“Beyin atrofiyası – beyin toxumasının kiçilməsini və geriyə inkişaf prosesini ifadə edən tibbi termindir. Bu proses beyin hüceyrələrinin və əlaqələrin itkisi ilə təsvir olunur. Beyin atrofiyası bir sıra müxtəlif səbəblərlə əlaqələndirilir. Səbəblərin kompleksliyi bu vəziyyətin diaqnozu, müalicəsi və nəticələrinin anlaşılmasını çətinləşdirə bilər”.
Bu sözləri ATU-nun neyrocərrahiyyə kafedrasının müdiri, dosent Rövşən Xəlilzadə XQ-yə verdiyi müsahibəsində deyib. Həkim beyin atrofiyasının yaranmasının müxtəlif səbəblərlə əlaqələndirildiyini və yaşla birlikdə artan xəstəlik olduğunu bildirib:
– Beyin atrofiyasına səbəb olan patologiyalardan biri neyrodegenerativ Alzheimer xəstəliyidir. Əgər beyin hüceyrələri hər hansı səbəbdən zədələnir və yaxud ölürsə, beyin toxumasının həcmi kiçilir. Bir başqa xəstəlik olan multipl skleroz (MS) zamanı da immun sistemi orqanizmdə patoloji olaraq sinir hüceyrələrinə hücum edir və beyin toxumasının kiçilməsinə səbəb olur. Əgər xarici travma ilə bağlı əmələ gələn beyin yaralanmaları nəticəsində ətraf beyin toxuması zərər görərsə və həmin nahiyədə itki baş verərsə, o zaman cərrahi əməliyyata ehtiyac duyulur. Bundan başqa, insult, yüksək təzyiq və digər vaskulyar xəstəliklər də beyin toxumasının kiçilməsinə səbəb olur. Çünki həmin vaxt beyinə kifayət qədər oksigen və qan axını təmin edilmir. Bəzi beyin infeksiyaları – baş beyin exinokokku, meningit, meningoensefalit, beyin absesi və digərləri beyin toxumasında iltihab yaranmasına səbəb olur. Bundan başqa, bir sıra genetik xəstəliklər də beyinin boz maddəsinin normal inkişafına mane ola və beyin atrofiyasına gətirib çıxara bilir.
– İnfeksiya, yaxud genetik xəstəliklər səbəbindən baş verən beyin atrofiyasi özünü necə göstərir? Simptomları fərqlidirmi?
– Beyin atrofiyasının simptomları əsasən, yaşlı adamlarda, bəzən isə erkən yaşlarda da rast gəlinən yaddaş problemləri, unutqanlıq, iradi funksiyaların azalması, yəni, düşüncə, problem həll etmə keyfiyyətinin azalması, diqqət əskikliyidir. Əksər hallarda yaşlı insanlarda bu simptomlar özünü koordinasiya və müvazinət pozuntusu, sinir-əzələ keçiriciliyinin azalması, nitq qabiliyyətinin zəifləməsi, artan nevroloji şikayətlər, məsələn, Alzheimer və Parkinson kimi xəstəliklərlə göstərir.
– Xəstəliyin diaqnostikası, gedişi və müalicəsi necə aparılır?
– Beyin toxumasının itkisi koqnitiv funksiyalarda pozğunluq yaratdığından yaddaş, düşünmə, qərar vermə və hər hansı problemi həll etmə kimi bacarıqlara da təsir göstərir. Məsələn, hərəkət pozğunluğu haqda danışa bilərik. Beyin toxumasının kiçilməsi beyinin bədən üzərində nəzarətinə təsir edə və koordinasiya problemlərinə səbəb ola bilər. Bu vəziyyət müvazinət pozğunluğu və yerimədə çətinliklər kimi problemlərə gətirib çıxarır. Hətta beyin atrofiyası şəxsiyyət dəyişiklikləri, depressiya, təşviş, həyəcan, emosional instabillik kimi ruhi problemləri inkişaf etdirir.
Bundan başqa, beyin atrofiyası zamanı qadınlarda günlük rutin həyat fəaliyyətini yerinə yetirmədə çətinləşmə və aktivlik keyfiyyətində azalma müşahidə edilir. Bu ən çox klimaks dövründə özünü göstərir. Həmin dövrdə yumurtalıqlardan estrogen ifraz olunmasının çətinləşməsi sadəcə menstruasiyanın pozulma problemlərini deyil, eyni zamanda, nevroloji simptomların yaranmasına səbəb olur.
Beyin atrofiyasına maqnit rezonans tomoqrafiya (MRT) və ya kompüter tomoqrafiyası (KT) kimi instrumental müayinə üsulları ilə diaqnoz qoyulur. Əgər beyin atrofiyası altda yatan səbəblərlə əlaqələndirilirsə, bu xəstəliyin müalicəsi birincilidir. Məsələn, atrofiyanın səbəbi Alzheimer xəstəliyidirsə, bu xəstəliyin simptomlarının idarə edilməsi üçün dərmanlardan istifadə edilə bilər. Bundan başqa, hərəkət və kommunikasiya bacarıqlarını inkişaf etdirmək üçün fiziki və danışıq terapiyası məsləhət görülür. Simptomatik müalicə zamanı bəzi dərmanlardan istifadə edilə bilər. Lakin xüsusi hallarda neyrocərrahi müdaxilələrə ehtiyac duyulduğunu da yaddan çıxartmaq olmaz.
– Bu xəstəlikdən necə qorunmaq olar?
– Genetik səbəbləri demirik, çünki onlar altda yatan səbəblərdir. Amma çalışmaq lazımdır ki, heç kim beyin infeksiyalarına yoluxmasın. Bu xəstəlikdən əziyyət çəkən insanların həyat keyfiyyətini artırmaq üçün psixososial dəstək və təcili yardım tələb olunur. Bu vəziyyət hərəkət və ruhi funksiyalarda pozğunluğa gətirib çıxardığından, diaqnoz və müalicəsi səbəblərdən asılı olaraq dəyişir. Hər hansı simptom müşahidə edilərsə, ləngimədən həkimə müraciət etmək lazımdır.
Amma onu da qeyd etməliyik ki, travmatik beyin zədələrində spastiklik adlanan qeyri-iradi əzələ daralmaları baş verə bilər. Yaranan sancılar xəstənin oynaq hərəkətlərini pozursa və ya hərəkət zamanı ağrıya səbəb olursa, müalicə edilməlidir. Müalicədə cərrahi üsullarla yanaşı dərmanlar, fizioterapiya və məşqlər də tətbiq oluna bilər. Travmatik beyin zədələrində reabilitasiyanın müvəffəqiyyətinə beyin zədəsinin şiddəti, yaş, cins, xəstəlikdən əvvəlki vəziyyət, sosial-iqtisadi parametrlər kimi bir çox amillər təsir edir.
Müalicə prosesi uzun olsa da, əksəriyyəti gənc olan xəstələr düzgün reabilitasiya proqramı ilə sağalırlar. Vaxtında qoyulan düzgün diaqnoz və uyğun müalicə bu insanların həyat keyfiyyətini artırır və simptomların idarə olunmasına yardım edir.
Zərifə BƏŞİRQIZI
XQ