Pakistanın Ali Məhkəməsi “Rəsmi sirlər haqqında” qanunu pozmaqda ittiham edilərək həbs olunmuş keçmiş baş nazir İmran Xan və keçmiş xarici işlər naziri Şah Mahmud Qüreyşinin zaminə buraxılması ilə bağlı qərar qəbul edib. Məlumatı “Anadolu” verib.
Məlumata görə, məhkəmə Pakistan Ədalət Uğrunda Hərəkat (PTI) Partiyasının liderlərinin haqqında hər biri 1 milyon Pakistan rupisi olan iki girov qoymaq barədə hökm çıxarıb. Bundan əvvəl, oktyabr ayında Pakistanın Xüsusi Məhkəməsi Xan və Qureyşini “Rəsmi sirlər haqqında” qanunu pozmaqda ittiham etmişdi. Lakin pakistanlı siyasətçilər ittihamları qəbul etməmişdilər.
Noyabr ayında Pakistanın Ədalət Uğrunda Hərəkat Partiyası Ali Məhkəməyə müraciət edərək Xan və Qureşinin zaminə buraxılmasını istəmişdi. Hər iki siyasətçi artıq azad olunub.
Qeyd edək ki, bu il avqustun 5-də İmran Xan korrupsiya işi üzrə 3 il müddətinə azadlıqdan məhrum edilib. Avqustun 29-da isə Pakistan məhkəməsi onun üç illik həbs cəzasını təxirə salıb və girov müqabilində azadlığa buraxılmasına qərar verib. Lakin avqustun 30-da Xan yenidən “dövlət sirrini yaymaq” ittihamı ilə həbs olunub.
P.ƏMİRCANOV
XQ
.jpg)
