Fransa Nigerdəki səfirliyini bağlamağa hazırlaşır. Bununla bağlı Fransanın Xarici İşlər Nazirliyindən diplomatik missiyasının əməkdaşlarına göndərilən məktubda bildirilir. Məlumatı “Associated Press” yayıb.
Fransa XİN-in 19 dekabr tarixli məktubunda deyilir: “Xarici İşlər Nazirliyi təəssüflə səfirliyin işini qeyri-müəyyən müddətə dayandırmaq məcburiyyətindədir”.
Məktubda qeyd edilir ki, səfirliyin əməkdaşları 2024-cü il aprelin 30-da buraxılacaq. Fransanın diplomatik mənbələri göndərilən məktubun həqiqiliyini təsdiqləyib. Mənbələrdən biri deyib: “Fransanın Nigerdəki səfirliyi artıq normal fəaliyyət göstərə və missiyasını yerinə yetirə bilməz”.
Xatırladaq ki, bu il iyulun 26-da Nigerin Prezident Qvardiyası hərbçilərinin bir hissəsi dövlət başçısı Məhəmməd Bazuma qarşı çıxaraq onun hakimiyyətdən uzaqlaşdırılmasına nail olub. Ölkənin silahlı qüvvələrinin Baş qərargahı da qiyam təşkil edən qvardiya döyüşçülərinə dəstək verib. General Abdurahman Tçiani ölkənin yeni rəhbəri elan edilib. Nigerdəki böhran fonunda Niamey və Paris arasında münasibətlər kəskin şəkildə pisləşib. Fransa səfiri Silvain İtte persona-non-qrata elan edilib. O, ölkəsinin qanunsuz hesab etdiyi Higer hərbi hakimiyyətinin bu qərarına bir neçə həftəlik müqavimətdən sonra sentyabrın 27-də Niameyi tərk edib.
Həmin vaxt Fransa prezidenti Emmanuel Makron bəyan etmişdi ki, iyulun sonundakı hərbi çevrilişdən sonra İtte səfirliyin bir neçə əməkdaşı ilə birlikdə diplomatik missiyanın binasında faktiki olaraq girov saxlanılıb. Sonradan RFI radiosunun məlumatına görə, səfir Niameydən Çadın paytaxtı N'Camenaya və oradan isə Parisə uçub.
Makron, eyni zamanda, sentyabrın 24-də televiziya ilə çıxışında Nigerin yeni hakimiyyətinin tələbi ilə 1,5 min fransız əsgərinin ilin sonuna kimi bu ölkəni tərk edəcəyini bildirmişdi. Oktyabrda fransız hərbi qüvvələrinin Nigerdən çıxarılmasına başlanıb. Prosesin bugünlərdə başa çatacağı gözlənilir.
Paşa ƏMİRCANOV
XQ