Dünən Yaponiyanın Xirosima şəhərində “Böyük yeddilər”in sammiti öz işinə başlayıb. Tədbirdə bir çox aktual qlobal problemlər, o cümlədən Rusiyanın hərbi təcavüzünə məruz qalan Ukraynaya hərtərəfli dəstəyin artırılması, Çinin yüksələn nüfuzunun qarşısının alınması, nüvə silahından istifadə təhlükəsinin önlənməsivə s. problemlər müzakirə olunacaq. Sammit üç gün davam edəcək.
ABŞ Prezidenti Cozef Bayden sammitdə iştirak etmək üçün Yaponiyaya gəlib. “The Associated Press” agentliyi yazır ki, Prezidentin təyyarəsi Birləşmiş Ştatların Yamaquti prefekturasının İvakuni şəhərində yerləşən dəniz piyadalarının aviabazasına enib. Amerikanın dövlət başçısı oradan Yaponiyanın Baş naziri Fumio Kisida ilə ikitərəfli görüşünün planlaşdırıldığı Xirosima şəhərinə yola düşüb.
Qeyd edək ki, Cozef Bayden dövlət başçısı postunda Xirosima şəhərini ziyarət edən ikinci ABŞ prezidenti olacaq. Bundan öncə 2016-cı ildə Barak Obama II Dünya müharibəsinin sonlarında ABŞ tərəfindən atom bombardmanına məruz qalan şəhərə səfər etmişdi.
Bu arada məlum olub ki, “G7” ölkələrinin Yaponiyada keçirilən sammitində Rusiyanın milyard dollarlıq almaz ixracına sanksiya tətbiq edilməsi də müzakirə ediləcək. Bu barədə AFP-yə adı açıqlanmayan Aİ rəsmisi bildirib: “Biz inanırıq ki, Rusiya ticarətinin bu sektordakı ixracını məhdudlaşdırmalıyıq”.
Xatırladaq ki, dünya iqtisadiyyatının təxminən 65 faizini təmsil edən “Böyük yeddilər”ə ABŞ, Kanada, Fransa, Almaniya, İtaliya, Yaponiya və Birləşmiş Krallıq daxildir. 1997-ci ildən Rusiya bu klubun üzvü olmuşdur. O zaman qrup “Böyük səkkizlər” adlanırdı. 2008-ci ilin avqustunda Rusiaya Gürcüstanın iki vilayətini ilhaq etdikdən sonra klubdan kənarlaşdırılıb.
“Xalq qəzeti”
.jpg)
