Dünən Sahibə Qafarovanın sədrliyi ilə Milli Məclisin qış sessiyası üzrə növbəti plenar iclası keçirildi. Gündəliyin təsdiqindən sonra cari məsələlərin müzakirəsi başlandı.
Deputat Vahid Əhmədov Prezident İlham Əliyevin yenidən dövlət başçısı seçilməsindən sonra ilk ciddi diplomatik sınağının fevralın 16-18-i arası keçirilən Münxen Təhlükəsizlik Konfransı olduğunu dedi. O, dövlət başçımızın iki gün ərzində çoxsaylı görüşlər keçirdiyini xatırladaraq, Azərbaycanın konfransdakı iştirakını kifayət qədər uğurlu adlandırıb.
Deputatlar digər məsələlərə də münasibətlərini bildirdikdən sonra spiker gündəliyə 10 məsələnin daxil edildiyini bildirdi. Birinci məsələnin “Fikrət Fərrux oğlu Məmmədovun Azərbaycan Respublikası Konstitusiya Məhkəməsinin hakimi təyin edilməsi haqqında” olduğunu diqqətə çatdıran S.Qafarova dedi ki, Azərbaycan Respublikası Konstitusiyasının 130-cu maddəsinin 2-ci bəndinə uyğun olaraq, təqdimata parlamentdə müvafiq qaydada baxılmalıdır. Sonra o, Fikrət Məmmədovu peşəkar hüquqşünas və qanunun aliliyini həmişə uca tutan kadr kimi dəyərləndirdi.
Müzakirələrdən sonra təqdimat səsverməyə çıxarılaraq qəbul edildi. Fikrət Məmmədov daha sonra Azərbaycan Respublikasının Konstitusiya Məhkəməsinin hakimi andını içdi.
“Bələdiyyələrin fəaliyyətinə inzibati nəzarəti həyata keçirən orqanın 2023-cü ildə fəaliyyəti haqqında” qanun layihəsini ədliyyə nazirinin müavini Vilayət Zahirov təqdim etdi.
Müzakirələr ətrafında çıxış edənlər bələdiyyələrlə bağlı yeni qanunların hazırlandığından məmnun qaldıqlarını bildiriblər. Yeni qanunda nəzərdə tutulub ki, əhali sayı 3 min nəfərdən az olan bələdiyyələr birləşəcək. Bələdiyyələrin sayı azaldılır və onlar birləşdirilir.
Sənəd müzakirələrdən sonra səsverməyə çıxarılaraq qəbul edildi.
Sonra Azərbaycan Respublikasının Cinayət-Prosessual Məcəlləsində dəyişiklik edilməsi haqqında”, “İnzibati Xətalar Məcəlləsində dəyişiklik edilməsi haqqında”, eləcə də gündəlikdəki digər qanun layihələri müzakirə olunaraq müvafiq qərar qəbul edildi.
***
Milli Məclisin Sədri Sahibə Qafarova Asiya Parlament Assambleyasının 14-cü plenar sessiyasında iştirak etmək məqsədilə ölkəmizdə səfərdə olan Birləşmiş Ərəb Əmirliklərinin Federal Milli Şurası sədrinin birinci müavini Tariq Altayer ilə görüşüb.
Spiker APA -nın üzv dövlətlər arasında dialoq və əməkdaşlığın daha da genişləndirilməsi baxımından əlverişli platforma olduğunu qeyd edərək, paytaxtımızda keçirilən plenar sessiya çərçivəsində məhsuldar müzakirələr aparıldığını diqqətə çatdırıb.
Azərbaycanla BƏƏ arasında münasibətlərin yüksək səviyyədə olduğunu bildirən parlamentin Sədri deyib ki, dövlət başçıları səviyyəsində həyata keçirilən qarşılıqlı səfərlər və görüşlər əlaqələrimizin dinamik inkişafında mühüm rol oynayır. Ölkələrimiz arasında siyasi, iqtisadi, humanitar və digər sahələrdə sıx əməkdaşlıq və bu əlaqələrin daha da genişləndirilməsi üçün yaxşı imkanların olduğu diqqətə çatdırılıb. Həmçinin beynəlxalq təşkilatlar çərçivəsində də sıx əməkdaşlığın davam etdirildiyi bildirilib. Azərbaycan və BƏƏ BMT, Qoşulmama Hərəkatı, İslam Əməkdaşlıq Təşkilatı çərçivəsində bir-birinə qarşılıqlı dəstək göstərirlər.
Görüşdə Azərbaycan Prezidenti İlham Əliyevin təşəbbüsü ilə yaradılan Qoşulmama Hərəkatının Parlament Şəbəkəsi, APA, İƏT PA kimi təşkilatlarda fəal əməkdaşlığın bir sıra məsələlərin həllinə töhfəsi qeyd edilib.
Azərbaycanda fevralın 7-də keçirilmiş növbədənkənar prezident seçkilərində Prezident İlham Əliyevin inamla qalib gəlməsi münasibətilə təbriklərini çatdıran Birləşmiş Ərəb Əmirlikləri Federal Milli Şurası sədrinin birinci müavini ölkəsinin Azərbaycanla bir çox sahələrdə əməkdaşlığı daha da genişləndirmək niyyətində olduğunu söyləyib.
Bu il COP29-un ölkəmizdə keçirilməsi münasibətilə də təbriklərini çatdıran qonaq deyib ki, bu tədbir beynəlxalq ictimaiyyətin Azərbaycana etimadının təzahürüdür. O, ölkəsinin ötən il bu mühüm tədbirə evsahibliyi etdiyini xatırladaraq, təşkilati işlərlə bağlı geniş təcrübəyə malik olduqlarını, dost və qardaş Azərbaycana hər cür dəstəyi göstərməyə hazır olduqlarını bildirib.
Ə.BƏDƏLOV
XQ
