhməramlılar da məhz buna görə və deməli, Ermənistanın spekulyativ yanaşmasının davamalılığı nöqteyi-nəzərdən lazımdır.
Həm də ona görə lazımdır ki, Avropa üçün Rusiya sülhməramlılarının fəaliyyəti Qarabağ ermənilərinin təhlükəsizliyi baxımından yetərli hesab edilmir. Yada salaq ki, rəsmi İrəvan son zamanlar təhlükəsizlik məsələsini qaldıran zaman rus sülhməramlıları faktorunu görməzdən gəlir, bir qayda olaraq, hansısa beynəlxalq təminat mexanizmindən söhbət açır. Buyurun, holland eks deputatlar həmin təminatı ictimailəşdirməyə girişiblər.
Əlbəttə, hollandiyalı sabiqlərin bəyanatının aşkar ermənipərəst mövqe nümayişinə hesablandığı gün kimi ortadadır. Onlar üçün Qarabağ keçmişdə olduğu kimi, muxtar ərazidir, üstəlik həm də “Dağlıq Qarabağ” adlı ayrıca vahiddir. Bəyanatda bu baxışı təsdiqləyən “Artsax”, “Laçın yolunun açılması” kimi ifadələr var. Azərbaycanın Laçın–Xankəndi yolundakı sərhəddə qurduğu nəzarət-buraxılış məntəqəsindən rahat şəkildə keçib Ermənistana gedənlərin olduğu halda, sənəddə bunun nəzərə alınmaması və yolun bağlı qaldığının vurğulanması kimi sarsaq motiv də diqqət çəkməkdədir. Görünür, erməni təbliğat maşını köhnə tezisi saqqız kimi çeynəməkdədir, halbuki saqqız çoxdan çürüyüb.
***
Gələk, hollandiyalı keçmiş parlamentarilərin bəyanatındakı ən vacib məqama. Onlar Qarabağa beynəlxalq sülhməramlıların yeridilməsinin vacibliyini əsaslandırarkən, vurğulayırlar ki, demokrat Paşinyan Azərbaycanın ərazi bütövlüyünü tanıdıqda, sən demə, nəinki riskə gedib, həm də sülh yolunda mühüm addım atıb. “Avropa İttifaqının, ATƏT-in, ABŞ-ın və Rusiyanın BMT-nin köməyi ilə sülhə gedən bu müqəddiməni dəstəkləmək, müəyyənləşdirmək və həyata keçirmək üçün vaxt yetişib. Bu, “Artsax” nümayəndələrinin müzakirədə faktiki iştirakı olmadan mümkün deyil. Hamımız başa düşürük ki, bu çətin sualdır, lakin çox böyük əhəmiyyət kəsb edir. Beynəlxalq iştiraksız sülh prosesinin uğursuzluğa məhkum olduğu faktı ilə üzləşməkdəyik”, – deyən hollandların bəyanatının, loru dildə desək, mustafası odur ki, guya Azərbaycan qeyri-demokratik ölkədir, buna görə onun Qarabağ erməniləri ilə bağlı hüquq təminatı etibarsızdır. Deməli, necə deyərlər, xoruzun quyruğu göründü. Məlum oldu ki, dünyanın ənənəvi anti-Azərbaycan stereotipləri Azərbaycan–Ermənistan münasibətləri və sülh gündəliyi zəminində də dövriyyəyə soxulur. Daha doğrusu, soxuşdurulur.
Bəyanatda bildirilir ki, guya Azərbaycan İnsan Azadlığı İndeksində çox aşağı yer tutur. Belə indekslərin, reytinqlərin hansı “parametrlər” üzrə müəyyənləşdiyi heç kəsə sirr deyil. Qeyd edək ki, bu günlərdə Beynəlxalq Əmək Təşkilatı, “Walk Free” Fondu və Beynəlxalq Miqrasiya təşkilatı da birgə “Qlobal köləlik indeksi” adlı hesabat hazırlayaraq, Ermənistanı Azərbaycandan daha azad ölkə kimi göstərmişdi ki, heç şübhəsiz, belə bir rəyə gəlinməsi ölkəmizə qarşı qərəzin növbəti nümunəsidir. İndi hollandların da fikrincə, Ermənistan tam hüquqlu demokratik ölkədir və Aİ ilə tərəfdaşlıq edir. Ancaq: “Baxmayaraq ki, Azərbaycanın xüsusən enerji sektorunda qurumla iqtisadi əlaqələri var, bu, onu etibarlı tərəfdaşa çevirmir”.
Əlbəttə, hollandiyalı sabiq parlamentarilərin Azərbaycanın Aİ üçün nə qədər ciddi önəm daşıdığını bilməmələri mümkündür. Onların çoxu pensionerdir, müəyyən hissəsi geydir, başları qarışıb sevgililərinə. Bəlkə də belə sarsaq bəyanatın mətnindən xəbərləri heç yoxdur. Erməni lobbisi hansı sənədi qondarıbsa, nəyinsə müqabilində gəlib altına imza atıb gediblər. Əsil məsələ bəyanatdakı ənənəvi “stereotiplərdir”. O stereotiplər ki, onları Ermənistanın baş naziri Nikol Paşinyan mütəmadi şəkildə gündəmə gətirir.
Nikol, xüsusən, xaricdəki çıxışlarında ölkəsini Cənubi Qafqazda demokratiya qalası kimi təqdim edir və Azərbaycanla münasibətlər kontekstində ortaya qoyduğu destrutiv mövqenin demokratiyanın müdafiəsinin vacibliyi kimi pərdələməyə çalışır. Yeri gəlmişkən, vurğulayaq ki, Paşinyan vaxtilə “Qarabağ Ermənistandır nöqtə” bəyanatı verəndə də, “yeni ərazilər uğrunda yeni müharibə” ideyasını uyduranda da elə düşünmüşdü ki, beynəlxalq ictimaiyyəti bu sayaq avantüraları Ermənistan demokratiyasını dəstəkləmək məntiqi ilə müdafiə edəcəkdir. Onun başlatdığı 44 günlük müharibə isə “demokratiya qladiatorunun” ağır və rüsyavçı məğlubiyyəti ilə sona çatdı.
***
Belə nəticəyə gəlirik ki, belə demək mümkünsə, “hollandski pendir”, eyni zamanda, Ermənistandakı “donuz fermasında” istehsal olunur. Axı, ölkə hakimiyyətinin xaricdəki erməni lobbi və diaspor təşkilatları ilə əlbirliyi, kifayət qədər ehkamçı mahiyyət daşımaqdadır. İkincilərin birincini təhqir səviyyəsinə çatacaq dərəcədə tənqid etməsi reallığı olsa da, ümumi ambisiyalar onlara gey və pensioner ekslərin Hollandiya hökumətinə anti-Azərbaycan çağırışı ünvanlatdırmalarına maneçilik törətmir.
Sonda qeyd edək ki, hollandiyalı keçmiş deputatlar yerli hökumətin Qarabağa BMT-nin və ya ATƏT-in müşahidəçi missiyasını, yaxud beynəlxalq sülhməramlı missiyanı göndərmək istiqamətində təşəbbüs göstərməli olduğunu vurğulayarkən, bunun üçün rəsmi Bakıya təzyiqi də vacib sayırlar. “O zaman bəlli olacaq ki, Əliyev sülh istəyir, yoxsa yalnız müharibə məqsədi güdür” kimi yaramaz fikirlərin əksini tapdığı bəyanatda Azərbaycanın sülh istəyinin şübhələndirilməsi isə onu göstərir ki, dünya erməniliyi Ermənistan hakimiyyəti ilə birləşərək, Cənubi Qafqazda normal mühitin formalaşmasına əngəl yaratmaq niyyəti güdür. Bu məqam birincinin və ikincinin Rusiyadakı anti-Azərbaycançı avantürist siyasi kəsimlə müəyyən ortaq nöqtəsi sayıla bilər. Nəzərə alaq ki, tərəflərin heç biri ölkəmizin Qarabağda tam yurisdiksiyasının bərpa olunmasını arzulamır və mövcud istiqamətdə müxtəlif qeyri-real və qəbuledilməz məsələləri gündəmə gətirməklə, necə deyərlər, Bakının əsəbini tarıma, səbr kasasını sınağa çəkirlər. Ancaq unudurlar ki, səbr və təmkin bir yerə qədərdir. “Dəmir yumruq” hər zaman yerindədir. Moşunun təbirincə dedikdə isə, üstümüzə İrasimin gəlməsindən qorxmuruq.
Ə.CAHANGİROĞLU, “Xalq qəzeti”