Onlar Qarabağda ölüm təhlükəsini öldürənlərdir
44 günlük müharibədə qazandığımız qələbəmnin yaratdığı qürur hissi illər keçdikcə öyüncümüzü artıracaq. Dünya hərb məktəblərində isə Azərbaycan Ordusunun savaş taktika və strategiyası daha geniş öyrəniləcək. Bunula yanaşı, müharibədən sonra erməni işğalı zamanı basdırılmış mina və partlayıcı sursatlar, partlamamış hərbi sursatlarla çirklənmiş ərazilər xalqımıza bəla gətirməkdə, hər birimizi ağrıtmaqda davam edir.
Qələbənin səhəri günündən ərazilərin ölümsaçan vasitələrdən təmizlənməsi işi diqqət mərkəzində olub. Bu məqsədlə ANAMA intensiv minatəmizləmə əməliyyatları həyata keçirir. Prosesə ictimai dəstəyi genişləndirmək üçün Avropa İttifaqı (Aİ) və ABŞ Dövlət Departamenti tərəfindən maliyyələşdirilən, Birləşmiş Millətlər Təşkilatının İnkişaf Proqramının ANAMA, Beynəlxalq Avrasiya Mətbuat Fondu (BAMF) və Minalar üzrə Məsləhət Qrupu (MAG) ilə birgə tərəfdaşlıqla gerçəkləşdirdiyi “Azərbaycan Respublikasının Minatəmizləmə Agentliyinin imkanlarını artırmaqla məcburi köçkünlərin təhlükəsiz qayıdışına dəstək” layihəsinə start verilib. Azərbaycanda ilk qadın minatəmizləmə qruplarının yaradılmasını hədəfə alan bu layihə çərçivəsində 4 belə minatəmizləmə qrupu yaradılıb.
İstehkamçı dəstələrdən 2-si yalnız qadınlardan, 2-si isə qadın və kişilərdən ibarətdir. Tamamilə qadınlardan ibarət olan hər iki qrupun xanımları ilə həmsöhbət olduq. Onlar missiyanın çətin və təhlükəli olmasına baxmayaraq, işlərinin öhdəsindən gəldiklərini dedilər, bu humanitar fəaliyyətlə məşğul olduqları üçün qürur hissi keçirdiklərini bildirdilər.
Bakı Dövlət Universitetinin Sabah qruplarının coğrafiya ixtisaslı məzunu Səmayə Əhmədli ölkəmizdə xanımlardan ibarət ilk minaaxtaran qrupun nümayəndəsi olmaqdan şərəf duyduğunu bildirdi. Səmayə xanımın qardaşı 2-ci Qarabağ müharibəsi iştirakçısı olub. Ailəsi cəsur döyüşçünü müharibə bitəndən sonra da mina qorxusu ilə gözləyib. Erməni terrorunu heç vaxt qəbul edə bilməyən Səmayə ölkəmizdə ölkəmizdə mina təhlükəsini ermənilərin düşmənçiliyi davam etdirməsinin danılmaz və bağışlanmaz göstəricisi olduğunu söylədi.
O dedi ki, BAMF-ın sosial şəbəkə hesablarında elanı görən kimi bu işlə məşğul olacağına qərar verib. Ailəsi narazı olsa da, onları razı sala bilib:
– Valideynlərim ilk vaxtlar qərarıma etirazla yanaşdılar. Onlara təlimləri keçib geri qayıdacağımı dedim. Lakin təlimlər bitdikdən sonra razılaşdılar və işə başladım. İxtisasımın müəllimlik olduğunu bilən hər kəsə minatəmizləmə kimi təhlükəli bir işə başlamağım qəribə gəldi. Keçən il sentyabrın 25-də Ağdam rayonunun Baş Qərvənd kəndində işə başlamışam. Yaşadığımız məntəqədən hər gün səhər saat 7-də iş sahəmizə yola düşürük. Saat 8-də sahədə minatəmizləmə əməliyyatımız başlayır. Hazırda Güllücə kəndində fəaliyyətimizi davam etdiririk. Mənim üçün işin bir qədər çətinliyi yay aylarında havaların isti olmasıdır.
Müsahibim sonra qeyd etdi ki, minaların növündən, materialından, ölçüsündən asılı olmayaraq hər biri təhlükəlidir. O, Baş Qərvənd kəndinin “Ohanyan səddi”ndə piyada əleyhinə erməni istehsalı olan PMN-2 minaları, eləcə də xeyli partlamamiş hərbi sursat aşkar edib. Səmayə xanım qeyd etdi ki, daxil olduğu qrupda 2 qadın paramedik olmaqla, 25 minaaxtaran xanım var. O, başına gələn hadisələri, işinin çətinliyini də dilə gətirdi:
– Sahədə təxliyə təlimi zamanı süni partlayışın yaradılması, dağıdılmış evləri təmizləyən zaman zəhərli ilanlarla qarşılaşmaq ilk baxışdan qorxu yaradır. Hər bir işin çətinliyi var. Lakin işimi sevdiyim, onun önəmini anladığım üçün istənilən çətinliyin öhdəsindən gəlmək asan olur. Relyefdən asılı olaraq dağlıq, dərəlik, düzənlik yerləri təmizləyirik.
Səmayə xanım onlar üçün yaradılan şəraitdən, görülmüş təhlükəsizlik tədbirlərilə bağlı hər şeyin yüksək səviyyədə təşkil olunduğundan da danışdı.
Digər qrupun üzvü Tarifə Niftalıyeva ilə də həmsöhbət olduq. Laçın rayonunun Qarabəyli kəndində anadan olmuş, məcburi köçkün həyatı yaşamış Tarifə xanım erməni vəhşiliyindən, xalqımızın terrorizm nəticəsində çəkdiyi əziyyətlərdən söz açdı. Yaşadığı çətinliklər, erməni vandalizmi onun düşüncəsində belə bir işdə çalışmaq, xalqımız üçün faydalı olan işlər görmək arzusunu yaradıb:
– Orta təhsilliyəm, Belə işləri bacara bilməyəcəyimi çoxu demişdi. Həvəsim və arzum isə bacarığıma zəmin yaratdı və mən bacardım. Təlimlərə qatıldım, öyrədilən bilikləri dərindən mənimsəyə bildim. İlk iş yerim olmasına baxmayaraq, bu, mənim üçün heç bir problem yaratmır. Bu işin çətin, əziyyətli tərəfləri çoxdur. Məsələn, səhər erkən oyanmalı, işə getmək üçün hazırlıq görməlisən.
Tarifə xanımın 2 övladı var. Oğlunun 21, qızının isə 19 yaşı var. O, doğmalarının bu işə başlamasına heç bir etirazının olmamadığını söylədi:
– Nəinki narazılıqlar oldu, hətta dəstək gördüm. Lakin oğlumun minaaxtaran kimi çalışmasına etiraz etdim. Bu işin içindəyəm və necə çətin, məsuliyyətli olmasını yaxşı bilirəm. Burada səhvə yol vermək olmaz. Çünki adi bir diqqətsizlik həyatımız bahasına başa gələ bilər. Məsuliyyət hissimiz yüksək olmalı, bütün təhlükəsizlik məsələlərini nəzərə almalıyıq. Bu işdə edilən səhvi geriyə qayıdıb düzəltmək mümkün olmur. Yaxşı deyiblər ki, minaaxtaran cəmi 1 dəfə səhv edir… Sursatların partladılması həyata keçirilərkən onun səsləri qonşu rayonlara da yayılır. Övladlarım nəsə bir hadisə olmayıb deyə zəng edib soruşurlar.
Tarifə xanım bu işin nə qədər nigaranlıq, çətinlik törədən fəaliyyət olmasına baxmayaraq, ictimai önəmli iş olduğunu da qeyd etdi.
Müsahibim işinin faydasından, uğurundan da danışdı:
– Ağdamın Baş Qərvənd kəndində piyada əleyhinə mina aşkarlamışam. Həyəcanlı idim, əməyimin ilk bəhrəsi idi. Sanki, dəyərli bir şey tapmış kimi sevinirdim. Düzü, bu sevincin qorxusu da var idi. İşə başladığım müddətdə yadımda qalan epizod Baş Qərvənddəki “Ohanyan səddi” deyilən ərazidə 3 qat məftillə əhatələnmiş xətləri kəsəndə çətinliklər yaşamağımız idi. O məftilləri kəsmək və digər işləri yerinə yetirmək qadın olaraq bizim üçün çox çətin idi. Amma biz bu işi bacardıq. Qadın kimi zərif olsaq da, zəif deyilik. İşimizi sevirik, bu məsul sahədə işləmək bizim üçün qürurdur. Fəxr edirik ki, “Qayıdış”da bizim də payımız olacaq. Bundan böyük qürur, xoşbəxtlik, şərəf hissi ola bilməz. Vətəninə, millətinə xidmət etməkdən gözəl nə ola bilər ki?
Tarifə xanımın üzvü olduğu 26 nəfərlik qrup hazırda Ağdam rayonunun Güllücə kəndində vizual minaların axtarışındadır:
– İşimiz təhlükəlidir, hər an “sürprizlərlə” qarşılaşa bilərik. Qrup rəhbərimiz kişilərdir, bu bizim üçün problem yaratmır. Lakin bu ayın sonu tezliklə qrup rəhbəri kurslarından sonra bizim rəhbər və müavinlərimiz xanımlardan ibarət olacaq.
Ermənilərin tarix boyu xalqımıza qarşı törətdiyi qırğınların, vəhşiliklərin, mina terrorunun fəsadlarını bu gün mina təhlükəsi şəklində yaşayırıq. Lakin qəddar düşmənlərin minalarını zərərsizləşdirənlər, bütün maneələri aşaraq işğaldan azad etdiyimiz ərazilərimizə, tarixi Azərbaycan torpaqlarına qayıdışı sürətləndirənlərdir.
Rizvan FİKRƏTOĞLU
XQ