Mədəniyyət Nazirliyinin təşəbbüsü ilə “Heydər Əliyev İli” və Azərbaycan peşəkar teatrının yaranmasının 150 illiyi münasibətilə teatrların qastrol səfərləri davam edir.
Aksiya çərçivəsində Azərbaycan Dövlət Pantomima Teatrı “Pantomima buketi” tamaşasını Biləsuvar rayon Gənclər evində nümayiş etdirib. Səhnə əsərini rayon rəsmiləri, mədəniyyət işçiləri və ictimaiyyət nümayəndələri maraqla izləyiblər.
Tamaşanın müəllifi teatrın bədii rəhbəri və baş rejissoru Xalq artisti Bəxtiyar Xanızadədir. Musiqi tərtibatı Əməkdar artist Elman Rəfiyevə, rəsmlərin quruluşu isə Bəxtiyar Xanızadəyə məxsusdur. Qarışıq nömrələr əsasında hazırlanan səhnə əsəri teatrsevərlər tərəfindən alqışlarla qarşılanıb.
Bunda əvvəl isə Sumqayıt Dövlət Dram Teatrı Türkiyə komedioqrafı Əziz Nesinin "Öldür məni, canciyər" əsəri ilə Qusara səfər edib. Qusar Dövlət Ləzgi Dram Teatrının səhnəsində oynanılan tamaşanın quruluşçu rejissoru Xalq artistiFirudin Məhərrəmov, quruluşçu rəssamı Nabat Səmədova, musiqi tərtibatçısı isə Anar Süleymanovdur. Rolları əməkdar artistlər İlahə Səfərova, Növrəstə Həşimova və aktyor Mətləb Səfərli ifa edirlər.
Yaradıcı heyət Qusarda həmkarları tərəfindən bayram ovqatı ilə qarşılanıb. Kollektivlər fikir mübadiləsi aparıb, gələcək əməkdaşlıq perspektivlərini müzakirə ediblər.
Ə.DOSTƏLİ
XQ