O, milli kinematoqrafiyaya yeni, bənzərsiz çalar gətirən sənətkardır

Dünən axşam Nizami Kino Mərkəzində anşlaq idi. Tədbirə rəsmilər, ölkənin tanınmış söz, sənət ustaları, mütəxəssislər, media mənsubları, eləcə də kinomanlar toplaşmışdı. Onlar tanınmış kinorejissor, ssenarist, Azərbaycan Respublikasının Xalq artisti Vaqif Mustafayevin 70 yaşının tamam olması münasibətilə keçiriən təntənəli mərasimin iştirakçıları idilər. 

Tədbirdə giriş sözü ilə çıxış edən mədə­niyyət nazirinin müavini Səadət Yusifova istedadlı sənətkarın keçdiyi uzun və zəngin yaradıcılıq yolundan, Azərbaycanın milli kino tarixində yeni səhifə açmasından danışdı, onun quruluş verdiyi “Bəyin oğurlanması”, “Yaramaz”, “Hər şey yaxşılığa doğru”, habelə ssenari müəllifi olduğu “Fəryad” kimi kino dünyasının nüfuzlu mükafatlarını qazanmış əsərlərinin milli-mənəvi dəyərlərin təbliğində­ki rolundan söz açdı. Vaqif Mustafayevin ya­radıcılığında Ulu öndər Heydər Əliyevin siya­si fəaliyyətinə və şəxsi həyatına həsr olunmuş silsilə sənədli filmlərin xüsusi yer tutduğunu qeyd edən S.Yusifova istedadlı sənətkarın xid­mətlərinin dövlət tərəfindən yüksək qiymət­ləndirildiyini, görkəmli kinorejissorun Azər­baycan Dövlət Mükafatına, Prezidentin fərdi təqaüdünə, Əməkdar incəsənət xadimi fəxri adına, “Şöhrət” və “Şərəf” ordenlərinə layiq görüldüyünü bildirdi. Sonra nazir müavini Prezident İlham Əliyevin imzaladığı sərən­camla Azərbaycan mədəniyyətinin inkişafın­da uzunmüddətli səmərəli fəaliyyətinə görə Vaqif Behbud oğlu Mustafayevin 2-ci dərəcəli “Əmək” ordeni ilə təltif edildiyini söylədi. Bu münasibətlə sənətkarı səhnəyə dəvət edən S.Yusifova ona Mədəniyyət Nazirliyinin Fəxri Fərmanını təqdim etdi. 

Azərbaycan Respublikasının Xalq artisti Şəfiqə Məmmədova çıxışında Vaqif Mustafa­yevi milli kinomuzun böyük simalarından biri kimi səciyyələndirdi və cəsarətli insan kimi bu cəhətinin sənətdə də ona böyük uğurlar gətir­diyini söylədi. 

Ardınca yubilyarı təbrik üçün səhnəyə qalxan Avrasiya Televiziya və Radio Akade­miyasının prezidenti Valeriy Ruzin V.Musta­fayevin yaradıcılığında milli kaloritdən bəşəri dəyərlərə asanlıqla keçid etdiyini və kinonun dili ilə onu dünyaya çatdırdığını açıqladı. O, yubileyi münasibətilə rejissora kino sahəsinə verdiyi böyük töhfəyə görə Vladimir Menşov adına Beynəlxalq Kinofestivalın mükafatını və diplomunu təqdim elədi. 

Daha sonra görkəmli rejissor haqqında söz demək üçün səhnəyə yubilyar sənətkarın beş filmində rol almış məşhur gürcü aktyoru, bu münasibətlə Bakıya dəvər olunmuş Avtandil Maxaradze çıxdı. Vaqif Mustafayev haqqında çıxışı sənətkarlığı qədər maraqlı və kalorit­li olan A.Maxaradze onu sərhədsiz istedadlı, kompromisssiz, inadkar, peşəsinə dəlicəsinə bağlı dahi sənətkar adlandırdı. 

Sonda səhnəyə çıxan yubilyar zala topla­şanlara xitabən “əsl həqiqəti biləndən sonra yalan danışa bilmədiyini” söylədi, onu sevən­lərə, sənətinə qiymət verənlərə, eləcə də ekran əsərlərini qiymətləndirənlərə ürəkdən təşək­kürünü bildirdi. 

Yubiley mərasimi “Həyat, deyəsən, gözəl­dir” bədii filminin nümayiş ilə davam etdiril­di. Müəllifin Birinci Qarabağ müharibəsindən sonra lentə aldığı yeni ekran əsəri Şər qüv­vələrin erməni millətini apardığı yoldan, daha doğrusu, yolsuzluqdan bəhs edir. Tragikome­diya janrında, sürrealist üslubda lentə alınmış filmin tamaşaçının vətənpərvərlik duyğusunu coşduran, milli kimliyini xatırladan və qürur­landıran epizodları zalın alqışları ilə müşayiət olunurdu. Hərdən zaldan “Bravo!” sədaları yüksəlirdi. Kifayət dərəcədə ideoloji yükə malik olmasına baxmayaraq, müəllif müha­ribənin acı gerçəkliyinə söykənən, seyrçi ilə qəhrəmanlarının bədən dilində danışan, süjet boyu ironiya və gülüşün tandemini sərgiləyən ekran əsərinin finalında “ağıllanan, həqiqəti anlayan” erməni qəhrəmanını Tanrının işığına, Günəşə doğru aparır. 

Sonda “Həyat, deyəsən, gözəldir” bədii filmi üzərində birgə çalışdığı yaradıcı və tex­niki heyətini səhnəyə dəvət edən V.Mustafa­yev onların haqqında minnətdarlıq dolu ürək sözlərini söylədi və zəhməti keçmiş hər kəsə təşəkkürünü bildirdi. Oxucuların diqqətinə onu da çatdıraq ki, “Həyat, deyəsən, gözəl­dir” filminin müəllifi 2022-ci ilin noyab­rında Türkiyənin Bursa şəhərində keçirilən II Dədə Qorqud Türk dünyası film festivalında “Türk dünyasının ən yaxşı rejissoru” mükafa­tına layiq görülüb. Ümumilikdə 13 ölkədən gətirilən 42 filmə baxış keçirən münsiflər yek­dilliklə “Həyat, deyəsən, gözəldir”i seçib. 

Dünyaca məşhur rejissor Eldar Ryazano­vun rejissorluq kursunu bitirmiş Vaqif Musta­fayev, mübaliğəsiz deyə bilərik ki, 125 yaşlı milli kinomuza tragikomediyanın yeni, bən­zərsiz çalarlarını gətirib. İstedadlı sənətkarın 70 yaşını qəzetimiz adından təbrik edir, sine­ma maestrosuna yeni-yeni yaradıcılıq uğurları diləyirik.

İ.HƏSƏNQALA, “Xalq qəzeti”