Biz heç kimdən asılı deyilik, biz heç kimin işinə qarışmırıq... Heç kimə imkan vermirik və verməyəcəyik ki, öz burnunu bizim işimizə soxsun, istər siyasi məsələlər olsun, istər Azərbaycan – Ermənistan məsələləri olsun, istər Azərbaycanın ayrılmaz hissəsi olan Qa­rabağ olsun. Heç kimə imkan verməmişik və verməyəcəyik, bunu təmin etmək üçün iradə­miz də yerindədir, gücümüz də.

Azərbaycan Prezidenti İlham Əliyevin 10 may 2023-cü il tarixli xalqa müraciətindən

Dövlət başçımızın ulu öndər Heydər Əliyevin 100 illiyi münasibətilə Şuşadan səs­ləndirdiyi müraciəti xalq və ulu öndərin ruhu qarşısında hesabat kimi qəbul edilməklə yanaşı, həm də müasir Azərbaycan reallıqları­nın dünya ictimaiyyətinə növbəti dəfə çatdırılması baxımından xü­susi əhəmiyyət kəsb edirdi. 

Bundan başqa, dövlət başçısı Şuşa səfəri çərçivəsində çoxsaylı təməlqoyma və açılış mərasimlərində də iştirak etdi ki, bu da işğaldan azad edilmiş ərazilə­rimizin bərpası istiqamətində həyata ke­çirilən tədbirlərin miqyası barədə dünya ictimaiyyətində mükəmməl təsəvvür ya­radırdı. Eyni zamanda, həmin səfərlər barədə materiallarla tanış olanlar Qa­rabağ və Şərqi Zəngəzurun bərpasında iştirak edən Heydər Əliyev Fondunun layihələri ilə də tanış olduılar. 

Xatırladaq ki, ərazilər işğal altında olanda barbar qonşularımız 65 məscidi­mizi dağıtmış, qalanlarını isə təhqir et­mişdilər. Mayın 10-da keçirilən tədbirlər isə Cənubi Qafqazda kimin kim olduğunu sübut etmək baxımından da xüsusi əhə­miyyət kəsb edirdi. Yəni biz sübut etdik ki, ermənilər tarixdə yırtıcı, dağıdıcı, barbar kimi qalacaqlar. Azərbaycanlılar isə bütün maddi və mənəvi dəyərləri qo­ruyan, inkişaf etdirən, qurucu xalq kimi tanınırlar. 

Həmin gün Azərbaycan Respubli­kasının Prezidenti İlham Əliyev, birinci xanım Mehriban Əliyeva və ailə üzvləri Şuşada Yuxarı Gövhər ağa məscidinin əsaslı yenidənqurma və bərpadan sonra açılışında iştirak ediblər. Dövlət başçımı­za məlumat verilib ki, Yuxarı Gövhər ağa məscidində 2021-ci ilin sonlarından apa­rılan bərpa işləri başa çatıb. Məscid ölkə əhəmiyyətli tarixi-mədəniyyət abidələri siyahısındadır. Məscidin müəllifi məşhur memar Kərbalayi Səfixan Qarabağidir. Bu, müəllifin ən yaxşı əsərləri sırasına daxildir. Məscidin minarələrinin orna­mentləri və otaqların divar rəsmləri Şuşa şəhərində yaşayıb-yaratmış şair, rəssam və xəttat Mir Möhsün Nəvvab Qarabaği tərəfindən işlənib.

Əlavə edilib ki, Şuşa şəhəri işğal al­tında olduğu müddətdə Yuxarı Gövhər ağa məscidi ermənilər tərəfindən dağı­dılmışdı. Şəhər işğaldan azad edildikdən sonra məsciddə başlanılan konservasiya və bərpa işləri Azərbaycan, İtaliya və Tür­kiyə şirkətlərinin konsorsiumu tərəfindən Avstriyanın “Wehdorn Architekten” şirkə­tinin nəzarəti ilə ilkin memarlıq üslubuna uyğun aparılıb. Layihə “PAŞA Holding”in maliyyə dəstəyi ilə həyata keçirilib.

Dövlət başçımızın Şuşadan səslən­dirdiyi müraciətin elə məqamları var ki, onlar Azərbaycandan çox Ermənistanda şərh olunur, nəinki hər cümlənin, hətta hər sözün təhlili aparılır, “İlham Əliyev bu cümlə ilə hansı sətiraltı fikirləri çatdı­rır?” – sualına cavab axtarılır. 

Prezident dostlarımıza xatırlatdı, bədxahlarımıza isə mesaj göndərdi ki, Azərbaycan demokratik ölkədir və bura­da insanlar azad yaşayırlar. Yəni “Qara­bağdakı ermənilər azərbaycanlılarla bir yerdə yaşaya bilməzlər” – tezisini tutuqu­şu kimi təkrarlayan işğalçı ölkənin ideo­loqları dünyanı aldatmağa çalışmasınlar. Çünki dünyada hamı görür ki, Azərbay­canda bütün xalqların, bütün konfessiya­ların nümayəndələri bir ailə kimi yaşayır­lar. Hətta bizdəki tolerantlığı dünya üçün nümunə adlandıranlar da az deyil. 

Prezident dedi ki, indi durduğumuz Şuşa şəhərini Azərbaycanda yaşayan bütün xalqların qanı, canı bahasına düş­mən işğalından azad etmişik? Bu, böyük sərvətdir. Amma elə ölkələr var ki, orada milli, dini zəmində qarşıdurmalar baş ve­rir, toqquşmalar baş verir: “Elə ölkələr var ki, orada heç bir başqa xalqın nümayən­dəsi yaşaya bilmir. Elə Ermənistanı misal göstərək. Əhalisinin 99,9 faizi ermənilər­dən ibarət Ermənistan bax, bu rəqəmlə faktiki olaraq öz faşist siyasətini göstərir. Ancaq vaxt var idi indiki Ermənistanın əhalisinin əksəriyyətini azərbaycanlılar təşkil edirdi, digər millətlərin nümayən­dələri təşkil edirdi. İndi Avropanın bəzi ölkələrində, Ermənistana böyük rəğbətlə yanaşan ölkələrdə islamofobiya baş alıb gedir”. Bu, bizim həyat tərzimizdir və eyni zamanda, bu, bizim siyasətimizdir, bu, bi­zim gücümüzdür. Bu gün belədir, bundan sonra da belə olacaq. Ancaq belə olan halda, biz bundan sonra da rahat yaşa­ya bilərik, öz gələcəyimizi özümüz qura bilərik”.

Dövlət başçımızın Azərbaycana qarşı yeni təhdidlərlə çıxış edənlərə və revan­şizm xülyaları ilə yaşayanlara göndərdi­yi növbəti mesaj ölkəmizin beynəlxalq aləmdəki artan nüfuzu, hörməti barədə idi. Xatırladaq ki, biz artıq dörd ilə yaxın­dır ki, Qoşulmama Hərəkatı kimi dünya­nın ikinci beynəlxalq təsisatına rəhbər­lik edirik və ümumi rəyə görə, ləyaqətlə rəhbərlik edirik: “Əgər belə olmasaydı, bizim sədrlik müddətimiz 120 ölkənin yekdil səsi ilə daha bir il uzadılmazdı. Bu gün Avropa üçün Azərbaycan çox önəmli ölkəyə çevrilib. Biz Avropa İttifaqı­na üzv ölkələrin üçdəbiri – doqquz ölkə ilə strateji tərəfdaşıq. Yəni, beynəlxalq mövqelərimiz kifayət qədər güclüdür. Biz beynəlxalq müstəvidə bizə lazım olan bütün sənədləri, qətnamələri qəbul etdirə bilmişik və bu, İkinci Qarabağ müharibə­sinin uğurla aparılması üçün də öz rolu­nu oynamışdır. Çünki biz həqiqəti sübut etmişik. Biz yalnız həqiqəti sübut etməyə çalışırdıq və ona nail olduq ki, bu, bizim torpağımızdır. Bax, durduğum torpaq Azərbaycan torpağıdır. Biz beynəlxalq təşkilatlar çərçivəsində fəal işimizlə bu hüquqi və siyasi bazanı yarada bilmişik”.

Başqa bir məqamı da yada salaq. Cənab Prezident bütün tədbirlərdə və müsahibələrində olduğu kimi. Şuşadan səsləndirdiyi müraciətində də ordu qu­ruculuğu məsələsini xüsusilə qabartdı. Qeyd etdi ki, İkinci Qarabağ müharibə­sindən sonra biz ordunun maddi-texniki bazasının müasirləşdirilməsi və şəxsi heyətin peşəkarlığının artırılması is­tiqamətində fəaliyyətimizi davam etdirdik: “Bu ilin dövlət büdcəsinə əlavələr edilə­cək, o əlavələrin böyük bir hissəsi yenə də hərbi məqsədlər üçün nəzərdə tutulur. Nə üçün? Çünki biz daim hazır olmalıyıq. Təhdidlər artır, təhlükələr artır və biz hər bir təhlükəni dəf etməyə qadir olmalıyıq. Bu gün də belədir. Azərbaycan Ordusu dünyanın ən güclü ordularının sırasında­dır – həm təchizat, həm döyüş qabiliy­yəti nöqteyi-nəzərdən”. 

Bu gün dünyada gedən çoxsaylı ic­timai-siyasi proseslərin yaratdığı infor­masiya bolluğu Azərbaycan Ordusunun İkinci Qarabağ müharibəsindəki Qələbə­si və yaradılmış yeni reallıqlar haqqında məlumatları ikinci plana ötürə bilmir. Hət­ta ekspertlər yazırlar ki, bu zəfər Azər­baycan durduqca qalacaq. Prezidentin fikrincə, bu, qəhrəmanlıq dastanıdır: “Bu, misli görünməmiş qəhrəmanlıqdır. Ermə­nistan 30 il ərzində öz himayədarlarının dəstəyi ilə bu torpaqları bizə verməmək üçün gecə-gündüz əlləşirdi. Həm coğra­fi relyefə arxalanırdı, 5, 6, bəzən 7 xətt müdafiə istehkam qurğularına arxalanır­dı və himayədarlarına arxalanırdı. Hesab edirdilər ki, biz bu vəziyyətlə barışacağıq. Amma mən deyirdim ki, yox, barışmaya­cağıq. Deyirdim ki, gec-tez gələcəyik, bir təpiklə düşməni qovacağıq, öz bayrağı­mızı qaldıracağıq və öz doğma torpaq­larımızda yaşayacağıq. İkinci Qarabağ müharibəsi bütün dünyaya Azərbaycan xalqının əyilməz ruhunu göstərdi. Bizi qabağa aparan məhz bu idi”.

Xatırladaq ki, cənab Prezident təkcə Şuşadan səsləndirdiyi tarixi müraciətində deyil, ümumiyyətlə, bütün çıxış, nitq və müsahibələrində dönə-dönə xatırladır ki, kiminsə bizim daxili işlərimizə qarışma­sına imkan verməmişik və verməyəcəyik. Məsələn, ötən ay Salyanda AzTV-yə ver­diyi müsahibədə demişdi ki, Qarabağ bi­zim daxili işimizdir. Qarabağda yaşayan ermənilər ya Azərbaycan vətəndaşlığını qəbul etməlidirlər, ya da ki, özləri üçün başqa yaşayış yeri tapmalıdırlar. Bura­da tam sərbəstlik var, bütün demokratik əsaslar təklif olunur. Bu məsələ insan hüquqları əsasında öz həllini tapmalıdır. Bu gün bizim hərəkətlərimiz onu göstərir və niyyətimiz ondan ibarətdir ki, tezliklə sülh müqaviləsi imzalansın, Azərbaycan­la Ermənistan arasında bu qarşıdurmaya son qoyulsun.

İttifaq MİRZƏBƏYLİ, “Xalq qəzeti”