Azərbaycanda Elnarə Xəlilova ad-soyadlı iki sənətkar var. Biri müğənni və aktrisadır, digəri isə rəssam. Bu dəfə rəssam Elnarədən söhbət açmaq istəyirik.
Hələ kiçik yaşlarından güclü rəng duyumu olan Elnarə bu gün çağdaş incəsənətimizi layiqincə təmsil edənlərdir. 1987-ci ildə Bakıda anadan olub. 1994-cü ildə Fikrət Tağıyev adına 72 saylı tam orta məkəbə gedib. Oxumağı, yazmağı öyrəndiyi bu məktəbdən 2002-ci ildə ayrılıb və Bakıxanov qəsəbəsi 1 saylı Bakı Peşə Liseyinə qəbul edilib. O, sevdiyi sənətin sirlərini pedaqoq rəssam Məzahir Rüstəmovdan öyrənib. Uğur pillləri ilə irəlilədikcə məqsədləri də artmağa başlayan gənc qız peşəkar rəssamlıq təhsili almağın vacib olduğunu düşünüb və 2015-ci ildə Azərbaycan Dövlət Rəssamlıq Akademiyasının rəngkarlıq fakültəsinə qəbul edilib. Akademiyada təhsil aldığı illərdə Azərbaycan Rəssamlar İttifaqının üzvləri Arif Kazımov, Bəxtiyar Yusifov, Telman Abbasov kimi ustadlardan bu sənəti dərinliklərinə qədər mənimsəyib.
Elnarənin uğurlu təhsil illəri ötdükcə vaxt gəlib çatır diplom müdafiəsinə. Gənc rəssam qız “Kino və televiziya” mövzusunu seçir. Bu yolda ona kino, geyim və dekor sənətçisi, Xalq rəssamı Mayis Ağabəyov əsl dəstəkçi olur, yol göstərir. O, kino rəssamlığı haqqında bilmədiyi bir çox sirrə vaqif olur. Viktor Hüqonun “Səfillər” romanını diplom mövzusu seçir. Böyük sevgi ilə çalışaraq uğurlu rəsm əsəri ərsəyə gətirir. Həmin tablo müəllim heyəti tərəfindən yüksək qiymətləndirilir. Bu uğur gənc sənətçiyə qol-qanad verir. O, bir çox respublika vəbeynəlxalq rəsm sərgilərinə qatılır, müxtəlif diplom və mükafatlara layiq görülür. Beləcə, ölkə üzrə istedadlı rəssam kimi adını tanıtmağa nail olur.
Elnarə Xanlarova gənc olmasına baxmayaraq, daim yaradıcılıq axtarışında olan, öz dəst-xəttini qoruyan rəssamlardandır. İstər kağız üzərində çəkdiyi qrafik əsərlərdə, istərsə də kətan üzərinə həkk etdiyi yağlı boya, akril texnikalı əsərlərdə bunu görüb hiss etmək olur. Kolorit zənginliyinə xüsusi diqqət yetirməsi diqqəti cəlb edir. “Sübh çağı”, “Kəlağayı”, “Zəfər Tağı”, “Avtoportret”, “Bahar müjdəli naturmort”, “Gövhərağa məscidi”, “Şərq Sənəmləri”, “Çayxor”, “Sevgi nəğməsi”, “Ağoğlan monastırı”, “Balıqçılar evi” və s. kimi bir çox əsərləri əlvan koloriti və maraqlı süjet xətti ilə seçilir. O, sadə və mürəkkəb kompozisiyalı əsərlər yaradır, rəsmlərində işıq–kölgə effektlərindən uğurla istifadə edə bilir. İstedadlı rəssamın çəkdiyi təbiət təsvirləri və insan obrazları şən əhval-ruhiyyəli, olduqca nikbin və gözəldir.
Elnarə xanım bir müddət İçərişəhərdə yerləşən “Medina Gallery”də fəaliyyət göstərib. Vaxt tapdıqca rəssam dostları ilə plenerlərə qatılaraq gördüyü canlı, füsunkar təbiət gözəlliklərini, günəşi, göy üzünü, mavi buludları, ağacları zəngin rənglərin ahəngi ilə təsvir etməyi də unutmur. O, 2018-ci ildən etibarən bir çox festivallara qatılıb və “Başlanğıc” adlı kataloqu dərc olunaraq sərgisi keçilib.
İnanırıq ki, öz sənət yolunu tapmağı bacaran Elnarə Xanlarovanın əsərləri tezliklə çox böyük qalereyaların, muzeylərin daimi ekspozisiyalarını bəzəyəcək.
Ziyarət Cabarova-Qəhrəmanova
sənətşünas, Azərbaycan Dövlət Rəsm Qalereyasının böyük elmi işçisi
