Hər bir xalqın taleyində dövlətçilik ruhunun sübutu kimi qiymətləndirilən ağır hadisə və proseslərin yaşanması, müəyyən mənada, məntiqi qanunauyğunluq sayıla bilər. Bu mənada 20 Yanvar faciəsi birləşdirici faktordur. Millətimizi birləşdirən tarixi yaşantıdır. Elə bir yaşantı ki, qürur və fəxarət mənbəyimizdir.
Bəli, 20 Yanvar faciəsi nə qədər dəhşətli xarakter daşısa da, xalqı sanki cilalayır, onda bütövləşmək əzmi yaradır. Bu əzm dövlətçilik çırpıntımızın, obrazlı desək, ilk qaranquşudur.
Qətiyyətlə demək olar ki, 20 Yanvar faciə yaşantımızın dövlət müstəqilliyi ruhuna kökləndiyi şanlı tariximizdir. Mətanət, mübarizə və dirəniş salnaməmizin nəsillərə örnək qalacaq müqəddəs nümunəsidir.
20 Yanvar həm də ölümün ölümsüzlük zirvəsidir. Şəhidlərimiz bu günümüzün, sabahımızın qəlblərdə yaşayacaq əbədi varlıq simvollarıdır. Onlar bizim üçün əbədi var olacaq, əbədi yaşayacaqlar.
Tarixə qanla yazılan 20 Yanvar faciəsi Vətəni, azadlığı uğrunda ölümün gözünə dik baxan Azərbaycan övladlarının varlığını bir daha dünyaya tanıtmaqla yanaşı, SSRİ adlanan nəhəng imperiyanın çöküşündə əsas amillərdən biri oldu. Tarixi prizmadan yanaşdıqda, aydın olur ki, 20 Yanvara aparan yol 1988-ci ilin ziddiyyətli hadisələrindən başlanır. Keçmiş imperiya rəhbərliyinin “xeyir-duası” ilə Ermənistanın Azərbaycana qarşı başladığı ərazi iddiaları nəticə etibarilə xalqımızın milli müstəqillik və istiqlaliyyət uğrunda mübarizəsinə impulslar verdi.
Azərbaycanın informasiya blokadasına alındığı bir şəraitdə baş vermiş həqiqətləri operativ surətdə dünya ictimaiyyətinə çatdırmaq zərurəti yaranmışdı. Dəhşətli faciəyə kəskin etiraz olaraq 1990-cı il yanvarın 21-də ailə üzvləri ilə birgə Azərbaycanın Moskvadakı daimi nümayəndəliyinə gələrək mətbuat konfransı keçirən ulu öndər Heydər Əliyev hadisəyə operativ və düzgün qiymət verən ilk vətənpərvər lider oldu. "Buraya ən əvvəl ona görə gəlmişəm ki, Azərbaycanın Moskvada kiçik parçası olan daimi nümayəndəliyində, böyük itkilərə səbəb olmuş faciə ilə bağlı bütün Azərbaycan xalqına başsağlığı verim. İkinci tərəfdən, bu məsələyə öz münasibətimi bildirmək istəyirəm. Azərbaycanın Moskvadakı nümayəndəsindən xahiş edirəm ki, mənim sözlərimi, kədərimi, başsağlığımı Azərbaycan xalqına çatdırsın. Hazırda başqa imkanım olmadığı üçün təəssüf hissi keçirirəm. Azərbaycanda baş vermiş hadisələrə gəlincə, mən onları hüquqa, demokratiyaya yabançı, humanizmə və ölkəmizdə elan olunmuş hüquqi dövlət quruculuğu prinsiplərinə zidd hesab edirəm" - deyən Ulu öndərin bu qətiyyətli mövqeyi respublikamızın informasiya blokadasına alındığı çətin günlərdə totalitar rejimə ağır və sarsıdıcı zərbə oldu. Böyük öndər üzləşdiyi hərbə-zorbalara məhəl qoymadan, öz cəsarəti, yenilməzliyi ilə Azərbaycana sədaqətini növbəti dəfə nümayiş etdirdi. Totalitar rejimin "repressiya maşını"nın sərtliklə işə düşdüyü bir zamanda keçmiş SSRİ rəhbərliyini, konkret olaraq M.Qorbaçovu, Ə.Vəzirovu baş vermiş hadisəyə görə kəskin ittiham etmək böyük risk idi.
Ədəbiyyatda itirilmiş nəslin nəhəng nümayəndəsi kimi tanınan görkəmli ABŞ yazıçısı Frensis Skot Ficeraldın qəribə fikri var – mənə qəhrəmanı göstərin, sizə faciə yazım. Yazıçının dəst-xəttinə bələd olduğumuzdan onun qəhrəman kimi təsəvvür etdiyi şəxsə faciə sonluğunu yaraşdırmasında məntiq görmüşəm.
Azərbaycan xalqı və 20 Yanvar. Görünür, faciə ssenarisi də məntiqi idi. Çünki xalq qəhrəmana çevrilmişdi. Ancaq 20 Yanvar başqa faciələrə bənzəmədi. Bədii təxəyyüllərdəki qəhrəmanlar üçün faciə hər şeyin sonudursa, 20 Yanvar başlanğıc idi. Bizləri dövlət millətinə çevirən, müstəqilliyə aparan yoldakı böyük başlanğıc. Buna görə də 20 Yanvar qəhrəmanlıq salnaməmizin, dövlətçilik tariximizin mühüm səhifəsidir. Bu səhifənin yazılmasında qanını mürəkkəbə çevirən Vətən övladlarının müqəddəs ruhları qarşısında baş əyir, onların şücaətindən qürur duyuruq!
Allah şəhidlərimizə rəhmət eləsin!
Əflatun AMAŞOV,
baş redaktor