Tədqiqatçı-jurnalist, folklorşünas Əli Şamilin Türk dünyasının ortaq mənəvi aləmindən xəbər verən çoxillik araşdırmaları barədə bu coğrafiyanı əhatə edən ölkələrin alim və tanınmış ziyalılarının birgə ərsəyə gətirdiyi yeni nəşr belə adlanır.
Milli-mənəvi dəyərlərimizin fədakar təbliğçilərindən olan Nazir Əhmədlinin nəşrə hazırladığı topluda azərbaycanlı müəlliflərlə bərabər, Əli Şamilin Türkiyə, Rusiya, Almaniya, Ukrayna, İsveç, Albaniya, Suriya və başqa ölkələrdə yaşayan qələm dostlarının onun haqqında oçerk və xatirələri də yer alıb. Bu kitab Azərbaycandan əvvəl Türkiyədə böyük maraqla qarşılanıb. Türk dünyası sevdalısı olan Əli Şamilin 75 illik yubileyi ərəfəsində buraxılan kitabda xatirələrlə yanaşı, onun araşdırmaları vasitəsilə türk xalqları tarixinin maraqlı səhifələri, azadlıq mücadiləsi fədailəri haqqında geniş məlumatlara da yer verilib.
“Köhlən” nəşriyyatında çap edilmiş irihəcmli “Türk dünyasının Əli Şamil hocası” toplusu qardaş xalqlarımız arasındakı ədəbi, mədəni əlaqələri öyrənənlər üçün də zəngin material verir.
Ə.DOSTƏLİ
XQ