Azərbaycan Dövlət Kukla Teatrı 93-cü mövsümdə maraqlı səhnə təqdimatları, səfər layihələri və sosial-mədəni aksiyalar gerçəkləşdirəcək. Ənənəyə uyğun olaraq, sənət ocağı plandan kənar səhnə əsərləri də hazırlayacaq.
Teatrın növbəti fəaliyyət planları ilə bağlı XQ-yə məlumat verən baş rejissor Anar Məmmədov bildirdi:
– Biz ötən mövsüm bir neçə festivala qoşulduq, özümüz isə iki festivala evsahibliyi etdik. Bu dəfə də əməkdaşlıq əlaqələrimizin genişləndirilməsini düşünürük. Türkiyədə keçiriləcək Beynəlxalq Hadi Poyrazoğlu Kukla və Qaragöz Festivalından dəvət almışıq. Biz bu sənət yarışmasında təmsil olunmağı nəzərdə tutmuşuq. Qardaş ölkə kuklaçıları ilə birgə Türk dünyasında məşhur olan Molla Nəsrəddin lətifələri əsasında komik, eləcə də ibrətamiz hekayələrdən ibarət bir tamaşa üzərində ilkin işlərə başlamışıq.
Teatrımızın beynəlxalq əlaqələrində qonşu Gürcüstanla əməkdaşlığa da önəm veririk. Azərbaycan Dövlət Kukla Teatrı ilə Gürcüstan Dövlət Kukla Teatrları Birliyi arasında memorandum imzalanıb. Bu sənədə əsasən, klassik nağıl nümunələrimizdən birini bu dəfə rejissor Nikoloz Sabaşvilinin quruluşunda təqdim edəcəyik.
Özbəkistanın Qaraqalpaq Dövlət Kukla Teatrı ilə də əməkdaşlıq haqqında müqaviləmiz var. Bu mövsüm qəhrəmanlıq, vətənpərvərlik mövzulu müştərək tamaşa planımızı reallaşdıracağıq.
– Teatr mövsümü hansı tamaşa ilə açacaq?
– Yaradıcı heyət sentyabrın 20-də “Lokomotiv və vaqonlar” tamaşasının premyerası ilə balaca tamaşaçıların qarşısına çıxacaq.
Yazıçı Sevinc Elsevərin eyniadlı pyesi əsasında hazırlanan səhnə əsərinə quruluşu mən vermişəm. Tamaşada köhnə stansiyadakı qoca və lovğa Lokomotivin timsalında uşaqlara xudbinlik və kobudluqdan uzaq olmaq təlqin edilir.
– Başqa hansı yeniliklər gözlənilir?
– Mövsümün sonuna kimi repertuara uyğun olaraq, mənim quruluşumda “Bir gün Şamaxı xanlığında”, Səidə Haqverdiyevanın tərtibat verdiyi “Nənəmin aş qazanı” tamaşaları, eləcə də plandankənar dahi Üzeyir Hacıbəylinin felyetonları, novellaları əsasında böyüklər üçün “Ordan-burdan” tamaşası hazırlanacaq.
Növbəti əlavə tamaşa teatrın rus bölməsi üçün seçilib. Bu, belaruslu rejissor-dramaturq Dmitriy Boqoslavskinin “Mən necə səyahətçi oldum” əsəri əsasında hazırlanacaq eyniadlı səhnə əsəridir.
Ceyhun BALABƏY
XQ
.jpeg)
