“Xalq qəzeti”nin 2023-cü il – Heydər Əliyev ilinə həsr etdiyi “Heydər Əliyev xatirələr işığında” layihəsində ilk qonağımız olan görkəmli dövlət xadimi və diplomat Həsən Həsənovla 6 hissədən ibarət söhbətimiz oxucular arasında böyük maraqla qarşılandığı üçün təkrar görüşüb geniş müsahibə almaq qərarına gəldik. Beləliklə, xatirələr dolu 7-ci söhbətimizi təqdim edirik.
VII SÖHBƏT
– Həsən müəllim, Heydər Əliyevin respublikaya rəhbərlik etdiyi 1969-1982-ci illər təkcə sosial-iqtisadi intibah dövrü olmadı, həm də elmimizin, mədəniyyətimizin, ədəbiyyatımızın, incəsənətimizin intibah dövrü idi. Azərbaycanda bu intibaha yol açmaq üçün Heydər Əliyevin təbii ki, sehirli çubuğu yox idi. Bəs buna necə nail olurdu?
– İstənilən fəaliyyət sahəsində, xüsusilə dövlət idarəçiliyində sistemli yanaşma olmalıdır. Bir var təsadüfi diqqət, bir də var daimi, ardıcıl fəaliyyət. Təsadüfi diqqətlə, təbii ki, nə mədəniyyətdə, nə elmdə, nə də iqtisadiyyatda intibah ola bilməzdi. 1981-ci ildə mən Azərbaycan KP MK-nın ideoloji katibi təyin ediləndə, artıq bu proseslər geniş vüsət almışdı. Bir gün Heydər Əliyev mənə dedi, “Azərbaycan tarixi”nin, “Azərbaycan ədəbiyyatı tarixi”nın, hətta “Azərbaycan fəlsəfəsi tarixi”nin çoxcildliyini hazırlayıb nəşr etməliyik. Bu nəşrlərin üzərində ciddi iş başlamışdı və böyük şəkildə gedirdi. Amma bütün bunlara baxmayaraq, həmin dövrdə elmimiz Heydər Əliyevin istədiyi səviyyədə, potensialda və bu işləri görməyə hazır səviyyədə deyildi. Niyə bunu deyirəm?
Məsələn, həmin illərdə Azərbaycanın fəlsəfə tarixinin rus dilində nəşri ilə bağlı ciddi diskussiya gedirdi. Diskussiya nəşri necə adlandırmaq ətrafında aparılırdı: “İstoriya filosofii Azerbaydjana” (“Azərbaycanın fəlsəfə tarixi”), yaxud “İstoriya Azerbaydjanskoy fiosofii” (Azərbaycan fəlsəfəsinin tarixi”). Burada fərq nədən ibarət idi: Nəşr “İstoriya filosofii Azerbaydjana” olsa, o zaman respublikamızın ərazisində yaranan hər hansı fəlsəfədən söhbət gedir, yəni sırf milli fəlsəfə nəzərə alınmamış olurdu. Bir qism alimlərimiz isə deyirdilər ki, “İstoriya Azerbaydjanskoy filosofii” olmalıdır. Burada artıq milli mənsubiyyət ehtiva olunurdu.
Eynilə “Azərbaycan tarixi” nəşrində də bu məsələ ortaya çıxdı. Məsələn, akademik İqrar Əliyev qədim Azərbaycanda yaşayan xalqların türk əsilli olmasını inkar edirdi. Bizim ölkəmizdə iki məfhum var, Azərbaycan milləti və Azərbaycan xalqı. Azərbaycan milləti o deməkdir ki, azərbaycanlılar özlərini türk əsilli sayırlar. Ulu babalarımız bir etnosa aid olaraq dilləri də eynidir. Həmçinin Azərbaycanda yaşayan ləzgilər, talışlar, avarlar, udinlər, kürdlər və digər millətlərin də milli mənsubiyyətləri, tarixləri, öz dilləri, folklorları və adət-ənənələri var. Belə ki, bütün millətlər birlikdə Azərbaycan xalqını təmsil edirik. Yəni, bu dövlətdə, bu torpaqda yaşayan hər millət öz mənsubiyyəti, tarixi və adət-ənənələri ilə qürur duyur. Amma bütün bu millətlər bu torpağın sahibidirlər və vahid bir Azərbaycan xalqıdırlar. İkinci Qarabağ müharibəsi də göstərdi ki, milli mənsubiyyətindən asılı olmayaraq, hamı vahid Azərbaycan xalqı kimi ayağa qalxıb öz torpaqlarını işğaldan xilas etdi.
Sovet dövründə tarixçilərimiz arasında kəskin mübahisələr yarandığı üçün ortaya fundamental bir tədqiqat əsəri qoymaq mümkün olmadı. Digər sahələrdə də belə tendensiyalar müşahidə edilirdi. Burdan çıxış edərək deyirəm ki, Heydər Əliyev elmimizi, incəsənətimizi qabaqlayırdı. Yəni, Heydər Əliyev görürdü ki, hansı işləri həyata keçirmək lazımdır, hansı elmi sahələrdə fundamental əsərlər yazıb nəşr edilməlidir. Ona görə də Heydər Əliyevin yaratdığı və impuls verdiyi təşəbbüslər artıq müəyyən dövrdən sonra bir çox sahələrdə intibaha gətirib çıxardı və bu da milli özünüdərkə meydan açdı. Məsələn, akademik Ziya Bünyadov “Atabəylər dövləti” tarixi tədqiqat əsərini yazıb nəşr etdirdi və əsər Dövlət mükafatına layiq görüldü. Buna qədər Azərbaycan tarixi üzrə heç bir əsərə dövlət mükafatı verilməmişdi.
Məhz həmin dövrdə və bilavasitə Heydər Əliyevin təşəbbüsü ilə “Babək”, “Dədə Qorqud”, “Nizami”, “Üzeyir Hacıbəyov” kimi bədii tarixi filmlər çəkildi. Silsilə romanlar, tarixi əsərlər yazıldı. Əlbəttə, bütün bunlar milli düşüncənin formalaşmasına böyük töhfə oldu. Heydər Əliyevin uzaqgörənliklə həyata keçirdiyi siyasətin mahiyyətində bu məsələ dururdu.
Heydər Əliyev həmin illərdə Bakının inkişafına xüsusi diqqət yetirirdi. Bir çox möhtəşəm binalar, mədəniyyət müəssisələri, hotellər inşa olundu, parklar, xiyabanlar salındı. Bütün bunlar onun birbaşa nəzarəti ilə həyata keçirilirdi. İşinin başdan aşmasına baxmayaraq, şəhərsalmaya xüsusi diqqətlə yanaşırdı.
– Azərbaycanda ədəbiyyat, incəsənət adamlarına, musiqiçilərimizə yüksək dövlət mükafatlarının verilməsi, onların istedadlarının ittifaq səviyyəsində yüksək dəyərləndirilməsi üçün Heydər Əliyev xeyli iş görüb. Bununla bağlı yaddaşınızda hansı xatirələr qalıb?
– Söhbətlərimizin birində soruşdum ki: “Siz bütün bunlara necə nail olursunuz? Axı bizimkilərdən təltif olunan şəxslərin sayı həddindən çoxdur”. Dedi: “Həsən, Moskvada Siyasi Büroda da bu sualı mənə verdilər”. Soruşdum: “Kim verdi?” Dedi: “Ukraynanın birinci katibi soruşdu ki, Heydər Əliyeviç, Azərbaycan Ukraynanın beşdə biri boydadır və əhalisi də Azərbaycan əhalisindən bir neçə dəfə çoxdur. Amma sizdə Sosialist Əməyi Qəhrəmanları bizimkilərdən xeyli çoxdur. Bu necə olur?” Bir az da səbirsizlik edib soruşdum ki, “siz nə cavab verdiniz?” Gülümsəyib dedi: “Dedim, əvvəla bu insanları mən Mərkəzi Komitənin aparatında böyütməmişəm ki. Onlar illərlə elmdə, mədəniyyətdə, incəsənətdə, fəaliyyət göstərən şəxslərdir. Sadəcə, mən onları dəyərləndirməyi bacarıram. Onların sovet mədəniyyəti çərçivəsində yerlərini müəyyənləşdirib Sosialist Əməyi Qəhrəmanı adına təqdim edirəm. Varınızdısa, Siz də təqdim edin”.
Bax, o zaman Heydər Əliyev belə bir formula dedi. Bu cavabından belə nəticə çıxırdı ki, “Zər qədrini zərgər bilər”. Rəşid Behbudov, Qara Qarayev, Fikrət Əmirov, Niyazi, Süleyman Rüstəm, Rəsul Rza, Süleyman Rəhimov və digər şəxslərə həm şəxsi diqqət göstərirdi, həm də onların öz sahələrində inkişafına təkan verirdi. Yadımdadır, hətta o zaman Heydər Əliyev Azərbaycan Neft Akademiyasının rektoru olmuş İsmayıl İbrahimovu 1982-ci ildə SSRİ Dövlət Mükafatına təqdim etdi, 1986-cı ildə isə ona Sosialist Əməyi Qəhrəmanı adının verilməsinə nail oldu.
– Həsən müəllim, istərdik ki, Heydər Əliyevin Azərbaycan gənclərinin ittifaqın ən tanınmış ali məktəblərinə göndərilməsi ideyasının necə meydana gəlməsilə bağlı da fikirlərinizi açıqlayasınız, çünki bu da, sizin, yəni ideoloji katibin tabeliyində olan məsələ idi.
– Ümumiyyətlə, Heydər Əliyev çox kreativ şəxsiyyət idi. Novatorluğu da bundan irəli gəlirdi. Adam var kreativlik təkcə onun sözündə müşahidə edilir. Yəni, ideyanı verdi, ancaq onu həyata keçirməyin yollarını göstərmədi və ya həyata keçirmədi. Heydər Əliyev bütün bu silsiləni – yəni, hansısa təşəbbüsünün yarandığı gündən reallaşacağı günə qədər inkişaf etdirirdi. İdeya ondan irəli gəldi ki, bizdə sənayenin və kənd təsərrüfatının əksər sahələrində müvafiq ali təhsilli mütəxəssislər yox idi.
Ancaq bir misal gətirəcəm. Naxçıvanski adına Hərbi Məktəb də belə ideyalardan biri idi. Heydər Əliyev hərbi məktəbin yaradılması təklifi ilə ilk dəfə Moskvaya müraciət edəndə, Kreml onu bu ideyadan daşındırmağa çalışdı. Heydər Əliyev təkid etdi. Moskva kompromis təklif etdi ki, Rusiya və Ukraynada mövcud olan Suvorov Hərbi Məktəbinin, Naximov adına Hərbi-Dənizçilik Məktəbinin Bakıda filiallarını açaq. Heydər Əliyev etiraz etdi və dedi ki, bizə filiallar lazım deyil. Bizə özümüzün idarə edə biləcəyimiz hərbi orta məktəb lazımdır. O zaman Sovet İttifaqında ancaq Rusiyanın və Ukraynanın hərbi məktəbləri var idi, başqa heç bir respublikanın öz hərbi məktəbi yox idi. Heydər Əliyev ideyanı da verdi, onu həyata da keçirdi. Hər il o məktəbə gedər, oradakı vəziyyətlə maraqlanardı.
Heydər Əliyevin Kremldə böyük nüfuzu vardı və sözü keçirdi. Ona qədər Azərbaycanın heç bir rəhbərinin sovet rəhbərliyi ilə birbaşa əlaqəsi yox idi. Hətta Mircəfər Bağırov belə, birbaşa Stalinə söz deyə bilməyib. Moskvada onun lobbiçiliyini Beriya edirmiş, nə sözü olurmuş, ona deyirmiş. Yeganə Heydər Əliyev idi ki, SSRİ rəhbərliyi ilə birbaşa əlaqə yaratmışdı və sözünü bilavasitə birinci şəxsə deyirdi. Məsələn, Məişət Kondisionerləri Zavodunun tikintisini Ukraynaya vermişdilər, hətta qərar da var idi. Heydər Əliyev o qərarın dəyişdirilməsinə və zavodun Bakıda tikilməsinə nail oldu.
– Həsən müəllim, siz Azərbaycanın üç ayrı-ayrı regionlarında rəhbər olmusunuz – Səbail, Sumqayıt, Gəncə. Heydər Əliyev bu təyinatları verəndə hansı keyfiyyətlərinizi əsas götürürdü?
– Heydər Əliyev məni 26-lar rayon partiya komitəsinə başçı göndərəndə məni şərti desəm, “qiyabi tanıyırdı”. O zaman Heydər Əliyevlə birbaşa əlaqələrimi barmaqla saymaq olardı. Amma haqqımdakı məlumatların sayı, onda lazımi qədər idi. Bu barədə ötən söhbətimizdə danışmışam. Bu, nə deməkdi. Adətən haradasa bir münaqişəli iş olanda Heydər Əliyev Mərkəzi Komitənin katiblərindən soruşurdu ki, kim bunu yoluna qoya bilər? Onlar da Həsən Həsənov deyib işi mənə tapşırırdılar. O zaman nazirlə rayon partiya komitəsinin birinci katibləri arasında iki belə münaqişəni müsbət həll etmişdim. Bir dəfə Şamxorun (indiki Şəmkir rayonu) birinci katibi ilə tikinti materialları naziri arasında, bir dəfə də Zaqatalanın birinci katibi ilə tikinti naziri arasında. Bu məsələlərin həlli bir qədər çətinləşmişdi. Problemi aradan qaldırmağı mənə həvalə etdilər. Getdim və vəziyyəti nizamladım, münasibətləri qaydasına qoydum. Təbii ki, bu barədə birbaşa Heydər Əliyevə deyil, tapşırığı mənə çatdıran MK-nın katibinə məlumat verdim. O da Heydər Əliyevə məruzə etmişdi ki, Həsən Həsənov gedib məsələni yoluna qoyub.
Sovet dövründə belə bir qayda var idi: MK-nın işçiləri vaxtaşırı hansısa məsələ haqqında Siyasi Büroda çıxış edirdilər. Məsələn, Qaradağ rayon partiya komitəsi bu ərazidəki tikinti materialları müəssisələrinə necə rəhbərlik edir? Bu haqda məruzə hazırlamağı mənə tapşırmışdılar. Mən də məsələni araşdırıb Siyasi Büroda çıxış etdim. Sonra Naxçıvanla bağlı məruzə hazırladım. Bir dəfə də bir neçə nazirin işdə yol verdikləri əyintilər haqqında məruzəni mənə tapşırmışdılar. Bu çıxışlar zamanı Heydər Əliyev birbaşa məni görür, dinləyir və çoxlu suallar verirdi. Elə bu zaman onunla birbaşa ünsiyyət imkanı yaranırdı. Əgər bu görüşlər və məlumatlar nəticəsində Heydər Əliyev adamı daxilən qəbul etmirdisə, düşünürəm ki, ona ciddi vəzifə də tapşırmazdı.
Mən MK-nın tikinti şöbəsində işləyən sırf mühəndis məmur idim. Heydər Əliyev məni 26 Bakı komissarı rayonuna (indiki Səbaıl) göndərəndə, incəsənətə, ədəbiyyata və tarixə olan marağım haqqında heç kimdə məlumat yox idi. Ona görə bir çoxu deyirdi ki, axı bu adam (yəni mən) sırf inşaatçıdır rayon isə ziyalılar rayonudur, Yazıçılar, Bəstəkarlar, Rəssamlar ittifaqları burda, Elmlər Akademiyası, universitetlər bu rayonda, inşaatçı-mühəndis bunlara necə rəhbərlik edəcək? Bu rayonda vaxtilə Şıxəli Qurbanov, sonra ali təhsil naziri olan Qurban Əliyev, “Vışka” qəzetinin baş redaktoru olan Fazil Muradəliyev, Elmlər Akademiyasında çalışan alim Zeynalov kimi şəxslər işləmişdilər. Yəni, mənə qədər tikinti meydançasından olan bir mühəndis orda işləməmişdi. Heydər Əliyev isə yəqin düşünürdü ki, “Həsən Həsənov bunu bacaracaq”. Bakı Şəhər Partiya Komitəsinin birinci katibi Əli Kərimovun çox sərt şəkildə etiraz etməsinə baxmayaraq, Heydər Əliyev fikrindən dönmədi. Birinci katib seçiləndən sonra Heydər Əliyev təkid etdi ki, mən şəhər partiya komitəsinin büro üzvü olum. Əli Kərimov buna da etiraz etməyə cəhd göstərdi. Heydər Əliyev yenə təkid etdi. Mən özüm də düşünürdüm ki, Heydər Əliyev məni lazımınca tanımır, amma necə olur, bu qədər qərarında israrlıdır. Yalnız 26-lar rayonunda işləyəndə bildi ki, mənim ədəbiyyata, tarixə, incəsənətə böyük marağım var. Bu barədə ötən söhbətimizdə danışmışam...
Sumqayıta birinci katib getməyim də belə oldu ki, Kamran Bağırov Sumqayıt şəhər partiya komitəsinin birinci katibi işləyirdi. Heydər Əliyev onu Mərkəzi Komitəyə katib vəzifəsinə gətirdi, məni də göndərdi onun yerinə. Sumqayıt fəhlə şəhəri idi. Bu dəfə dedilər, bu adam aktyorlarla, yazıçılarla işləyib, indi fəhlələrlə necə dil tapacaq? Buna baxmayaraq, işlədim, amma az işlədim, hər halda yəqin qənaətbəxş işlədim. Çünki Heydər Əliyev ordan məni Gəncəyə göndərdi. Açığı ora çox ehtiyatla getdim. Özümə inanmırdım ki, Gəncədə uğurla işləyə bilərəm. Heydər Əliyev büroda dedi bilirəm getmək istəmirsən, amma gedəcəksən və işləyəcəksən. Nə deyə bilərdim. Bircə onu söylədim: “Heydər Əliyeviç, çox sağ olun ki, mənim getmək istəməməyimi burda dediniz, amma Gəncəyə getmək istəməməyim işimə təsir etməyəcək”. Bircə bunu dedim və bu da kifayət etdi. Gəncədə işlədiyim ilk günlərdə də ağız büzənlər var idi: “Gəncə nə Bakıdır, şairlərlə, aktyorlarla işləyib gününü keçirəsən, nə də Sumqayıtdır ki, fəhlə sinfi hər çıxışını alqışlasın, Gəncə Gəncədir. Görək, burada nə edə biləcək”. Bütün bu hadisələr məndə formalaşmağa başlayan bir fikri tam qətiləşdirdi ki, Heydər Əliyevin insanları tanımaq, onları dəyərləndirmək intuisiyası çox güclüdür.
– Bizə məlumdur ki, Heydər Əliyev Nizami Gəncəvi yaradıcılığına, irsinə böyük qayğı ilə yanaşıb. Siz Gəncədə çalışarkən, Ulu öndərlə Nizami Gəncəvi və onun irsi ilə bağlı söhbətləriniz və onun Nizami ilə bağlı tapşırıqları olurdumu?
– Hələ mən Gəncəyə təyinat almamışdan əvvəl, Şərqşünaslıq İnstitutunda Heydər Əliyevin təşəbbüsü ilə xüsusi olaraq Nizami şöbəsi təşkil olundu. Həmin dövrdə çox böyük nizamişünas alimimiz Rüstəm Əliyev də şöbəyə müdir təyin olunmuşdu.
Gəncəyə gedəndə Heydər Əliyev mənə bir neçə tapşırıq verdi və onlardan da ən birincisi elə Nizami Gəncəvi ilə bağlı idi. Dedi: “Həsən, biz gərək Nizami Gəncəvinin adını ucaldaq. Çünki biz dünyada bir çox halda Nizami ilə tanınırıq. Ona görə də gərək Nizamini bir Azərbaycanlı dahi kimi dünyaya təqdim edə bilək. Sən bax, gör Gəncədə Nizami ilə bağlı nə kimi tədbirlər keçirə, işlər görə bilərsən”.
Gəncədə o zaman Nizaminin məqbərəsi əhəng daşından tikilmişdi. Yaxınlığında da Aluminium zavodu var idi. O dövrün texnologiyası baxımından çox keyfiyyətsiz bir zavod idi. Onun tozu məqbərəyə hopur və əhəng daşını erroziyaya uğradırdı. Heydər Əliyev dedi: “Həsən, mənə bir neçə nəfər deyib ki, zavod məqbərəni məhv edir və məqbərəni Gəncənin mərkəzinə köçürmək lazımdır. Mən hələ ki, bir qərar verməmişəm. Sən özün bu məsələ ilə ciddi maraqlan və fikrini mənə söylə, görək məqbərəni köçürməyə dəyər, yoxsa yox”. Yəni, Heydər Əliyev hər hansı məsələni kiminsə fikrinə əsaslanıb həll etmirdi. Hər iş ciddi araşdırılır, öyrənilir, sonra qərar verirdi.
Mən məsələni dərindən öyrəndim və bir müddət sonra ona dedim: “Heydər Əliyeviç, məqbərəni köçürməyə ehtiyac yoxdur”. Təkliflərimi və görəcəyimiz tədbirləri söylədim, razılaşdı. Doğrudur, məqbərəni çox da dəbdəbəli düzəldə bilmədik. Amma bəzi tədbirlər görüb onu tarixi yerində saxladıq. Nizami ilə bağlı şəhərdə çoxlu xatirə guşələri yaratmağa nail olduq. Məqbərənin ətrafını təmizlədik, yaşıllıqlar saldıq, çoxlu ağaclar əkdik. Hər il Gəncədə Nizami Poeziya günləri keçirirdik. Bakıdan, ittifaqın bir çox yerlərindən qonaqlar dəvət edirdik. Hətta Ermənistandan nümayəndələr gəlirdi. Bir dəfə də məqbərənin önündə tədbirin açılışında erməni nümayəndəsi çıxış edəndə qayıtdı ki, “Velikiy Armyanskiy poet Nizami Gəncəvi”. Mən də onun yanında durmuşdum. Ətrafdakılar başladı gülüşməyə. Mən sakitləşdirdim ki, insandır səhv edib, çaşıb. Amma bu sırf standart erməni yanaşması idi...
Zərdabi memarlıq abidəsinin (əvvələr məscid idi) həyətində Nizami Poeziya Teatrı yaratdıq. Ən görkəmli hadisələrdən biri bu oldu. Yay dövrü idi, Heydər Əliyev Xanlar rayonuna (indiki Göygöl) kənd təsərrüfatı ilə bağlı səfərə gəlmişdi. Onu müşayiət edən bir neçə nəfər həmin gün Gəncəyə gəlib tamaşaya baxdılar. Heydər Əliyevin Gəncəyə gəlməyi nəzərdə tutulmamışdı. Lakin tamaşanı görənlər təəssüratlarını ona söyləmişdilər və mənə xəbər gəldi ki, Heydər Əliyev tamaşaya gəlmək istəyir. Hamı həyəcan içində idi. Tamaşa bitəndən sonra Heydər Əliyev özünəməxsus tərzdə yaratdığımız teatrın ideyasına, Nizaminin ölməz poeziyasına, aktyorların oyununa yüksək qiymət verdi. Bu Nizami Poeziya Teatrının ən əlamətdar hadisələrindən oldu.
Gəncədə və Bakıda silsilə tədbirlər davam etdi və beləcə Nizami sovet respublikalarının ədəbi ictimaiyyəti arasında Azərbaycan klassik ədəbiyyatının, poeziyasının ən tanınmış simalarından birinə çevrildi. Heydər Əliyevin qarşıma qoyduğu vəzifəni bu şəkildə yerinə yetirdim. Bir müddət sonra mən artıq MK-nın katibi vəzifəsində işləyəndə, Heydər Əliyevin dəstəyi ilə 1981-ci ildə Nizaminin Bakıda və Moskvada 840 illiyini keçirdik. Çox-çox sonralar, artıq müstəqillik illərində mən Baş nazir vəzifəsində çalışanda Nizami Gəncəvinin məqbərəsinin qranitdən tikilməsinə qərar verdim və o yer indiki görkəmini aldı.
Söhbəti qələmə aldı:
İlqar RÜSTƏMOV,
“Xalq qəzeti”