Sumqayıt Dövlət Dram Teatrında Azər­baycan Dövlət Mədəniyyət və İncəsənət Universitetinin diplomantı Afaq Qədimlinin diplom tamaşasının premyerası keçirilib.

Gənc rejissor fransız yazıçısı Jan Koktoya müraciət edib. Ədibin ən məşhur səhnə əsərlərindən sayılan “İnsan səsi” monopyesi tanınmış aktrisa Vəfa Qurba­novanın ifasında təqdim edilib. Gənclik şəhərinin teatr səhnəsində əsərin ərsəyə gəlməsi üçün hər cür şərait yaradılıb. Tamaşada tənha qadının iztirabları, ca­vabsız sualların əzabı, daxili duyğuların pıçıltıda üsyanı, çətin döngələrin zülmət yoruculuğu maraqlı rejissor işi və peşəkar aktyor oyunu ilə çatdırılıb.

Azad Yaşarın rus dilindən tərcümə et­diyi əsərdə müəllif fikrinin fəlsəfi qatı, özü­nü mühakimənin, qadın psixologiyasının çalarları Afaq Qədimlinin rejissor yozu­munda maraqlı detallarla işlənib. Tama­şanın quruluşçu rəssamı Arif Müzəffərov, musiqi tərtibatçısı sənətşünaslıq üzrə fəl­səfə doktoru Telman Qəniyevdir.

Premyerada ünlü sənət adamla­rı – professor İsrafil İsrafilov, Əməkdar incəsənət xadimi Əliqismət Lalayev, Əməkdar artistlər Mübariz Həmidov, Gül­şad Baxşəlieva, Esmiralda Osmanova və Gümrah Ömər iştirak edib.

Premyeradan sonra SDDT-nin aparıcı aktrisası Vəfa Qurbanova dedi ki, gərgin məşq proseslərindən sonra zəhmətimizin bəhrəsini görəndə sevindim. Bizə dəstək olan hər kəsə təşəkkür edirəm. 

XQ