Sənədlərin təqdimat müddəti başa çatdı
2024-cü il fevralın 7-də keçiriləcək növbədənkənar prezident seçkilərində prezidentliyə nаmizədlərin qeydə alınması üçün zəruri olan seçki sənədlərinin MSK-ya təqdim edilməsi müddəti dünən başa çatdı. Prezident seçkiləri ilə əlaqədar bu müddət 2023-cü il dekabrın 19-dan, 2024-cü il yanvarın 8-i saat 18:00-dək olan dövrü əhatə edib.
Seçki Məcəlləsinin 58.1-ci maddəsinə əsasən, prezidentliyə namizəd, siyasi partiyanın, siyasi partiyalar blokunun səlahiyyətli nümayəndəsi səsvermə gününə ən çoxu 50 gün və ən azı 30 gün qalmış saat 18:00-a qədər namizədin qeydə alınması üçün zəruri olan seçki sənədlərini MSK-ya təqdim etməlidir.
Xatırladaq ki, bugünədək 17 nəfərin prezidentliyə namizədliyinin irəli sürülməsi təsdiqlənib və MSK-da 3 namizədin prezidentliyə namizədliyi qeydə alınıb.
Azad edilmiş ərazilərdə seçki məsələləri
İşğaldan azad edilmiş ərazilərdə artıq seçki məntəqələri qurulub. Bu barədə Mərkəzi Seçki Komissiyasının sədri Məzahir Pənahov məlumat verib.
Sədr bildirib ki, orada işlər, demək olar ki, tamamlanıb. Həmin ərazilərdə görülən işlər digər bölgələrdəki seçki məntəqələrinə də nümunə ola bilər. Çünki həmin bölgələrdə intensiv tikinti-quraşdırma işləri aparılır. Hazırda Mərkəzi Seçki Komissiyası həmin məntəqələri təchiz etməklə məşğuldur.
Məhkəmələrin seçkilərlə bağlı vəzifələri
Ali Məhkəmənin sədri İnam Kərimov seçki mübahisələrinin məhkəmə qaydasında həllinə münasibət bildirərkən deyib ki, ölkəmizdə seçki hüquqlarının müdafiəsi ilə bağlı müraciətlərə inzibati məhkəmə icraatı qaydasında ilkin olaraq apelyasiya instansiyası məhkəmələri tərəfindən baxılır.
Bu cür müraciətlərə birbaşa apelyasiya instansiyası məhkəmələrində baxılması işlərə daha keyfiyyətli və operativ baxılmasını, eləcə də proseslərin seçkilərin mahiyyəti nəzərə alınmaqla daha çevik idarə olunmasını təmin etmək məqsədi daşıyır. Məhkəmələr həmişə olduğu kimi, bu il də fevral ayında keçiriləcək növbədənkənar prezident seçkilərində öz üzərlərinə düşən vəzifələri həyata keçirməyə hazırdırlar.
İ.Kərimov şikayət hüququnun reallaşdırılmasında iki imkanın nəzərdə tutulduğunu bildirib: inzibati şikayət və məhkəməyə şikayət verilməsi: “Dairə seçki komissiyasının qərarından, öncə, Mərkəzi Seçki Komissiyasına, Mərkəzi Seçki Komissiyasının qərarından və ya hərəkətindən (hərəkətsizliyindən) isə apelyasiya instansiyası məhkəməsinə şikayət verilə bilər. Başqa sözlə, şikayət ilkin olaraq, yuxarı seçki komissiyası tərəfindən təmin edilməzsə, məhkəməyə şikayət edilə bilər. Maraqlı şəxslər mübahisələndirilən qərarın dərc edildiyi və ya alındığı gündən başlayaraq 3 gün müddətində şikayət edə bilərlər”.
Ali Məhkəmənin sədri deyib ki, ölkəmizdə ədalətli, şəffaf, azad seçkilərin keçirilməsi üçün bütün şərtlər və lazımi şərait mövcuddur.
Bütün namizədlərin hüquqları bərabərdir
“Bütün seçki iştirakçıları – prezidentliyə namizədliyi qeydə alınmış şəxslər və onların səlahiyyətli nümayəndələri – həmin hüquqlardan yararlana bilər. Məqsədimiz odur ki, bütün tərəflər öz hüquqlarını bilsinlər. Müraciətlər qanuna uyğun şəkildə ünvanlanmalıdır...”
Bu fikirləri MSK sədri Məzahir Pənahov səsləndirib. O, əlavə edib ki, qanuna uyğun seçkidə iştirak edən bütün tərəflərə şikayət və müraciətlər üçün bərabər hüquqlar yaradılır”.
Ekspert komissiyaları yaradılır
“Növbədənkənar prezident seçkiləri ilə bağlı MSK-nın nəzdində 9, dairə seçki komissiyaları tərkibində isə 3 nəfərdən ibarət ekspert komissiyaları yaradılır. Komisiya üzvləri vətəndaşların seçki hüququnu pozan qərar, hərəkətsizlikdən, hərəkətlərdən verilən şikayətləri araşdıracaqlar”.
Bu barədə Mərkəzi Seçki Komissiyasının katibi Arifə Muxtarova məlumat verib.
Katib qeyd edib ki, daxil olan şikayətlərdə qanunsuz hərəkətin məzmunu faktlarla əsaslandırılmalıdır. Hərəkətsizlik hər hansı seçki subyektinin qanunla üzərinə düşən vəzifəni icra etməməklə özünü ifadə edir. Belə olduğu halda bu barədə məlumat təqdim edilmiş şikayətdə öz əksini tapmalıdır.
Əliqismət BƏDƏLOV
XQ