İyunun 28-də Sahibə Qafarovanın sədrliyi ilə Milli Məclisin növbədənkənar sessiyasının növbəti plenar iclası keçirildi.
Əvvəlcə deputatlar cari məsələlərlə bağlı fikirlərini səsləndirdilər. Deputat Vahid Əhmədov ötən günlərdə Azərbaycanda baş verən təbii fəlakətin əhali üçün ciddi problemlər yaratdığından söhbət açdı. Dedi ki, bu hadisələr zamanı bir çox dövlət qurumlarının üzərinə böyük yük düşür. Nazirlər Kabineti xüsusi qərar çıxarmalı, tədbirlər planı hazırlamalı, ziyan çəkmiş kəndlilərə maddi yardım edilməlidir.
Fazil Qəzənfəroğlu Natiq Qasımova Milli Qəhrəman adının verilməsini və onun anasına Prezident təqaüdünün təyin edilməsini ölkəmizdə şəhidlərə və onların ailələrinə verilən yüksək dəyər olduğunu bildirdi. O, müəllimlər üçün keçirilən sertifikasiya imtahanlarında xeyli qeyri-müəyyənliklər olduğunu bildirdi.
Elman Nəsirov bildirdi ki, Ermənistan tərəfinin bir aya sülh sazişi imzalamağa hazır olduğunu bəyan etməsi, əslində, İrəvanın sülh adı ilə spekulyasiya etməsidir. Əgər erməni tərəfi dediyində səmimidirsə, bəs o zaman sülh sazişini imzalamağa mane olan nədir? Əslində, İrəvan bu fikirləri ortaya atmaqla erməni cəmiyyətini aldadır.
Onun sözlərinə görə, bu gün sülhə mane olan əsas reallıq tamamilə başqadır. Ermənistan konstitusiyasında Azərbaycan və Türkiyəyə qarşı ərazi iddiaları hələ də qalmaqdadır. Əgər Ermənistan sülh istəyirsə, o zaman, ilk növbədə, referendum keçirib qonşularına qarşı ərazi iddialarından imtina etməlidir.
Cari məsələlərin müzakirəsindən sonra S.Qafarova gündəliyə 15 məsələnin daxil edildiyini bildirdi. Dedi ki, gündəlikdəki 13 məsələ üçüncü oxunuşda olduğundan müzakirəsiz qəbul olunacaq.
Qanun layihələri təqdim edildikdən sonra səsə qoyularaq qəbul olundu.
Sonra “Bələdiyyələrin statusu haqqında” və “Bələdiyyələrin fəaliyyətinə inzibati nəzarət haqqında” qanunlara dəyişiklik layihəsi birinci oxunuşda müzakirəyə çıxarıldı. Qanun layihəsi birinci oxunuşdan sonra səsə qoyularaq qəbul edildi. Spiker sənədin digər oxunuşda müzakirələrinin VII çağırış Mili Məclisdə davam etdiriləcəyini bildirdi.
S.Qafarova növbədənkənar sessiyanın gündəliyinə daxil olan məsələlərin başa çatdığını və bəzi fikirlərini deputatlarla bölüşmək istədiyini bildirdi. Dedi ki, Birləşmiş Millətlər Təşkilatı Baş Məclisinin qərarı ilə hər il iyunun 30-da Beynəlxalq Parlamentarizm Günü qeyd edilir. Spiker ölkəmizdə müasir peşəkar parlamentin formalaşmasında və inkişafında ulu öndər Heydər Əliyevin müstəsna xidmətlərinin olduğunu bildirdi. Onun sözlərinə görə, Ümummilli liderimiz qanunvericilik orqanına 4 ay rəhbərlik etmiş, sonrakı dövrdə isə Milli Məclisə böyük qayğı göstərmiş, parlament quruculuğu məsələlərini daim diqqət mərkəzində saxlamışdır.
Qeyd edildi ki, Ulu öndərin başladığı işləri əzmlə davam etdirən Prezident İlham Əliyev ölkəmizdə parlamentarizm ənənələrinin inkişafına böyük töhfələr verib. Azərbaycanda parlamentarizmin inkişafında Birinci vitse-prezident Mehriban xanım Əliyevanın da rolu xüsusi qeyd edilməlidir. Prezident İlham Əliyev və Birinci vitse-prezident Mehriban xanım Əliyeva parlamentin deputatları olduqları dövrdə Milli Məclisin peşəkarlıq səviyyəsinin yüksəlməsi naminə dəyərli işlər görmüşlər.
S.Qafarova iyulun 2-nin Azərbaycan Polisi Günü olduğunu xatırlatdı və dedi ki, 106 yaşlı Azərbaycan polisi, daxili işlər orqanları ölkəmizdə ictimai asayişin və qanunçuluğun qorunması sahəsində öhdələrinə düşən vəzifələri layiqincə yerinə yetirirlər. Bir çox polis əməkdaşları dövlətimizin ərazi bütövlüyünün və suverenliyinin təmin olunması naminə döyüşlərdə, xüsusən 44 günlük Vətən müharibəsində qəhrəmanlıq göstərmişlər. Spiker Milli Məclisin adından Polis Günü münasibəti ilə Daxili İşlər Nazirliyinin şəxsi heyətini təbrik etdi, onlara məsul və çətin xidmətlərində yeni uğurlar arzuladı.
Sonra S.Qafarova iyirmi bir gün davam edən növbədənkənar sessiyada Milli Məclisin beş iclasının keçirildiyini, otuz bir qanun və qərar qəbul edildiyini diqqətə çatdırdı. Qeyd olundu ki, Prezident İlham Əliyevin həyata keçirdiyi daxili və xarici siyasətin qanunvericilik bazasını daha da möhkəmləndirmək və təkmilləşdirmək üçün Milli Məclis öhdəsinə düşən vəzifələri bu dövrdə də layiqincə yerinə yetirmişdir. Spiker Milli Məclisin növbədənkənar sessiyasını bağlı elan etdi və Dövlət Himni səsləndirildi. Bununla da, Milli Məclisin altıncı çağırışı işini yekunlaşdırdı.
Əliqismət BƏDƏLOV
XQ
