Bakı Təşəbbüs Qrupunun təşkilatçılığı ilə ötən il sentyabrın 22-də BMT-nin Nyu-Yorkdakı və dekabrın 14-də isə Cenevrədəki qərargahlarında keçirilən kolonializmə və onun yeni təzahürlərinə qarşı mübarizəyə həsr olunmuş silsilə tədbirlər davam edir.

Aprelin 30-da BMT-nin Vyana ofisində “Müstəmləkəçilikdən qurtuluş: assimilya­siyanın nəticələri və onun insan hüquqla­rının həyata keçirilməsinə təsiri” mövzu­sunda konfrans təşkil olunub. 

Konfransda BMT-nin Vyana bölmə­sində akkreditə olunan 25 ölkənin diplo­matları, 20-dək səfir, 20 ölkənin, xüsusilə də Fransanın hələ də müstəmləkə altında saxladığı dənizaşırı ərazilərin – Yeni Ka­ledoniya, Fransız Polineziyası, Fransız Qvianası, Martinika, Qvadelupa, Vallis və Futuna, Korsika, Qəmər Adaları İtti­faqı, Haiti kimi ölkələrin milli hərəkatları­nın rəhbərləri və müstəqillik tərəfdarları, müstəqil ekspertlər, həmçinin yerli və xa­rici media təmsilçiləri iştirak edirlər.

Tədbirin əsas ideyası müstəmləkəçi ölkənin məqsədyönlü mədəni assimil­yasiya siyasətini tənqid etməklə ondan maksimum dərəcədə xilas olmaqdır.

Konfransın “Müstəmləkəçiliyin mənfi təsirləri, yerli icmalar üzərində assimil­yasiya siyasəti” adlı ilk panel iclasında Fransanın müstəmləkələrindən, eləcə də dünyanın müxtəlif universitetlərinin tədqiqatçıları mövzu üzrə çıxışlar ediblər.

Onlar assimilyasiya siyasətinin ya­ratdığı böyük problemlərdən danışıblar. Bildirilib ki, Fransanın müstəmləkəçilik siyasəti əhalinin assimilyasiyasına və xalqların mədəniyyətinin inkar edilməsinə əsaslanır. “Fransa istəyir ki, biz - müstəm­ləkə xalqları “əsl fransız xalqı” olaq və bizə mənşəyimizi xatırladan hər şeyi - ana dilimizi, yurdumuza bağlılığımızı, ata-baba irsimiz və s. inkar edək”, – deyə assimilyasiya siyasətinə məruz qalan və ona qəti etirazlarını bildirən xalqların nü­mayəndələri qeyd ediblər. Vurğulanıb ki, assimilyasiya siyasəti Afrika, Məğrib, Asi­ya, Karib dənizi və Cənubi Amerikadan gələnlər üçün tamamilə fərqlidir, çünki onlar ağdərili və xristian deyillər. Fransa sivil irq və aşağı irq məfhumlarını fərqlən­dirərək insanları alçaldan siyasət yürüdür. 

Milli azlıqların dil məsələləri üzrə fransız tədqiqatçı Rolan Lafitte çıxışında ölkəsində irqçilik probleminin getdikcə artmasından, polisin ərəblər və afrikalı­lara qarşı haqsızlıqlarından, onların polis tərəfindən əsassız olaraq yoxlamalara məruz qalmalarından söz açıb, bunun hüquqşünaslar tərəfindən sistemli irqçilik adlandırıldığını bildirib. Fransız jurnalist Jan-Mişel Brən də ölkəsinin müstəm­ləkəçilik siyasətindən söz açaraq bildirib ki, müstəmləkə xalqları assimilyasiya adı altında əcdadlarından və ənənələrindən uzaqlaşdırılıb.

“Gwadloup Alyans Nasyonal”ın söz­çüsü Natali Minaçi qeyd edib ki, Fransa müstəmləkəçiliyi subkultural kimi təs­vir edilən digər mədəniyyətləri və dilləri məhv etmək məqsədi daşıyır.

Sonda Bakı Təşəbbüs Qrupu ilə Fransız Polineziyasının Tavini Huiraati­ra siyasi partiyası memorandum imza­layıblar. Memorandumun imzalanması gələcək əlaqələrin inkişaf perspektivləri­nin müəyyən olunması və əməkdaşlığın daha da inkişafı baxımından böyük əhə­miyyət kəsb edir.

XQ