“Ermənistanın 5 mart təxribatı bir daha onu göstərdi ki, Laçın yolunun son nöqtəsində, Ermənistan–Azərbaycan sərhədində sərhəd-nəzarət məntəqəsinin qurulması labüddür”.
Bunu Azərbaycan Respublikası Prezidentinin köməkçisi, Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev mediaya müsahibəsində bildirib. O qeyd edib ki, Azərbaycanın Rusiya sülhməramlılarının müvəqqəti yerləşdiyi ərazilərində təbii sərvətlərimizin qanunsuz istismarına etiraz olaraq dekabrın 12-dən bəri Laçın–Xankəndi yolunda vətəndaş cəmiyyətinin nümayəndələri, ekofəallar aksiya keçirirlər: “Biz ilk gündən demişik ki, Laçın yolu bağlanmayıb, Rusiya sülhməramlıları, Beynəlxalq Qırmızı Xaç Komitəsi, humanitar yüklər rahat şəkildə yoldan keçir. Dekabrın 12-dən bugünədək 3 600-dan çox maşın Laçın-Xankəndi yolundan keçib. Məgər belə blokada olur?"
Laçın–Xankəndi yolunda davam edən aksiya dinc məqsədlidir, etiraz edənlərin avtomatı, topu-topxanası, tankı yoxdur və qanuni tələblər irəli sürürlər. Amma Ermənstan isə o iddiadadır ki, guya, Laçın yolu “blokada”dır, Azərbaycan Qarabağda yaşayan erməni sakinlərə qarşı “genosid” törətməyə hazırlaşır.
Ermənistanın təbliğat maşını hələ də Laçın–Xankəndi yolunun bağlı olduğunu deyir, humanitar böhranın meydana çıxmasından, “blokada”dan danışır. Bunlar həqiqətə uyğun deyil, açıq-aşkar dünya ictimaiyyətini aldatmaq cəhdidir. Reallıq isə budur ki, həmin yol mülki şəxslər və mülki təyinatlı yüklərin keçidi üçün açıqdır, həmçinin Beynəlxalq Qızıl Xaç Komitəsinin xətti ilə humanitar yüklərin sərbəst hərəkəti təmin edilir.
Rusiya sülhməramlılarına məxsus avtomobillərin Laçın–Xankəndi yolunda hərəkəti daha da intensivləşib. Belə ki, gün ərzindən, ümumilikdə, 100-dən çox humanitar təyinatlı avtomobilin keçidinə şərait yaradılıb.
Dünya ictimaiyyətinə də bəllidir ki, Azərbaycan dövlətinin nəzarəti olmadan Laçın yolunda şəffaflığı təmin etmək mümkün deyil. Bu aksiya həm də separatizmə, onun hər cür təzahürünə qarşı yönəlib və regionda sabitliyin, təhlükəsizliyin təmini baxımından mühüm əhəmiyyətə malikdir. Regionda ekoloji fəlakətin qarşısının alınması, sülh və sabitliyin təmini baxımından vacibdir və dünya bu məsələdə Azərbaycanın haqq işinə dəstək verməlidir.
Türkiyə mediasında davamlı olaraq Azərbaycan ərazilərində Ermənistanın törətdiyi ekoterrora diqqət yönəldilir. Məqalələrdə Azərbaycandakı ekofəalların, qeyri-hökumət təşkilatlarının nümayəndələrinin, şəhid ailə üzvləri və qazilərin könüllülərlə birlikdə Azərbaycanın işğaldan azad olunmuş Qarabağ bölgəsində təbii sərvətlərin Ermənistan tərəfindən talan edilməsinə, ekoloji terror törədilməsinə etiraz məqsədilə dekabrın əvvəllərindən başlayaraq Laçın–Xankəndi yolunda fasiləsiz dinc aksiya keçirdikləri qeyd edilib.
Sülh gündəliyinin irəli aparılması üçün Azərbaycan hər zaman təşəbbüs göstərib. Sülh müqaviləsinin bütün prinsipləri də qarşı tərəfə təqdim edilib. Azərbaycan dövləti növbəti humanitar niyyətini bəyan edib. Belə ki, Azərbaycan Respublikası Prezidentinin Administrasiyası Qarabağın erməni ictimaiyyətinin nümayəndələrini reinteqrasiya ilə bağlı təmasların davam etdirilməsi, habelə Qarabağda infrastruktur layihələrinin reallaşdırılması məsələlərinin müzakirəsi üçün ikinci görüşə dəvət edir. Görüşün yaxın günlərdə Bakı şəhərində keçirilməsi təklif olunur.
Rizvan FİKRƏTOĞLU, “Xalq qəzeti”
