Türkiyə Prezidenti Rəcəb Tayyib Ərdoğan dünən qurucusu və lideri olduğu Ədalət və İnkişaf Partiyasının (AKP) qərargahında keçirilən toplantıda bildirib ki, Ankaranın vasitəçiliyi ilə Rusiya-Ukrayna arasında imzalanan “taxıl sazişi”nin müddəti daha iki ay uzadılıb. Məlumatı “Anadolu” agentliyi yayıb.
R.T.Ərdoğan, həmçinin prezident seçkilərinin ikinci turu ilə bağlı fikirlərini də ifadə edib: “Biz bu məsələni bitirənə qədər eyni əzmlə işləməyə davam edəcəyik”.
Türkiyənin müdafiə naziri Hulusi Akar “taxıl sazişi”nin müddətinin iki ay uzadılması ilə əlaqədar jurnalistlərlə görüşü zamanı deyib: “Prezidentimiz Rəcəb Tayyib Ərdoğanın liderliyi ilə həyata keçirilən “taxıl sazişi" daha 2 ay uzadılıb”.
Nazir qeyd edib ki, dünyada ərzaq təchizatı ilə bağlı ciddi ehtiyacları olan ölkələr üçün böyük əhəmiyyət kəsb edən bu təşəbbüsə töhfə verən və dəstəkləyən BMT rəsmilərinə, Rusiyanın müdafiə naziri Sergey Şoyquya, o cümlədən Ukraynanın infrastruktur naziri Oleksandr Kubrakova təşəkkür edirik.
Yeri gəlmişkən, dünən Ukrayna Prezidenti Volodimir Zelenski Türkiyənin dövlət başçısı Rəcəb Tayyib Ərdoğana zəng edərək onu 14 may seçkilərində qələbə münasibətilə təbrik edib, Ukrayna xalqına verdiyi hərtərəfli dəstəyə görə minnətdarlığını bildirib.
“Xalq qəzeti”